Suhana Khan: ಬಣ್ಣದ ಲೋಕಕ್ಕೆ ಕಿಂಗ್​ ಖಾನ್​ ಮಗಳು ಎಂಟ್ರಿ - ಚಿತ್ರದ ಫಸ್ಟ್​ ಲುಕ್​ ನೋಡಿ ಭಾವುಕರಾದ ಶಾರುಖ್​

ಆರ್ಚಿ ಆ್ಯಂಡ್ರ್ಯೂಸ್  (Archie Andrews), ವೆರೋನಿಕಾ (Veronica) ಮತ್ತು ಬೆಟ್ಟಿ ಕಾಮಿಕ್ಸ್ ಪ್ರಿಯ(Comics Lovers)ರಿಗಂತೂ ಅವು ಅಚ್ಚುಮೆಚ್ಚಿನ ಪಾತ್ರಗಳು. ಇನ್ನು ಆರ್ಚಿ ಆ್ಯಂಡ್ರ್ಯೂಸ್ ಮತ್ತು ಸಂಗಡಿಗರ ಸಾಹಸಗಾಥೆಗಳಿಗೆ ಮಾರು ಹೋಗದ ಕಾಮಿಕ್ಸ್ ಪ್ರಿಯರೇ ಇಲ್ಲ. ಅದರ ಭಾರತೀಯ ಅವತರಣಿಕೆಯಲ್ಲಿ ಸುಹಾನಾ ಖಾನ್ ನಟಿಸಿದ್ದಾರೆ.

ಸುಹಾನಾ ಖಾನ್ ವೆರೋನಿಕಾ ಲಾಡ್ಜ್ ಆಗಿ ನಟಿಸುತ್ತಿದ್ದು, ನಡು ಬೈತಲೆ ತೆಗೆದಿರುವ ಕಪ್ಪು ಕೂದಲು ಮತ್ತು ವಿಭಿನ್ನ ಬಟ್ಟೆಯಲ್ಲಿ ಡಿಫರೆಂಟ್ ಆಗಿ ಕಾಣುತ್ತಿದ್ದಾರೆ.  ಇನ್ನು ಮಗಳ ಮೊದಲ ಚಿತ್ರ ಫಸ್ಟ್​ ಲುಕ್​ನಲ್ಲಿ ಭಾವುಕರಾಗಿರುವ ಖಾನ್​, ಸೋಷಿಯಲ್​ ಮೀಡಿಯಾದಲ್ಲಿ ಭಾವನಾತ್ಮಕವಾದ ಪೋಸ್ಟ್​ ಹಾಕಿದ್ದಾರೆ.

ತಮ್ಮ ಫೇಸ್ಬುಕ್ ಖಾತೆಯಲ್ಲಿ ಚಿತ್ರದ ಫಸ್ಟ್ ಲುಕ್ ಶೇರ್ ಮಾಡಿಕೊಂಡಿರುವ ಕಿಂಗ್ ಖಾನ್, ಸುಹಾನಾ, ನೀನು ಎಂದಿಗೂ ಪರಿಪೂರ್ಣವಾಗುವುದಿಲ್ಲ ಎಂಬುದನ್ನು ನೆನಪಿಟ್ಟುಕೊಂಡಿರು. ಆದರೆ, ನೀನು ನೀನಾಗುವ ಮೂಲಕ ಪರಿಪೂರ್ಣವಾಗುವುದರತ್ತ ಹೆಜ್ಜೆ ಹಾಕಬಹುದು. ನಟಿಯಾಗಿ ನಿನ್ನಲ್ಲಿ ದಯೆ ಇರಲಿ. ಶಿಳ್ಳೆ ಚಪ್ಪಾಳೆಗಳು ನಿನಗೆ ಸೇರಿದಲ್ಲ. ಪರದೆ ಮೇಲಿನ ನಿನ್ನ ಪಾತ್ರದ ಭಾಗ ಮಾತ್ರ ನಿನಗೆ ಸೇರುತ್ತದೆ ಎಂಬುದನ್ನ ಮರೆಯಬೇಡ ಎಂದು ಮಗಳಿಗೆ ಸಲಹೆ ನೀಡಿದ್ದಾರೆ.

ಅಲ್ಲದೇ, ನೀನು ಇಲ್ಲಿಯವರೆಗೂ ಬಹಳ ದೂರ ಬಂದಿದ್ದೀಯಾ. ಆದರೆ, ಜನರ ಹೃದಯಕ್ಕಿರುವ ದಾರಿಗೆ ಅಂತ್ಯವಿಲ್ಲ ಎಂಬುದು ಸಹ ಇಲ್ಲಿ ಮುಖ್ಯ. ಮುಂದೆ ಹೆಜ್ಜೆ ಇಡು, ನಿನ್ನಿಂದ ಸಾಧ್ಯವಾದಷ್ಟು ಜನರ ಮುಖದಲ್ಲಿ ನಗು ಮೂಡಿಸು. ಲೈಟ್ಸ್, ಕ್ಯಾಮರಾ, ಆಕ್ಷನ್ ಎಂದು ಬರೆದುಕೊಂಡಿದ್ದಾರೆ.

ತಂದೆ ಶಾರುಖ್ ಅವರ ಪೋಸ್ಟ್‌ಗೆ ಸುಹಾನಾ ಖಾನ್ ರಿಪ್ಲೈ ಮಾಡಿದ್ದು. ‘’ಲವ್ ಯೂ ಪಪ್ಪಾ’’ ಎಂದು ಕಾಮೆಂಟ್ ಮಾಡಿದ್ದಾರೆ. ಅದಕ್ಕೆ, ‘’ನಿನ್ನನ್ನ ಮಿಸ್ ಮಾಡಿಕೊಳ್ಳುತ್ತಿದ್ದೇನೆ. ಕೆಲಸದಿಂದ ಒಂದು ದಿನ ಬಿಡುವು ಮಾಡಿಕೊಂಡು ಬಂದು ನನ್ನನ್ನ ಅಪ್ಪಿಕೊಂಡು ಬಳಿಕ ವಾಪಸ್ ಹೋಗು’’ ಅಂತ ಶಾರುಖ್ ಖಾನ್ ಹೇಳಿದ್ದಾರೆ.

ದಿ ಆರ್ಚೀಸ್ ಬಗ್ಗೆ ಮಾತನಾಡಿರುವ ಶಾರುಖ್ ಝೋಯಾ ಅಖ್ತರ್ ತೆರೆಯ ಮೇಲೆ ತರುತ್ತಿರುವುದು ಸಂತೋಷದ ವಿಚಾರ. ಈ ಮೂಲಕ ಮೊದಲ ಪುಟ್ಟ ಹೆಜ್ಜೆಗಳನ್ನು ಇಡುತ್ತಿರುವ ಎಲ್ಲಾ ಮಕ್ಕಳಿಗೂ ಶುಭ ಹಾರೈಸುತ್ತೇನೆ’’ ಎಂದಿದ್ದಾರೆ.

ಈ  ಚಿತ್ರದ ಮೂಲಕ ಬಿಗ್​ ಬಿ  ಅಮಿತಾಭ್ ಬಚ್ಚನ್ ಹಾಗೂ ಜಯಾ ಬಚ್ಚನ್ ಅವರ ಮೊಮ್ಮಗ ಅಗಸ್ತ್ಯ ನಂದಾ ಮತ್ತು  ಎವರ್​ಗ್ರೀನ್​ ಸುಂದರಿ ಶ್ರೀದೇವಿ ಹಾಗೂ ಬೋನಿ ಕಪೂರ್ ಪುತ್ರಿ ಖುಷಿ ಕಪೂರ್ ಕೂಡ ಬಣ್ಣದ ಲೋಕಕ್ಕೆ ಪದಾರ್ಪಣೆ ಮಾಡುತ್ತಿದ್ದು, ಹಾಗಾಗಿ ಬಾಲಿವುಡ್​ನಲ್ಲಿ ಈ ಚಿತ್ರದ ಬಗ್ಗೆ ನಿರೀಕ್ಷೆ ತುಸು ಹೆಚ್ಚಿದೆ.

ಕಳೆದ ವರ್ಷ, ನಿರ್ದೇಶಕಿ ಜೋಯಾ ಅಖ್ತರ್ ಈ ಪ್ರಾಜೆಕ್ಟ್‌ನಲ್ಲಿ ತಾನು ಕೆಲಸ ಮಾಡುತ್ತಿರುವುದಾಗಿ, ತಮ್ಮ ಇನ್‍ಸ್ಟಾಗ್ರಾಂ ಖಾತೆಯಲ್ಲಿ ಪೋಸ್ಟ್ ಹಾಕುವ ಮೂಲಕ ಘೋಷಿಸಿಕೊಂಡಿದ್ದರು.

ಹಾಗಂತ ಜೋಯಾ ಒಬ್ಬರೇ ಇದನ್ನು ಮಾಡುತ್ತಿಲ್ಲ. ಜೋಯಾ ಅಖ್ತರ್, ರೀಮಾ ಕಾಗ್ಟಿ ಮತ್ತು ಶರದ್ ದೇವರಾಜನ್ ಅವರ ನಿರ್ಮಾಣ ಸಂಸ್ಥೆಗಳಾದ ಟೈಗರ್ ಬೇಬಿ ಮತ್ತು ಗ್ರಾಫಿಕ್ ಇಂಡಿಯಾದ ಅಡಿಯಲ್ಲಿ ಇದನ್ನು ನಿರ್ಮಿಸಲಾಗುತ್ತಿದೆ. ಇನ್ನು ಈ ಚಿತ್ರ 2023ರಲ್ಲಿ ನೆಟ್​ಪ್ಲಿಕ್ಸ್​ನಲ್ಲಿ ಬರಲಿದೆ.