Sacred Games 2: ಆನ್​ಲೈನ್​ನಲ್ಲಿ ಲೀಕಾಯ್ತು ಬಹು ನಿರೀಕ್ಷಿತ ವೆಬ್​ ಸರಣಿ 'ಸೇಕ್ರೆಡ್ ಗೇಮ್ಸ್ 2'

ಭಾರತೀಯ ವೆಬ್ ಸಿರೀಸ್​ನಲ್ಲಿ ಹೊಸ ಸಂಚಲನ ಸೃಷ್ಟಿಸಿದ್ದ 'ಸೇಕ್ರೆಡ್ ಗೇಮ್ಸ್' ಸರಣಿಯ 2ನೇ ಭಾಗ ಬಿಡುಗಡೆಯಾಗಿದೆ. 2ನೇ ಸರಣಿಗೂ ಉತ್ತಮ ವಿಮರ್ಶೆಗಳು ಕೇಳಿ ಬರುತ್ತಿದೆ. ಇದರ ಬೆನ್ನಲ್ಲೇ ನೂತನ ಸರಣಿ ಆನ್​ಲೈನ್​ನಲ್ಲಿ ಲೀಕ್ ಆಗಿದೆ. ನೆಟ್​ಫ್ಲಿಕ್ಸ್​ ನಿರ್ಮಿಸುತ್ತಿರುವ ಈ ಸಿರೀಸ್​ ಇದೀಗ ಪೈರಸಿಗೆ ತುತ್ತಾಗಿದೆ. ಈ ಹಿಂದೆ  'ಗೇಮ್​ ಆಫ್ ಥ್ರೊನ್ಸ್ 'ಸಿರೀಸ್ ಕೂಡ ಪೈರಸಿ ಸಮಸ್ಯೆಯನ್ನು ಎದುರಿಸಿತ್ತು. ಇದೀಗ ಭಾರತದಲ್ಲಿ ವೆಬ್​ ಸಿರೀಸ್ ಮಾರುಕಟ್ಟೆಯ ಸೂಪರ್ ಸರಣಿ ಲೀಕ್ ಆಗಿರುವುದು ನೆಟ್​ಫ್ಲಿಕ್ಸ್ ನಿರ್ಮಾಪಕರ ನಿದ್ದೆಗೆಡಿಸಿದೆ.

'ಸೇಕ್ರೆಡ್ ಗೇಮ್ಸ್​ 2' ಅನ್ನು ಲೀಕ್ ಮಾಡಿದವರಲ್ಲಿ ಕೇಳಿ ಬಂದಿರುವ ಪ್ರಮುಖ ವೆಬ್​ಸೈಟ್ ಹೆಸರು ತಮಿಳು ರಾಕರ್ಸ್. ಈ ಹಿಂದೆ ಸಿನಿಮಾಗಳನ್ನು ಬಿಡುಗಡೆಯಾದ ದಿನವೇ ಆನ್​ಲೈನ್​ನಲ್ಲಿ ಹಂಚುವ ಮೂಲಕ ತಮಿಳ್ ರಾಕರ್ಸ್ ಸುದ್ದಿಯಾಗುತ್ತಿತ್ತು. ಈ ಬಾರಿ ಒಂದು ಹೆಜ್ಜೆ ಮುಂದೆ ಹೋಗಿರುವ ಪೈರಸಿ ಸೈಟ್ 'ಸೇಕ್ರೆಡ್ ಗೇಮ್ಸ್' ಸರಣಿಗೆ ಕನ್ನ ಹಾಕುವಲ್ಲಿ ಯಶಸ್ವಿಯಾಗಿದೆ.

ಮುಂಬೈ ಭೂಗತ ಜಗತ್ತು, ರಾಜಕೀಯ, ಧರ್ಮದ ಹಣೆಯಲಾಗಿದ್ದ ಚಿತ್ರಕಥೆ ಹೊಂದಿರುವ  'ಸೇಕ್ರೆಡ್ ಗೇಮ್ಸ್' ಮೊದಲ ಸರಣಿ ಭಾರತದಲ್ಲಿ ಭಾರಿ ಯಶಸ್ವಿಯಾಗಿತ್ತು. ಹೀಗಾಗಿ ನೆಟ್​ಫ್ಲಿಕ್ಸ್ ತಂಡವು ಇದರ ಎರಡನೇ ಭಾಗದ ನಿರ್ಮಾಣಕ್ಕಾಗಿ ಸುಮಾರು 100 ಕೋಟಿಗೂ ಅಧಿಕ ಮೊತ್ತ ಹೂಡಿಕೆ ಮಾಡಿದೆ ಎನ್ನಲಾಗಿದೆ. ಆದರೀಗ ಪೈರಸಿ ಕಾಟದಿಂದ ಭಾರೀ ನಷ್ಟ ಉಂಟಾಗುವ ಸಾಧ್ಯತೆಯಿದೆ.

ವಿಕ್ರಮ್ ಚಂದ್ರ ಎಂಬವರ ಕಾದಂಬರಿ ಆಧಾರಿತ ಕಥೆಯನ್ನು 'ಸೇಕ್ರೆಡ್ ಗೇಮ್ಸ್​'ಗಾಗಿ ಖ್ಯಾತ ನಿರ್ದೇಶಕ ಅನುರಾಗ್ ಕಶ್ಯಪ್ ಚಿತ್ರಕಥೆಯನ್ನಾಗಿಸಿದ್ದರು. ಈ ಚಿತ್ರದಲ್ಲಿ ಸೈಫ್ ಅಲಿ ಖಾನ್, ನವಾಜುದ್ದೀನ್ ಸಿದ್ದಿಕಿ ಹಾಗೂ ರಾಧಿಕಾ ಅಪ್ಟೆ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಂಡಿದ್ದರು. ಥ್ರಿಲ್ಲರ್​ ಕಥೆಯನ್ನು ಒಳಗೊಂಡಿದ್ದ ಈ ಸರಣಿ ಭಾರತದ ಸಿನಿಪ್ರಿಯರ ಮನಗೆದ್ದಿತ್ತು.

ಇದೀಗ ಎರಡನೇ ಸರಣಿ ಆಗಸ್ಟ್​ 15 ರಂದು ಬಿಡುಗಡೆಯಾಗಿದ್ದು, ಇದರಲ್ಲೂ ಸೈಫ್ ಅಲಿ ಖಾನ್, ನವಾಜುದ್ದೀನ್ ಸಿದ್ದಿಕಿ ಇರಲಿದ್ದಾರೆ. ಹಾಗೆಯೇ ರಣವೀರ್ ಶೋರೆ ಹಾಗೂ ಕಲ್ಕಿ ಕೋಚ್ಲಿನ್ ಹೊಸ ಸೇರ್ಪಡೆಯಾಗಿರುವುದು 'ಸೇಕ್ರೆಡ್​ ಗೇಮ್ಸ್​ 2' ಮೇಲಿನ ನಿರೀಕ್ಷೆ ಹೆಚ್ಚಿಸಿತ್ತು. ಆದರೀಗ  ಬಿಡುಗಡೆಯಾದ  2ನೇ ದಿನದಲ್ಲೇ  ಲೀಕ್ ಆಗಿರುವುದು ನೆಟ್​ಫ್ಲಿಕ್ಸ್ ವೀಕ್ಷಕರ ಸಂಖ್ಯೆಯ ಮೇಲೆ ಪ್ರಭಾವ ಬೀರಲಿದೆ.