Shah Rukh Khan: ಬಾಹುಬಲಿ 2 ದಾಖಲೆ ಮುರಿದ ಪಠಾಣ್! ಬಾಲಿವುಡ್‌ಗೆ ಮತ್ತೆ ಶುಭಕಾಲ ಬಂತು ಅಂತಿದ್ದಾರೆ ಬಿಟೌನ್ ಮಂದಿ

4 ವರ್ಷಗಳ ಬಳಿಕ ಬಾಲಿವುಡ್ ಸ್ಟಾರ್ ಹೀರೋ ಶಾರುಖ್ ಖಾನ್ ಪಠಾಣ್ ಸಿನಿಮಾದ ಮೂಲಕ ಕಮ್ ಬ್ಯಾಕ್ ಮಾಡಿದ್ದಾರೆ. ಅದ್ಧೂರಿ ಆ್ಯಕ್ಷನ್ ಥ್ರಿಲ್ಲರ್ ಆಗಿ ಪ್ರೇಕ್ಷಕರ ಮುಂದೆ ಬಂದಿದ್ದಾರೆ. ಈ ಸಿನಿಮಾ ಬಾಕ್ಸ್ ಆಫೀಸ್ ನಲ್ಲಿ ದಾಖಲೆಗಳ ಸುನಾಮಿ ಸೃಷ್ಟಿಸಿದೆ. ಇದೀಗ ಬಾಹುಬಲಿ 2 ದಾಖಲೆ ಮುರಿದಿದೆ.

ಗಣರಾಜ್ಯೋತ್ಸವದ ಉಡುಗೊರೆಯಾಗಿ ಜನವರಿ 25 ರಂದು ಬಿಡುಗಡೆಯಾದ ಪಠಾಣ್ ಚಿತ್ರ ಒಂದು ತಿಂಗಳ ಕಾಲ ಕಲೆಕ್ಷನ್ ಮಾಡಿದೆ. ಇದು ಗಲ್ಲಾಪೆಟ್ಟಿಗೆಯಲ್ಲಿ ಬಂಪರ್ ಹಿಟ್ ಆಗಿತ್ತು ಮತ್ತು 37 ನೇ ದಿನಕ್ಕೆ ರೂ.75 ಲಕ್ಷ ಗಳಿಸಿತು. ನಿರ್ಮಾಪಕರಿಗೆ ಭರ್ಜರಿ ಲಾಭವನ್ನೇ ತಂದುಕೊಟ್ಟಿದೆ. ಇದರೊಂದಿಗೆ ಈ ಸಿನಿಮಾದ ಒಟ್ಟು ಕಲೆಕ್ಷನ್ 528.77 ಕೋಟಿ ತಲುಪಿದೆ.

ಈ ಮೂಲಕ ಪ್ರಭಾಸ್ ಅಭಿನಯದ ಬಾಹುಬಲಿ 2 ದಾಖಲೆ ಅಳಿಸಿ ಹೋಗಿದೆ. ಬಾಹುಬಲಿ 2 ಚಿತ್ರವು ದೇಶದಾದ್ಯಂತ ಸಂಚಲನ ಸೃಷ್ಟಿಸಿತ್ತು. ಬಾಲಿವುಡ್ ಅಂಗಳದಲ್ಲಿ ದೊಡ್ಡ ಯಶಸ್ಸನ್ನು ದಾಖಲಿಸಿತು. ಬಾಹುಬಲಿ ಹಿಂದಿ ವರ್ಸನ್  510 ಕೋಟಿ ರೂ. ಗಳಿಸುವ ಮೂಲಕ ಹೊಸ ದಾಖಲೆಯನ್ನು ಸೃಷ್ಟಿಸಿತ್ತು.

ಇದೀಗ ಶಾರುಖ್ ಖಾನ್ ಪಠಾಣ್ ಜೊತೆಗಿನ ಬಾಹುಬಲಿ ದಾಖಲೆಯನ್ನು ಅಳಿಸಿಹಾಕಿ ಹಿಂದಿ ಚಿತ್ರರಂಗದಲ್ಲಿ ಹೊಸ ಇತಿಹಾಸ ಬರೆದಿದೆ. ಹಿಂದಿಯಲ್ಲಿ ಬಾಹುಬಲಿ 510 ಕೋಟಿ, ಕೆಜಿಎಫ್ ಚಾಪ್ಟರ್-2 ಹಿಂದಿಯಲ್ಲಿ 435.33 ಕೋಟಿ, ದಂಗಲ್ 374.43 ಕೋಟಿ ಮತ್ತು ಪಠಾಣ್ ಚಿತ್ರ 528.77 ಕೋಟಿ ಗಳಿಸಿ ಇದೀಗ ಎಲ್ಲಾ ಸಿನಿಮಾಗಳ ದಾಖಲೆ ಮುರಿದಿದೆ.

ಬಿಡುಗಡೆಗೂ ಮುನ್ನವೇ ಹಲವು ವಿವಾದಗಳಲ್ಲಿ ಸಿಲುಕಿದ್ದ ಈ ಪಠಾಣ್ ಸಿನಿಮಾ ಬಿಡುಗಡೆಯಾದ ನಂತರ ಥಿಯೇಟರ್ ಗಳಲ್ಲಿ ಹವಾ ಎಬ್ಬಿಸಿತು. ಬಾಕ್ಸ್ ಆಫೀಸ್ ಧೂಳೆಬ್ಬಿಸುತ್ತಾ ಕಲೆಕ್ಷನ್ ಸುನಾಮಿ ಎಬ್ಬಿಸುತ್ತಿದೆ. ವಿಶ್ವದಾದ್ಯಂತ 7700 ಸ್ಕ್ರೀನ್ ಗಳಲ್ಲಿ ಬಿಡುಗಡೆಯಾಗಿದ್ದು, ಉತ್ತಮ ರೆಸ್ಪಾನ್ಸ್ ಸಿಕ್ಕಿದೆ.

ಸಿದ್ಧಾರ್ಥ್ ಆನಂದ್ ನಿರ್ದೇಶನದ ಈ ಚಿತ್ರವನ್ನು ಯಶ್ ರಾಜ್ ಫಿಲ್ಮ್ಸ್ ಬೃಹತ್ ಬಜೆಟ್​ನಲ್ಲಿ ನಿರ್ಮಿಸಿದೆ. ಶಾರುಖ್ ಜೊತೆಗೆ ಜಾನ್ ಅಬ್ರಹಾಂ ದೀಪಿಕಾ ಪಡುಕೋಣೆ ಕೂಡ ಕಾಣಿಸಿಕೊಂಡಿದ್ದು, ತೆರೆ ಮೇಲೆ ಆ್ಯಕ್ಷನ್ ಮೂಲಕ ಅಬ್ಬರಿಸಿದ್ರು.

ಸಿನಿಮಾಗಳಿಂದ ಕೊಂಚ ಬ್ರೇಕ್ ತೆಗೆದುಕೊಂಡಿದ್ದ ಶಾರುಖ್ ಖಾನ್ ಈಗ ಮತ್ತೆ ಎಂಟ್ರಿ ಕೊಟ್ಟಿದ್ದಾರೆ. ಪಠಾಣ್ ಚಿತ್ರದ ಮೂಲಕ ಬಿಗ್ ಸಕ್ಸಸ್ ಕಂಡ ಖುಷಿಯಲ್ಲಿ ಶಾರುಖ್ ಇದ್ದಾರೆ. ಈ ಚಿತ್ರದಲ್ಲಿ ಶಾರುಖ್ ಅಭಿನಯವೇ ಪ್ರಮುಖ ಆಕರ್ಷಣೆಯಾಗಿದೆ. ಕಲೆಕ್ಷನ್ ವಿಚಾರದಲ್ಲಿ ದಾಖಲೆಗಳು ಸೃಷ್ಠಿಯಾಗುತ್ತಿದ್ದಂತೆ ಮತ್ತೆ ಬಾಲಿವುಡ್ ಕಾಲ ಬಂದಾಯ್ತು ಅಂತಿದ್ದಾರೆ ಬಿ ಟೌನ್ ಪ್ರೇಕ್ಷಕರು.