Sudha Murty: ತನ್ನ ಯಶಸ್ಸಿನ ಶ್ರೇಯಸ್ಸನ್ನು ತಂದೆ ಹಾಗೂ ಪತಿಗೆ ಸಲ್ಲಿಸಿದ ಸುಧಾಮೂರ್ತಿ!

ಇತ್ತೀಚಿಗೆ ಹಿಂದಿಯ ಪ್ರಸಿದ್ಧ ಟಿವಿ ಶೋ ‘ದಿ ಕಪಿಲ್ ಶರ್ಮಾ ಶೋ’ ದಲ್ಲಿ ಭಾಗವಹಿಸಿದ್ದ ಸುಧಾಮೂರ್ತಿ ತಮ್ಮ ಜೀವನದ ಹಲವಾರು ಸ್ವಾರಸ್ಯಕರ ಘಟನೆಗಳನ್ನು ಹಂಚಿಕೊಂಡಿದ್ದು, ಅವು ಎಲ್ಲರ ಗಮನ ಸೆಳೆಯುತ್ತಿವೆ.

ತಾಯಂದಿರ ದಿನದ ಅಂಗವಾಗಿ ಇನ್ಪೋಸಿಸ್ ನ ಸಂಸ್ಥಾಪಕಿ ಸುಧಾ ಮೂರ್ತಿ, ನಟಿ ರವಿನಾ ಟಂಡನ್ ಹಾಗೂ ‘ದಿ ಎಲಿಫೆಂಟ್ ವಿಸ್ಪರರ್ಸ್’ ನ ಆಸ್ಕರ್ ವಿಜೇತೆ ಗುಣೀತ್ ಮೊಂಗಾ ಅವರನ್ನು ಕಪಿಲ್ ಶರ್ಮಾಗೆ ಶೋಗೆ ಆಹ್ವಾನಿಸಲಾಗಿತ್ತು.

ಈ ಸಂದರ್ಭದಲ್ಲಿ ಇನ್ಫೋಸಿಸ್ ಫೌಂಡೇಶನ್ ನ ಮುಖ್ಯಸ್ಥೆಯು ಸಹ ಆಗಿರುವ ಪ್ರದ್ಮಶ್ರೀ ಪುರಸ್ಕೃತೆ ಶ್ರೀಮತಿ ಸುಧಾಮೂರ್ತಿ ಅವರು ಸಾಕಷ್ಟು ವಿಷಯಗಳನ್ನು ಹಂಚಿಕೊಂಡಿದ್ದಾರೆ.

ಟಾಟಾ ಮೋಟಾರ್ಸ್ ನಲ್ಲಿ ಭಾವುಕಳಾದೆ: ಕಾರ್ಯಕ್ರಮದಲ್ಲಿ ತಮ್ಮ ಟಾಟಾ ಮೋಟಾರ್ಸ್ ಭೇಟಿಯನ್ನು ಹಂಚಿಕೊಂಡಿದ್ದಾರೆ ಸುಧಾಮೂರ್ತಿ. “ಕಳೆದ ತಿಂಗಳು ನಾನು ಟಾಟಾ ಮೋಟಾರ್ಸ್ ಗೆ ಹೋಗಿದ್ದೆ. ನಾನು ಸುಮಾರು ಕಳೆದ 50 ವರ್ಷಗಳಿಂದಲೂ ಟಾಟಾಗೆ ಭೇಟಿ ನೀಡುತ್ತಿದ್ದೇನೆ. ಇತ್ತೀಚೆಗೆ ನಾನು ಕಂಪೆನಿಗೆ ಭೇಟಿ ಕೊಟ್ಟಾಗ ಕಾರ್ ವಿಭಾಗದಲ್ಲಿ ಸುಮಾರು 300 ಹುಡುಗಿಯರು ಕಾರಿನ ಬಿಡಿಭಾಗಗಳನ್ನು ಜೋಡಿಸುತ್ತಿದ್ದರು.

ಅದನ್ನು ನೋಡಿ ನನಗೆ ನಿಜಕ್ಕೂ ಸಂತೋಷವಾಯಿತು. ಭಾವುಕಳಾದೆ. ಏಕೆಂದರೆ, ಇಂಜಿನಿಯರಿಂಗ್ ಎಂದರೆ, ಕೇವಲ ಗಂಡು ಮಕ್ಕಳು ಮಾಡುವ ಕೋರ್ಸ್ ಎಂದು ಎಲ್ಲರು ತಿಳಿದಿದ್ದ ಕಾಲದಲ್ಲಿಯೇ ನನ್ನ ತಂದೆ ನನ್ನನ್ನು ಇಂಜಿನಿಯರಿಂಗ್ ಓದಲು ಪ್ರೋತ್ಸಾಹಿಸಿದ್ದರು. ಅದರಿಂದ ನಾನು ಕಂಡ ಕನಸುಗಳನ್ನು ನನಸು ಮಾಡಿಕೊಳ್ಳಲು ಸಾಧ್ಯವಾಯಿತು” ಎಂದಿದ್ದಾರೆ.

ನನ್ನ ಯಶಸ್ಸಿನ ಶ್ರೇಯ ಸಲ್ಲುವುದು ನನ್ನ ತಂದೆ ಹಾಗೂ ಪತಿಗೆ: “ನಾನು ಇಂಜಿನಿಯರಿಂಗ್ ನಲ್ಲಿ ಮೊದಲನೇ ರ್ಯಾಂಕ್ ಬಂದಾಗ , ಅದು ಎನ್ನುವುದು ಕೇವಲ ಗಂಡು ಮಕ್ಕಳು ಮಾತ್ರವೇ ಪಡೆಯಬಹುದಾದ ಪದವಿಯಲ್ಲ.

ಅವರಿಗಿಂತಲೂ ಉತ್ತಮವಾಗಿ ಹೆಣ್ಣು ಮಕ್ಕಳು ಸಹ ಇದನ್ನು ಮಾಡಬಲ್ಲರು’ ಎಂಬುದು ಜನರಿಗೆ ಅರಿವಾಯಿತು. ಇದಕ್ಕೆಲ್ಲಾ ನನ್ನನ್ನು ಇಂಜಿನಿಯರಿಂಗ್ ಮಾಡಲು ಪ್ರೋತ್ಸಾಹಿಸಿದ ತಂದೆಯೇ ಕಾರಣ” ಎಂದಿದ್ದಾರೆ.

ಈ ಮಾತಿಗೆ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ರವಿನಾ ಟಂಡನ್ ಧ್ವನಿಗೂಡಿಸಿದ್ದು, “ಇಂದು ನಾವೆಲ್ಲಾ ಮಹಿಳಾ ಸಬಲೀರಣದ ಬಗ್ಗೆ ಮಾತನಾಡುತ್ತೇವೆ. ಆದರೆ, ಈ ಪಿತೃ ಪ್ರಧಾನ ಸಮಾಜದಲ್ಲಿ ಸಹ ಹೆಣ್ಣುಮಕ್ಕಳು ಎಲ್ಲರಂತೆ ಸಮಾಜದಲ್ಲಿ ಮುಂದೆ ಬರಲು ಸಾಕಷ್ಟು ತಂದೆಯರು, ಪುರುಷರು ಸಾಕಷ್ಟು ಶ್ರಮಿಸುತ್ತಾರೆ . ಅವರ ಕೊಡುಗೆ ಸಾಕಷ್ಟಿದೆ, ಅದನ್ನು ನಾವು ಮರೆಯಬಾರದು” ಎಂದರು.

ಇದೇ ಸಂದರ್ಭದಲ್ಲಿ ತಮ್ಮ ಪತಿಯೊಂದಿಗಿನ ತಮ್ಮ ವೈವಾಹಿಕ ಜೀವನದ ಬಗ್ಗೆ ಮಾತನಾಡಿದ ಸುಧಾ ಮೂರ್ತಿ, ನಾವು ಇನ್ಫೋಸಿಸ್ ಸಂಸ್ಥೆ ಪ್ರಾರಂಭಿಸಿದ ನಂತರ ಸುಮಾರು 30 ವರ್ಷಗಳ ಕಾಲ ಬಿಡುವನ್ನೇ ಪಡೆದುಕೊಂಡಿಲ್ಲ.

ಏಕೆಂದರೆ, ನಾರಾಯಣ ಮೂರ್ತಿ ಅವರು ಸದಾ ಕಾಲ ಕೆಲಸ ಮಾಡುತ್ತಿದ್ದರು. ವರ್ಷದಲ್ಲಿ ಸುಮಾರು 200 ದಿನಗಳು ತಮ್ಮ ಬ್ಯುಸಿನೆಸ್ ನ ವಿಚಾರವಾಗಿ ದೇಶ-ವಿದೇಶ ಸುತ್ತುತ್ತಿದ್ದರು. ಆ ಸಮಯದಲ್ಲಿ ನಾನು ಅವರಿಂದ ಏನನ್ನು ನಿರೀಕ್ಷಿಸುತ್ತಿರಲಿಲ್ಲ.

ಅವರು ತಮ್ಮ ಉದ್ಯೋಗದಲ್ಲಿ ಬಹಳಷ್ಟು ಬ್ಯುಸಿ ಇದ್ದದ್ದರಿಂದ ಮನೆಯ ಕಡೆ ಗಮನ ಕೊಡಲಾಗುತ್ತಿರಲಿಲ್ಲ. ಮನೆ, ಮಕ್ಕಳ ವಿದ್ಯಾಭ್ಯಾಸ ಎಲ್ಲವನ್ನು ನಾನೇ ನಿಭಾಯಿಸಿದೆ.

ನಂತರ, ನನ್ನ ವೃತ್ತಿಜೀವನವನ್ನು ಮುಂದುವರೆಸಲು ನಾರಾಯಣ ಮೂರ್ತಿ ಸಾಕಷ್ಟು ಬೆಂಬಲ ಕೊಡುತ್ತೇನೆ ಎಂದಿದ್ದರು. ಹಾಗೆಯೇ ಪ್ರೋತ್ಸಾಹಿಸುತ್ತಲೂ ಇದ್ದಾರೆ. ಹಾಗಾಗಿ, ನನ್ನೆಲ್ಲಾ ಯಶಸ್ಸಿನ ಶ್ರೇಯ ಸಲ್ಲುವುದು ನನ್ನ ಜೀವನದಲ್ಲಿನ ಇಬ್ಬರು ಮುಖ್ಯ ವ್ಯಕ್ತಿಗಳಾದ ನನ್ನ ತಂದೆ ಹಾಗೂ ಪತಿಗೆ ಎಂದಿದ್ದಾರೆ.

ನಾನು ಸುಮಾರು 14 ರಾಷ್ಟ್ರೀಯ ವಿಪತ್ತುಗಳ ಪರಿಹಾರ ಕಾರ್ಯಕ್ರಮಗಳಿಗೆ ಸಹಾಯಹಸ್ತ ಚಾಚಿದ್ದೇನೆ. ಸುನಾಮಿ, ಕೋವಿಡ್ ನಂತಹ ಸಂದರ್ಭಗಳಲ್ಲಿ ನಾನು ಮನೆಯಲ್ಲೇ ಇರುತ್ತಿರಲಿಲ್ಲ. ಆಗೆಲ್ಲಾ ನಾರಾಯಣ ಮೂರ್ತಿ ಸಾಕಷ್ಟು ಬೆಂಬಲ ನೀಡಿದ್ದಾರೆ.

“ನಾನು ಇನ್ಫೋಸಿಸ್ ಸಂಸ್ಥೆಯನ್ನು ಕಟ್ಟಿ ಬೆಳೆಸುವಾಗ ಸುಧಾ ಸಾಕಷ್ಟು ಬೆಂಬಲ ನೀಡಿದ್ದಾರೆ. ಸಮಾಜಮುಖಿ ಕೆಲಸಗಳನ್ನು ಮಾಡುವುದು ಆಕೆಯ ಪ್ಯಾಷನ್. ಈಗ ನಾನು ಆಕೆಗೆ ಸಹಕರಿಸುತ್ತೇನೆ.” ಎಂದು ನಾರಾಯಣ ಮೂರ್ತಿ ಹೇಳುತ್ತಾರೆ ಎಂದು ಸುಧಾ ಕಾರ್ಯಕ್ರಮದಲ್ಲಿ ನೆನಪಿಸಿಕೊಂಡಿದ್ದಾರೆ.

ಸುಧಾ ನಾರಾಯಣ ಮೂರ್ತಿ ಮಾಹಿತಿ ಮತ್ತು ತಂತ್ರಜ್ಞಾನ ಕ್ಷೇತ್ರದ ಅಗ್ರಜನೆನಿಸಿಕೊಂಡಿರುವ ಇನ್ಫೋಸಿಸ್ ಸಂಸ್ಥೆಯ ಸ್ಥಾಪಕರಾಗಿದ್ದರೂ ಸಹ ತಮ್ಮನ್ನು ತಾವು ಸಮಾಜಮುಖಿ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಜೊತೆಗೆ, ಬರಹಗಾರ್ತಿಯಾಗಿಯೂ ಸಾಕಷ್ಟು ಹೆಸರು ಪಡೆದಿದ್ದಾರೆ.