The Kerala Story: ಕೇರಳ ಸ್ಟೋರಿ ಪ್ರದರ್ಶನಕ್ಕೆ ಕಾಂಗ್ರೆಸ್ ವಿರೋಧ

ವಿವಾದಾತ್ಮಕ ಸಿನಿಮಾ ದಿ ಕೇರಳ ಸ್ಟೋರಿ ಮೇ 5ರಂದು ಥಿಯೇಟರ್​ಗಳಲ್ಲಿ ರಿಲೀಸ್ ಆಗಲಿದೆ. ಸಿನಿಮಾ ರಿಲೀಸ್​ಗೆ ಇನ್ನೂ ಬೆರಳೆಣಿಕೆಯ ದಿನಗಳಷ್ಟೇ ಬಾಕಿ ಇದೆ. ಸಿನಿಮಾ ಬಿಡುಗಡೆಗೆ ಕೆಲವೇ ದಿನ ಬಾಕಿ ಇರುವಂತಹ ಸಂದರ್ಭದಲ್ಲಿ ಕಾಂಗ್ರೆಸ್ ಶುಕ್ರವಾರ ಕೇರಳ ಸರ್ಕಾರದ ಮುಂದೆ ಹೊಸ ಬೇಡಿಕೆ ಇಟ್ಟಿದೆ.

ಸುಳ್ಳುಗಳು ತುಂಬಿರುವ, ಮುಸ್ಲಿಂ ಸಮುದಾಯವನ್ನು ಕೆಟ್ಟದಾಗಿ ತೋರಿಸಿರುವ ಈ ಸಿನಿಮಾದ ಪ್ರದರ್ಶನಕ್ಕೆ ಅವಕಾಶ ನೀಡಬಾರದು ಎಂದು ಕಾಂಗ್ರೆಸ್ ಕೇರಳ ಸರ್ಕಾರಕ್ಕೆ ಮನವಿ ಮಾಡಿದೆ.

ಕೇರಳದ ಆಡಳಿತ ಪಕ್ಷ ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ (Marxist)ನ ಯೂತ್ ವಿಂಗ್ ದಿ ಡೆಮಾಕ್ರೆಟಿಕ್ ಯೂತ್ ಫೆಡರೇಷನ್ ಆಫ್ ಇಂಡಿಯಾ (ಡಿವೈಎಫ್ಐ) (DYFI) ಕೂಡಾ ಸಿನಿಮಾವನ್ನು ವಿರೋಧಿಸಿದೆ. ಸಂಘ ಪರಿವಾದ ಪ್ರಭಾವಿ ಮಾಧ್ಯಮವನ್ನು ಬಳಸಿಕೊಂಡು ಕೇರಳ ರಾಜ್ಯ ಹಾಗೂ ಪೂರ್ತಿ ಸಮುದಾಯವನ್ನು ಅವಮಾನಿಲಸು ಪ್ರಯತ್ನಿಸುತ್ತಿದೆ ಎಂದು ಆರೋಪಿಸಿದೆ.

ಒಂದು ತಿಂಗಳ ಹಿಂದೆ ಸಿನಿಮಾದ ಟ್ರೈಲರ್ ರಿಲೀಸ್ ಆಗಿದ್ದು ಕೇರಳದಲ್ಲಿ ಹಲವು ಪ್ರತಿಭಟನೆಗಳು ನಡೆದಿದ್ದವು. ಸಿನಿಮಾವನ್ನು ಸುದಿಪ್ಟೋ ಸೆನ್ ನಿರ್ದೇಶಿಸಿದ್ದಾರೆ. ಇದನ್ನು ವಿಪುಲ್ ಶಾ ಅವರು ನಿರ್ಮಿಸಿದ್ದಾರೆ. ಕೇರಳದ ಉತ್ತರ ಭಾಗದಿಂದ 2016ರಲ್ಲಿ 21 ಜನ ನಾಪತ್ತೆಯಾದ ಪ್ರಕರಣದ ಮೇಲೆ ಈ ಸಿನಿಮಾ ಬೆಳಕು ಚೆಲ್ಲುತ್ತದೆ. ಇವರು ಇಸ್ಲಾಮಿಕ್ ಸ್ಟೇಟ್ ಪ್ರಭಾವ ಇರುವಂತಹ ಸಿರಿಯಾ ಹಾಗೂ ಅಫ್ಘಾನಿಸ್ತಾನದಲ್ಲಿ ಐಸಿಸ್ ಸೇರಿಕೊಂಡರು ಎನ್ನಲಾಗಿದೆ.

ನವೆಂಬರ್​ನಲ್ಲಿ ಟೀಸರ್ ರಿಲೀಸ್ ಆದಾಗ ಇದರಲ್ಲಿ ಬಹಳಷ್ಟು ಸುಳ್ಳುಗಳಿವೆ, ಮಹಿಳೆಯರ ಸಂಖ್ಯೆಯನ್ನೂ ಸುಳ್ಳಾಗಿ ತೋರಿಸಲಾಗಿದೆ ಎಂದು ಒಂದಷ್ಟು ಜನರು ಟೀಕಿಸಿದ್ದರು. ಅಂತೂ ಈ ಟೀಸರ್ ಹಾಗೂ ಟ್ರೈಲರ್ ಭಾರೀ ಚರ್ಚೆಯನ್ನು ಹುಟ್ಟು ಹಾಕಿದ್ದು ಮಾತ್ರ ಸುಳ್ಳಲ್ಲ.

ಈ ಸಿನಿಮಾ ಸುಳ್ಳಿನ ಕಂತೆ. ಇದರಲ್ಲಿ 32 ಸಾವಿರ ಮಹಿಳೆಯರನ್ನು ಮತಾಂತರಿಸಲಾಗಿದೆ ಹಾಗೂ ಇಸ್ಲಾಮಿಕ್ ಸ್ಟೇಟ್ ಅಧಿಕಾರದ ಪ್ರದೇಶಗಳಿಗೆ ಕಳುಹಿಸಲಾಗಿದೆ ಎನ್ನಲಾಗಿದೆ. ಟ್ರೈಲರ್​ನಲ್ಲಿ ಈ ಸಿನಿಮಾ ಕುರಿತು ಬೇಕಾದಷ್ಟು ಮಾಹಿತಿ ರಿವೀಲ್ ಆಗಿದೆ. ಇದು ರಾಜ್ಯದ ಖ್ಯಾತಿಗೆ ಚ್ಯುತಿ ತರಲು ಮಾಡಲಾಗಿದೆ. ಸಮುದಾಯವನ್ನು ಅವಮಾನಿಸಲು ಉದ್ದೇಶಿಸಲಾಗಿದೆ. ಇದರ ಹಿಂದೆ ಸಂಘ ಪರಿವಾರದ ಕೈವಾಡವಿದೆ ಎಂದು ಪ್ರತಿಪಕ್ಷ ನಾಯಕ ವಿ.ಡಿ. ಸತೀಶನ್ ಆರೋಪಿಸಿದ್ದಾರೆ.

ಇದು ಕೇರಳದ ಜನರ ಒಗ್ಗಟ್ಟನ್ನು ಮುರಿದು ಅವರ ಮನಸಿನಲ್ಲಿ ದ್ವೇಷದ ಬೀಜ ಬಿತ್ತುವ ಪ್ರಯತ್ನ. ಆದರೆ ಕೇರಳದ ಜನ ಒಟ್ಟಾಗಿ ನಿಂತು ಇದನ್ನು ಸೋಲಿಸುತ್ತಾರೆ ಎಂದಿದ್ದಾರೆ.

ಕೇರಳ ರಾಜ್ಯವನ್ನು ಧಾರ್ಮಿಕ ಮತಾಂಧರು ಮತ್ತು ದೇಶವಿರೋಧಿ ಶಕ್ತಿಗಳಿರುವ ಸ್ಥಳವೆಂದು ಬಿಂಬಿಸಲು ಸಂಘಪರಿವಾರ ಪ್ರಯತ್ನಿಸುತ್ತಿದೆ. ಇದು ಕುತಂತ್ರ. ಆದರೆ ಕೇರಳದಂತಹ ರಾಜ್ಯದಲ್ಲಿ ಇದು ವರ್ಕ್ ಆಗುವುದಿಲ್ಲ. ರಾಜ್ಯವು ಜಾತ್ಯತೀತತೆ ಮತ್ತು ಪ್ರಜಾಸತ್ತಾತ್ಮಕ ಮೌಲ್ಯಗಳ ತೊಟ್ಟಿಲು ಎಂದು ಅದು ಹೇಳಿಕೆಯಲ್ಲಿ ತಿಳಿಸಿದೆ.