Shah Rukh Khan: ಶಾರುಖ್-ವಿರಾಟ್ ಫ್ಯಾನ್ಸ್ ವಾರ್! ಯಾರು ಗ್ರೇಟ್ ಎಂದು ನೆಟ್ಟಿಗರ ಚರ್ಚೆ

ಸೆಲೆಬ್ರಿಟಿ ಫ್ಯಾನ್ಸ್ ವಾರ್ ಆರಂಭವಾಯಿತೆಂದರೆ ಒಮ್ಮೊಮ್ಮೆ ಅದು ವಿಕೋಪಕ್ಕೆ ತಿರುಗುತ್ತದೆ. ತಮ್ಮ ತಮ್ಮ ಫ್ಯಾನ್ಸ್‌ಗಳ ನಡುವಿನ ಜಗಳ ಅಸಲಿಗೆ ಆ ಸೆಲೆಬ್ರಿಟಿಗಳಿಗೆ ಅರಿವಿರುತ್ತದೆಯೋ ಇಲ್ಲವೋ ಆದರೆ ಫ್ಯಾನ್ಸ್ ವಾರ್ ಮಾತ್ರ ಸಾಮಾಜಿಕ ತಾಣಗಳಲ್ಲಿ ಭರ್ಜರಿಯಾಗಿಯೇ ನಡೆಯುತ್ತದೆ.

ಇದೀಗ ಶಾರುಖ್ ಖಾನ್ ಹಾಗೂ ವಿರಾಟ್ ಕೊಹ್ಲಿ ಫ್ಯಾನ್ಸ್ ನಡುವೆ ಕಲಹ ಏರ್ಪಟ್ಟಿದ್ದು ಟ್ವಿಟರ್ ವೇದಿಕೆಯಲ್ಲಿ ಇದೇ ಚರ್ಚೆ. ಐಪಿಎಲ್ ಸೀಸನ್ ಹತ್ತಿರವಾಗುತ್ತಿದ್ದಂತೆಯೇ ಎಸ್‌ಆರ್‌ಕೆ ಹಾಗೂ ಆರ್‌ಸಿಬಿ ನಡುವಿನ ಜಗಳ ವಿಕೋಪಕ್ಕೆ ಏರಿದ್ದು ಎರಡು ತಂಡಗಳ ನಡುವೆ ಮಾತುಗಳ ಪೈಪೋಟಿ ನಡೆಯುತ್ತಿದೆ.

ಎಸ್‌ಆರ್‌ಕೆ ಫ್ಯಾನ್ಸ್‌ ಐಪಿಎಲ್‌ನಲ್ಲಿ ಆರ್‌ಸಿಬಿಯ ಕಳಪೆ ಪ್ರದರ್ಶನ ನೋಡಿ ಹಿಗ್ಗಾಮುಗ್ಗಾ ಲೇವಡಿ ಮಾಡಿದ್ದರೆ. ಇನ್ನು ಕೊಹ್ಲಿ ಬೆಂಬಲಿಗರು ಕೂಡ ತಾವು ಕಡಿಮೆ ಇಲ್ಲ ಎಂಬಂತೆ ಶಾರುಖ್‌ಗಿಂತ ಕೊಹ್ಲಿ ಇನ್‌ಸ್ಟಾದಲ್ಲಿ ಅತ್ಯಧಿಕ ಫಾಲೋವರ್ಸ್ ಹೊಂದಿದ್ದಾರೆ ಎಂಬ ಬಾಣ ಬಿಟ್ಟಿದ್ದಾರೆ.

ಇಬ್ಬರಲ್ಲಿ ಯಾರು ಸಮರ್ಥರು ಅಥವಾ ಪ್ರತಿಭಾವಂತರು ಎಂಬುದನ್ನು ಲೆಕ್ಕಹಾಕುವುದು ಅಷ್ಟೊಂದು ಸುಲಭದ ಮಾತಾಗಿಲ್ಲದಿದ್ದರೂ ಫ್ಯಾನ್ಸ್‌ಗಳು ಮಾತ್ರ ಪರಸ್ಪರ ಹಿಗ್ಗಾಮುಗ್ಗಾ ತರಾಟೆಗೆ ತೆಗೆದುಕೊಂಡು ಯಾರು ಮೇಲೆ ಯಾರು ಕೀಳು ಎಂದು ಮಾತನಾಡುತ್ತಿದ್ದಾರೆ.

ತಮ್ಮ ತಮ್ಮ ಸೆಲೆಬ್ರಿಟಿಗಳು ಪೈಪೋಟಿಯಲ್ಲಿ ಗೆಲ್ಲಬೇಕೆಂಬ ಉತ್ಸಾಹದಲ್ಲಿ ತಮ್ಮದೇ ನೆಚ್ಚಿನ ನಟರ ಇಮೇಜ್ ಅನ್ನು ಫ್ಯಾನ್ಸ್‌ಗಳು ಹಾಳು ಮಾಡುತ್ತಿದ್ದಾರೆ ಎಂಬ ಕಿಂಚಿತ್ ಯೋಚನೆ ಕೂಡ ಮಾಡುತ್ತಿಲ್ಲ ಎಂಬುದು ವಿಷಾದನೀಯ. ವಿರಾಟ್‌ ಕ್ರಿಕೆಟ್ ಜೀವನ, ಅವರು ಮಾಡಿದ ಸಾಧನೆಗಳು ಅವರನ್ನು ಪ್ರಶಂಸಿಸರುವ ಇತರ ಕ್ರೀಡಾಳುಗಳ ಸ್ಕ್ರೀನ್‌ಶಾಟ್‌ಗಳನ್ನು ಟ್ವಿಟರ್‌ನಲ್ಲಿ ಹಂಚಿಕೊಂಡು ಫ್ಯಾನ್ಸ್‌ಗಳು ಗುದ್ದಾಡುತ್ತಿದ್ದರೆ ಇತ್ತ ಎಸ್‌ಆರ್‌ಕೆ ಫ್ಯಾನ್ಸ್ ಕೂಡ ನಮ್ಮ ನಟ ಯಾರಿಗೂ ಕಮ್ಮಿ ಇಲ್ಲ ಎಂಬ ಜೈಕಾರ ಹಾಕುತ್ತಿದ್ದಾರೆ.

ಶಾರುಖ್ ಖಾನ್ ಅವರ ಕೆಲವೊಂದು ಸಿನಿ ದೃಶ್ಯಗಳನ್ನು ಹೋಲಿಕೆ ಮಾಡಿರುವ ಎಸ್‌ಆರ್‌ಕೆ ಫ್ಯಾನ್ಸ್, ಇದು ವಿರಾಟ್ ವೃತ್ತಿಜೀವನದ ಸಾಧನೆಗಿಂತಲೂ ದೊಡ್ಡದು. ವಿರಾಟ್‌ ಶಾರುಖ್‌ರಷ್ಟು ಶ್ರೇಷ್ಟರಲ್ಲ ಖ್ಯಾತರಲ್ಲ ಎಂದು ಕಮೆಂಟ್ ಹಾಕಿದ್ದಾರೆ. ಇದಕ್ಕೆ ಸಮನಾಗಿ ವಿರಾಟ್ ಅಭಿಮಾನಿಗಳು ಕೂಡ ವಿರಾಟ್‌ ಸಾಧನೆಗಳನ್ನು ಬಣ್ಣಿಸಿ ಅವರನ್ನು ಹೊಗಳಿ ಅಟ್ಟಕ್ಕೇರಿಸಿದ್ದು, ಶಾರುಖ್ ವಿರಾಟ್‌ಗೆ ಸಮನಾಗಿರಲು ಸಾಧ್ಯವಿಲ್ಲ ಎಂದು ಕಮೆಂಟ್ ಮಾಡಿದ್ದಾರೆ.

ಇನ್ನು ಕೆಲವು ಅಭಿಮಾನಿಗಳು ಇಬ್ಬರೂ ದೇಶದ ಹೆಮ್ಮೆ ಎಂದು ಉಲ್ಲೇಖಿಸಿದ್ದು, ಇಂತಹ ಬಾಲಿಶವಾದ ಹೊಡೆದಾಟಗಳನ್ನು ನಿಲ್ಲಿಸಿ ಎಂದು ವಿನಂತಿಸಿಕೊಂಡಿದ್ದಾರೆ. ಆಯಾಯ ಕ್ರೀಡಾಪಟುಗಳು ಹಾಗೂ ಸೆಲೆಬ್ರಿಟಿಗಳು ತಮ್ಮ ತಮ್ಮ ಕ್ಷೇತ್ರದಲ್ಲಿ ಬೆಸ್ಟ್ ಎಂದೆನಿಸಿದ್ದಾರೆ. ಹಾಗಾಗಿ ನಮ್ಮ ನಮ್ಮೊಳಗೆ ಈ ಹೊಡೆದಾಟ ಸರಿಯಲ್ಲ ಎಂದು ಮತ್ತಷ್ಟು ಫ್ಯಾನ್ಸ್‌ ವಿನಂತಿಸಿಕೊಂಡಿದ್ದಾರೆ.

ಜಾಲತಾಣದಲ್ಲಿ ಫ್ಯಾನ್ಸ್ ವಾರ್ ನಡೆಯುತ್ತಿದ್ದರೂ ವಿರಾಟ್ ಹಾಗೂ ಶಾರುಖ್ ಹೆಚ್ಚು ತಲೆಕೆಡಿಸಿಕೊಂಡಂತೆ ಕಾಣುತ್ತಿಲ್ಲ. ಇಬ್ಬರೂ ತಮ್ಮ ತಮ್ಮ ಕ್ಷೇತ್ರದಲ್ಲಿ ಬ್ಯುಸಿಯಾಗಿರುವುದು ಕಂಡುಬಂದಿದೆ. ಇತ್ತೀಚೆಗೆ ಕೊಹ್ಲಿ ಹಾಗೂ ರವೀಂದ್ರ ಜಡೇಜಾ ಕ್ರಿಕೆಟ್ ಮೈದಾನದಲ್ಲಿಯೇ ಪಠಾಣ್ ಚಿತ್ರದ ಜೂಮೇ ಜೊ ಪಠಾಣ್ ಹಾಡಿಗೆ ಹೆಜ್ಜೆ ಹಾಕಿ ಡ್ಯಾನ್ಸ್ ಮಾಡಿದ್ದರು.

ಶಾರುಖ್ ಪ್ರತಿಯಾಗಿ ಟ್ವಿಟರ್‌ನಲ್ಲಿ ಕಮೆಂಟ್ ಮಾಡಿದ್ದು, ನನಗಿಂತ ಇವರಿಬ್ಬರೂ ಚೆನ್ನಾಗಿ ಡ್ಯಾನ್ಸ್ ಮಾಡುತ್ತಾರೆ. ನಾನು ವಿರಾಟ್ ಹಾಗೂ ಜಡೇಜಾರಿಂದ ನೃತ್ಯ ಕಲಿಯಬೇಕಿದೆ ಎಂದು ಬರೆದುಕೊಂಡಿದ್ದರು.