Vinay Rajkumar: ಸಿಂಪಲ್ ಸುನಿ ಡೈರೆಕ್ಷನ್​ನಲ್ಲಿ ಬರ್ತಿದೆ ದೊಡ್ಮನೆ ಹುಡುಗನ ಒಂದು ಸರಳ ಪ್ರೇಮ ಕಥೆ

ಸ್ಯಾಂಡಲ್‌ವುಡ್‌ ಡೈರೆಕ್ಟರ್ ಸಿಂಪಲ್ ಸುನಿ ಒಳ್ಳೆ ಸಿನಿಮಾ ಮಾಡ್ತಾನೇ ಬಂದಿದ್ದಾರೆ. ಇವರ ನಿರ್ದೇಶನದ ಸಿಂಪಲ್ಲಾಗ್ ಒಂದ್ ಲವ್ ಸ್ಟೋರಿ ಚಿತ್ರ ಮಾರ್ಚ್-8ಕ್ಕೆ ಬರೋಬ್ಬರಿ ಹತ್ತು ವರ್ಷ ಪೂರ್ಣಗೊಳಿಸಿದೆ. ಈ ಒಂದು ಖುಷಿ ಒಂದು ಕಡೆಯಾದ್ರೆ, ಇದೇ ದಿನೇ ತಮ್ಮ ಮುಂದಿನ ಚಿತ್ರದ ಒಂದಷ್ಟು ಇಂಟ್ರಸ್ಟಿಂಗ್ ವಿಷಯವನ್ನ ಡೈರೆಕ್ಟರ್ ಸುನಿ ಅಧಿಕೃತವಾಗಿಯೇ ಈಗ ಹಂಚಿಕೊಂಡಿದ್ದಾರೆ.

ಸಿಂಪಲ್ ಸುನಿಯ ಮುಂದಿನ ಚಿತ್ರದ ಹೆಸರು ಒಂದು ಸರಳ ಪ್ರೇಮ ಕಥೆ ಅಂತಲೇ ಇದೆ. ಈ ಚಿತ್ರದ ಪೋಸ್ಟರ್‌ನ್ನ ಈಗ ರಿಲೀಸ್‌ ಮಾಡಲಾಗಿದೆ. ಚಿತ್ರದ ನಾಯಕ ಮತ್ತು ನಾಯಕಿಯ ಪರಿಚಯ ಈಗಾಗಲೇ ಆಗಿದೆ. ಆದರೆ ಚಿತ್ರದ ಬಗ್ಗೆ ಅವರಾರು ಎಲ್ಲೂ ಹೇಳಿಕೊಂಡಿರಲಿಲ್ಲ. ಈಗ ಸಿನಿಮಾ ಕುರಿತು ಮಾಹಿತಿ ಹಂಚಿಕೊಂಡಿದ್ದಾರೆ.

ಸಿಂಪಲ್ ಡೈರೆಕ್ಟರ್ ಸುನಿ ಶೀರ್ಷಿಕೆ ಬಗ್ಗೆ ಇರೋ ಒಂದು ಇಂಟ್ರಸ್ಟಿಂಗ್ ಕತೆ ಹೇಳಿಕೊಂಡಿದ್ದಾರೆ. ಹತ್ತು ವರ್ಷದ ಹಿಂದೆ ಬಂದಿದ್ದ ಸಿಂಪಲ್ಲಾಗ್ ಒಂದ್ ಲವ್ ಸ್ಟೋರಿಗೇನೆ ಈ ಟೈಟಲ್ ಇಡಬೇಕು ಅಂತಲೇ ಇತ್ತು. ಆದರೆ ಅದು ಆಗಲೇ ಇಲ್ಲ. ಹಾಗಾಗಿಯೇ ಒಂದು ಸರಳ ಪ್ರೇಮ ಕಥೆಯ ಟೈಟಲ್‌ನ್ನ ಅಂದಿನಿಂದಲೇ ರಿನಿವಲ್ ಮಾಡಿಸಿಕೊಂಡು ಬಂದಿದ್ದೇನೆ. ಈಗ ಆ ಟೈಟಲ್ ಈ ಚಿತ್ರಕ್ಕೆ ಇಟ್ಟಿದ್ದೇನೆ ಅಂತ ಹೇಳಿಕೊಂಡಿದ್ದಾರೆ.

ದೊಡ್ಮನೆ ಹುಡುಗ ವಿನಯ ರಾಜಕುಮಾರ್ ಈ ಮೂಲಕ ಮೊದಲ ಬಾರಿಗೆ ಸಂಗೀತ ನಿರ್ದೇಶಕನ ಪಾತ್ರ ಮಾಡುತ್ತಿದ್ದಾರೆ. ಅತಿಶಯ್ ಹೆಸರಿನ ರೋಲ್‌ನಲ್ಲಿಯೇ ಅಭಿನಯಿಸ್ತಿರೋ ವಿನಯ್ ಚಿತ್ರದ ಮೊದಲ ಹಂತದ ಚಿತ್ರೀಕರಣ ಮುಗಿಸಿದ್ದಾರೆ. ಡೈರೆಕ್ಟರ್ ಸಿಂಪಲ್ ಸುನಿ ಜೊತೆಗೆ ಚಿತ್ರ ಮಾಡಿರೋ ಖುಷಿಯಲ್ಲೂ ಇದ್ದಾರೆ.

ರೋಮ್ಯಾಂಟಿಕ್ ಮ್ಯೂಸಿಕ್ ಕಂಟೆಂಟ್ ಇರೋ ಒಂದು ಸರಳ ಪ್ರೇಮಕಥೆ ಚಿತ್ರದಲ್ಲಿ ಇಬ್ಬರು ನಾಯಕಿಯರು ಇದ್ದಾರೆ. ರಾಧಾ ಕೃಷ್ಣ ಧಾರವಾಹಿಯ ಮಲ್ಲಿಕಾ ಸಿಂಗ್ ಈ ಚಿತ್ರದಲ್ಲಿ ನಟಿಸಿದ್ದಾರೆ. ಸ್ವಾತಿಷ್ಠ ಕೃಷ್ಣನ್ ಕೂಡ ಈ ಚಿತ್ರದ ಮತ್ತೊಂದು ಪಾತ್ರದಲ್ಲಿ ಅಭಿನಯಿಸಿದ್ದಾರೆ.

ಸಿಂಪಲ್ ಸುನಿ ಈ ಮೂಲಕ ಹೊಸ ರೀತಿಯಲ್ಲಿ ಸರಳವಾದ ಒಂದು ಪ್ರೇಮ ಕಥೆಯನ್ನ ಹೇಳುತ್ತಿದ್ದಾರೆ. ಈಗಾಗಲೇ ಶೇಕಡ 50 ರಷ್ಟು ಚಿತ್ರೀಕರಣವನ್ನ ಕೂಡ ಪೂರ್ಣಗೊಳಿಸಿದ್ದಾರೆ. ಬೆಂಗಳೂರು, ಮೈಸೂರು, ಚಿಕ್ಕಪೇಟೆಯಲ್ಲಿ ಚಿತ್ರದ ಚಿತ್ರೀಕರಣ ಮಾಡಿದ್ದಾರೆ. ಪ್ರಸನ್ನ ಈ ಚಿತ್ರಕ್ಕೆ ಕಥೆ ಬರೆದಿದ್ದಾರೆ. ಅದೇ ಕಥೆಯನ್ನೆ ಡೈರೆಕ್ಟರ್ ಸುನಿ ಒಂದು ಸರಳ ಪ್ರೇಮಕಥೆ ಹೆಸರಿನಲ್ಲಿ ಸಿನಿಮಾ ಮಾಡುತ್ತಿದ್ದಾರೆ.

ಕನ್ನಡದ ಸಂಗೀತ ನಿರ್ದೇಶಕ ವೀರ್‌ ಸಮರ್ಥ ಚಿತ್ರಕ್ಕೆ ಸಂಗೀತ ನಿರ್ದೇಶನ ಮಾಡುತ್ತಿದ್ದಾರೆ. ಸಾಧು ಕೋಕಿಲಾ, ರಾಜೇಶ್ ನಟರಂಗ, ಅರುಣ್ ಬಾಲರಾಜ್ ಈ ಚಿತ್ರದಲ್ಲಿ ಅಭಿನಯಿಸಿದ್ದಾರೆ. ಜನವರಿ-23 ರಂದು ಚಿತ್ರಕ್ಕೆ ಮುಹೂರ್ತ ನಡೆದಿತ್ತು. ಈಗ ಸುನಿ ಮೊದಲ ಹಂತದ ಚಿತ್ರೀಕರಣ ಪೂರ್ಣಗೊಳಿಸಿದ್ದಾರೆ.