Adnan Sami: ಸಣ್ಣ ಆಗದಿದ್ರೆ 6 ತಿಂಗಳಲ್ಲಿ ಸಾಯ್ತೀರಾ ಅಂದಿದ್ರಂತೆ ಡಾಕ್ಟರ್, ಜೀವ ಉಳಿಸಿಕೊಳ್ಳಲು 130 ಕೆಜಿ ತೂಕ ಇಳಿಸಿಕೊಂಡ ಸ್ಟಾರ್​ ಸಿಂಗರ್​!

ನೀವು 2000ನೇ ಇಸವಿಯಲ್ಲಿ ಈ ಹಿಂದಿ ಹಾಡುಗಳನ್ನು ಅದರಲ್ಲೂ ಹೊಸ ಹೊಸ ಗಾಯಕರ ಆಲ್ಬಂ ಹಾಡುಗಳನ್ನು ಕೇಳುವವರಾಗಿದ್ದರೆ, ನೀವು ಖಂಡಿತವಾಗಿಯೂ ಗಾಯಕ ಅದ್ನಾನ್ ಸಾಮಿ ಹಾಡಿರುವ ‘ಕಭೀ ತೊ ನಜರ್ ಮಿಲಾವೋ’ ಮತ್ತು ‘ಭೀಗಿ ಭೀಗಿ ರಾತೋ ಮೇ’ ಎಂಬ ಹಾಡುಗಳನ್ನು ಗ್ಯಾರಂಟಿ ಕೇಳಿರುತ್ತೀರಿ ಮತ್ತು ಅವುಗಳನ್ನು ತುಂಬಾನೇ ಇಷ್ಟಪಟ್ಟಿರುತ್ತೀರಿ.

ಈಗೇಕೆ ಇದರ ಬಗ್ಗೆ ಮಾತು ಅಂತೀರಾ? ಈ ಹಾಡುಗಳನ್ನು ಹಾಡಿದ ಗಾಯಕನನ್ನು ನೋಡಿದ ಪ್ರತಿಯೊಬ್ಬರಿಗೂ ‘ಏನಪ್ಪಾ ಎಷ್ಟು ದಪ್ಪಗಿದ್ದಾರೆ ಈ ಗಾಯಕ’ ಅಂತ ಅನ್ನಿಸುತ್ತದೆ. ಹೌದು, ನಿಜಕ್ಕೂ ಗಾಯಕ ಅದ್ನಾನ್ ಸಾಮಿ ತುಂಬಾನೇ ದಪ್ಪವಾಗಿದ್ದರು. ಆದರೆ ಇವರ ಕಂಠ ಮಾತ್ರ ಎಂತವರನ್ನೂ ಮೋಡಿ ಮಾಡುವಂತೆ ಇತ್ತು ಅಂತ ಹೇಳಿದರೆ ಸುಳ್ಳಲ್ಲ.

ಆದರೆ ಅಷ್ಟೊಂದು ದಪ್ಪ ಇದ್ದ ಗಾಯಕ ಅದ್ನಾನ್ ಸಾಮಿ ಕೆಲವು ವರ್ಷಗಳ ನಂತರ ನೋಡಿದರೆ, ಅಕ್ಷರಶಃ ಬಹುತೇಕರು ಅವರನ್ನು ಗುರುತಿಸಲು ಸಾಧ್ಯವಾಗಲೇ ಇಲ್ಲ, ಅಷ್ಟೊಂದು ಸ್ಲಿಮ್ ಆಗಿ ಬಂದಿದ್ದರು ಅದ್ನಾನ್. ಅಷ್ಟು ಬೇಗ ಈ ಗಾಯಕ ದೇಹದ ತೂಕವನ್ನು ಕಡಿಮೆ ಮಾಡಿಕೊಂಡಿದ್ದನ್ನು ನೋಡಿ ಅನೇಕರು ಅದ್ನಾನ್ ಸಾಮಿ ಶಸ್ತ್ರಚಿಕಿತ್ಸೆಯ ಮೂಲಕ ತೂಕವನ್ನು ಕಡಿಮೆ ಮಾಡಿಕೊಂಡಿದ್ದಾರೆ ಅಂತ ಸಹ ಹೇಳಿದರು.

ಅವರ ಈಗಿನ ಸ್ಲಿಮ್ ದೇಹ ಅನೇಕರಿಗೆ ಆಶ್ಚರ್ಯ ಹುಟ್ಟಿಸಿದಂತೂ ನಿಜ. ಆದರೆ ಸಾಮಿ 230 ಕೆಜಿ ತೂಕದಿಂದ 130 ಕೆಜಿ ಇಳಿಸಿದ್ದಾರೆ ಎಂದರೆ ಅಷ್ಟೊಂದು ಸುಲಭವಾದ ಮಾತಂತೂ ಅಲ್ವೇ ಅಲ್ಲ. ಅವರು ಇತ್ತೀಚೆಗೆ ತಮ್ಮ ತೂಕ ಕಡಿಮೆ ಮಾಡಿಕೊಂಡಿರುವ ಬಗ್ಗೆ ಅನೇಕ ವಿಚಾರಗಳನ್ನು ಸ್ವತಃ ತಾವೇ ಹಂಚಿಕೊಂಡಿದ್ದಾರೆ ನೋಡಿ.

ಜನಪ್ರಿಯ ವೆಬ್‌ಸೈಟ್ ಗೆ ನೀಡಿದ ಒಂದು ಸಂದರ್ಶನದಲ್ಲಿ ಒಂದು ಸಮಯದಲ್ಲಿ 230 ಕೆಜಿ ತೂಕವನ್ನು ಹೊಂದಿದ್ದ ಅದ್ನಾನ್ ಸಾಮಿ, ತನ್ನ ತೂಕ ಇಳಿಸಿಕೊಂಡಿರುವ ಪ್ರಕ್ರಿಯೆಯನ್ನು ಹಂಚಿಕೊಂಡರು. 2006 ರಲ್ಲಿ ಅವರು ಅತಿಯಾದ ತೂಕ ಹೊಂದಿರುವುದರಿಂದ ಅವರು ಬದುಕುವುದು ಕೇವಲ ಆರೇ ಆರು ತಿಂಗಳು ಮಾತ್ರ ಅಂತ ವೈದ್ಯರು ಹೇಳಿದ್ದರಂತೆ" ಎಂದು ತೇರಾ ಚೆಹ್ರಾ ಹಾಡಿನ ಗಾಯಕ ಹೇಳಿಕೊಂಡಿದ್ದಾರೆ.

"2006 ರಲ್ಲಿ, ನಾನು ಅತಿಯಾದ ತೂಕವನ್ನು ಹೊಂದಿದ್ದರಿಂದ ವೈದ್ಯರು ನನಗೆ ಆರು ತಿಂಗಳ ಅಂತಿಮ ಗಡುವು ನೀಡಿದ್ದರು. ಆಗ ನಾನು 230 ಕೆಜಿ ತೂಕ ಇದ್ದೆ. ಅವರು ನನಗೆ ಇದು ಮಾಡು ಇಲ್ಲವೇ ಮಡಿ ಸನ್ನಿವೇಶ ಅಂತ ಹೇಳಿದ್ದರು. ನಾನು ಇದ್ದಕ್ಕಿದ್ದಂತೆ ಇಷ್ಟು ತೂಕವನ್ನು ಹೇಗೆ ಕಳೆದುಕೊಂಡೆ ಅಂತ ಬಹಳಷ್ಟು ಜನರು ಆಶ್ಚರ್ಯ ಪಡಲು ಪ್ರಾರಂಭಿಸಿದರು" ಎಂದು ಸಾಮಿ ಹೇಳಿದರು.

“ಯಾವುದೋ ಚಲನಚಿತ್ರಕ್ಕಾಗಿ ಅದ್ನಾನ್ ದೇಹದ ತೂಕ ಕಡಿಮೆ ಮಾಡಿಕೊಂಡಿದ್ದಾರೆ ಅಂತ ಜನರು ಭಾವಿಸಿದ್ದರು, ಆದರೆ ಅದು ಸಂಪೂರ್ಣವಾಗಿ ನನ್ನ ಜೀವನಕ್ಕಾಗಿ ಅಂತ ನನಗೆ ಮಾತ್ರ ಗೊತ್ತಿತ್ತು. ನಾನು ನನ್ನ ಉಳಿವಿಗಾಗಿ ತೂಕವನ್ನು ಕಡಿಮೆ ಮಾಡಿಕೊಳ್ಳಬೇಕಿತ್ತು ಮತ್ತು ಇದಕ್ಕಿಂತ ಉತ್ತಮ ಪ್ರೇರಣೆ ಬೇರೊಂದಿರುವುದಕ್ಕೆ ಸಾಧ್ಯನೇ ಇಲ್ಲ" ಎಂದು ಅವರು ಹೇಳಿದರು.

ತಾವು ಹೀಗೆ ತೂಕ ಕಡಿಮೆ ಮಾಡಿಕೊಂಡಿರುವ ಒಂದು ಯಶಸ್ಸನ್ನು ತಮ್ಮ ಪೌಷ್ಟಿಕ ತಜ್ಞರಿಗೆ ಅರ್ಪಿಸಿದ ಅವರು "ಅದ್ಭುತ ಪೌಷ್ಟಿಕ ತಜ್ಞರನ್ನು ಭೇಟಿಯಾದೆ, ಅವರು ಹೇಳಿದಂತೆ ನಾನು ಕೇಳಿದೆ ಮತ್ತು ಮೊದಲಿಗೆ ಚಿಕ್ಕದಾಗಿ ಶುರು ಮಾಡಿದ ಪ್ರಕ್ರಿಯೆ ನೋಡು ನೋಡುತ್ತಿದ್ದಂತೆ ಪರ್ವತದಂತೆ ಕಾಣುತ್ತಿದ್ದ ಗುರಿ ಚಿಕ್ಕದಾಯಿತು.

ನಾನು ಹಂತ ಹಂತವಾಗಿ ಪೌಷ್ಟಿಕ ತಜ್ಞರು ಹೇಳಿದಂತೆ ಡಯಟ್ ಅನ್ನು ಫಾಲೋ ಮಾಡಿದೆ. ಆದರೆ ನಾನು ಇಷ್ಟು ತೂಕವನ್ನು ಕಡಿಮೆ ಮಾಡಿಕೊಳ್ಳುತ್ತೇನೆ ಅಂತ ಎಂದಿಗೂ ಭಾವಿಸಿರಲಿಲ್ಲ” ಎಂದು ಹೇಳಿದರು. ತೂಕ ಇಳಿಸಿಕೊಳ್ಳುವುದು ತುಂಬಾನೇ ಕಷ್ಟದ ಕೆಲಸ ಅಂತ ಗಾಯಕ ಒಪ್ಪಿಕೊಂಡರು. ಹಲವಾರು ಆಹಾರಕ್ರಮಗಳನ್ನು ಪ್ರಯತ್ನಿಸಿದರೂ, ಅವರು ಅಂತಿಮವಾಗಿ ತಮ್ಮ ಲೈಫ್ ಸ್ಟೈಲ್ ಅನ್ನು ಸಂಪೂರ್ಣವಾಗಿ ಬದಲಾಯಿಸಿಕೊಳ್ಳಲು ನಿರ್ಧರಿಸಿದರು ಎಂದು ಅವರು ಹೇಳಿದರು.