Rocking Star Yash: ಫ್ಯಾಮಿಲಿ ಜೊತೆ ಯಶ್ ಸುಗ್ಗಿ ಸಂಭ್ರಮ, ಹಳ್ಳಿ ಗೆಟಪ್‌ನಲ್ಲಿ ಟ್ರ್ಯಾಕ್ಟರ್ ಏರಿದ ರಾಕಿಭಾಯ್!

ಸ್ಯಾಂಡಲ್ವುಡ್ ನಟ ರಾಕಿಂಗ್ ಸ್ಟಾರ್ ಯಶ್ ಇಂದು ತಮ್ಮ ಕುಟುಂಬದೊಂದಿಗೆ ಮಕರ ಸಂಕ್ರಾಂತಿ ಹಬ್ಬವನ್ನು ಸಂಭ್ರಮದಿಂದ ಆಚರಿಸಿದ್ದಾರೆ. ಕೆಜಿಎಫ್ ಸಿನಿಮಾ ಮೂಲಕ ನ್ಯಾಷನಲ್ ಸ್ಟಾರ್ ಪಟ್ಟ ಅಲಂಕರಿಸಿರುವ ಯಶ್ ಎಷ್ಟೇ ಎತ್ತರಕ್ಕೆ ಬೆಳೆದರೂ ತಮ್ಮ ಆಚಾರ, ವಿಚಾರಗಳನ್ನು ಪಾಲಿಸಿಕೊಂಡೇ ಸಾಗುತ್ತಿದ್ದಾರೆ.

ಸದ್ಯ ಪ್ಯಾನ್​ ಇಂಡಿಯಾ ಸ್ಟಾರ್ ಆಗಿ ಮಿಂಚುತ್ತಿರುವ ಯಶ್​, ಇಂದು ಹಾಸನದಲ್ಲಿರುವ ತಮ್ಮ ಮನೆಯಲ್ಲಿ ಅಪ್ಪ, ಅಮ್ಮ, ಮಡದಿ, ಮಕ್ಕಳೊಂದಿಗೆ ಸಂಕ್ರಾಂತಿ ಹಬ್ಬವನ್ನು ಆಚರಿಸಿದ್ದಾರೆ. ಅಲ್ಲದೇ ಕುಟುಂಬದೊಂದಿಗೆ ಕಳೆದ ಸಂತಸ ಕ್ಷಣಗಳನ್ನು ರಾಕಿ ಬಾಯ್ ತಮ್ಮ ಇನ್​ಸ್ಟಾಗ್ರಾಮ್ ಖಾತೆಯಲ್ಲಿ ಶೇರ್ ಮಾಡಿಕೊಂಡಿದ್ದಾರೆ.

ಮೊದಲ ಫೋಟೋದಲ್ಲಿ ಯಶ್​ ತಮ್ಮ ತಂದೆ, ತಾಯಿ, ಪತ್ನಿ ರಾಧಿಕಾ ಮತ್ತು ಇಬ್ಬರು ಮಕ್ಕಳ ಜೊತೆಗೆ ಟ್ರಾಕ್ಟರ್​ನಲ್ಲಿ ಪ್ರಯಾಣಿಸಿದ್ದಾರೆ. ವಿಶೇಷವೆಂದರೆ ಈ ಟ್ರಾಕ್ಟರ್​ ಅನ್ನು ಯಶ್​ ತಂದೆ ಚಲಾಯಿಸಿರುವುದನ್ನು ಕಾಣಬಹುದಾಗಿದೆ.

ಮತ್ತೊಂದು ಫೋಟೋದಲ್ಲಿ ಯಶ್​ ಅವರ ಪ್ರೀತಿಯ ಮಗಳು ಐರಾ ತನ್ನ ತಾತನಿಗೆ ಸಂಕ್ರಾಂತಿ ಹಬ್ಬದ ಪ್ರಯುಕ್ತ  ಎಳ್ಳು, ಬೆಲ್ಲ ಹಂಚುತ್ತಿರುವುದನ್ನು (ಎಳ್ಳು ಬೀರುವುದು) ಕಾಣಬಹುದಾಗಿದೆ. ಸಾಮಾನ್ಯವಾಗಿ ಸಂಕ್ರಾಂತಿ ಹಬ್ಬದಂದು ಹೆಣ್ಣು ಮಕ್ಕಳು ಎಳ್ಳು ಬೀರುವುದು ವಿಶೇಷ. ಸದ್ಯ ವರ್ಷದ ಮೊದಲ ಹಬ್ಬದಂದೇ ಐರಾ ಯಶ್, ರಾಧಿಕಾಗೆ ಎಳ್ಳು ಬೆಲ್ಲ ನೀಡುವ ಮೂಲಕ ಹಬ್ಬಕ್ಕೆ ಮತ್ತಷ್ಟು ರಂಗು ತುಂಬಿದ್ದಾರೆ ಎಂದೇ ಹೇಳಬಹುದು.

ಇನ್ನೊಂದು ಪೋಟೋದಲ್ಲಿ ಐರಾ ಮತ್ತು ಯಥರ್ವ್​ ಯಶ್ ತಾಯಿಯೊಂದಿಗೆ ಹಿಟ್ಟಿನಲ್ಲಿ ಆಟವಾಡುತ್ತಾ ಸಮಯ ಕಳೆಯುತ್ತಿರುವುದನ್ನು ಕಾಣಬಹುದು ಮತ್ತು ನಾಲ್ಕನೇ ಫೋಟೋದಲ್ಲಿ ಯಶ್ ತಂದೆ, ತಾಯಿ, ರಾಧಿಕಾ ಮತ್ತು ಯಶ್ ತಟ್ಟೆ ಹಿಡಿದು ಆರತಿ ಮಾಡಿದ್ದಾರೆ.

ಈ ಎಲ್ಲಾ ಫೋಟೋಗಳನ್ನು ಹಂಚಿಕೊಳ್ಳುವುದರ ಜೊತೆಗೆ, ಈ ಸುಗ್ಗಿ ಹಬ್ಬವು ನಿಮಗೆ ಆರೋಗ್ಯ, ಸಂತೋಷ ಮತ್ತು ಸಮೃದ್ಧಿಯನ್ನು ತರಲಿ. ಎಲ್ಲರಿಗೂ ಮಕರ ಸಂಕ್ರಾಂತಿ, ಪೊಂಗಲ್, ಉತ್ತರಾಯಣ, ಮಾಘ ಬಿಹು ಹಬ್ಬದ ಶುಭಾಶಯಗಳು ಎಂದು ಶೀರ್ಷಿಕೆಯಲ್ಲಿ ಬರೆದುಕೊಳ್ಳುವ ಮೂಲಕ ಯಶ್ ಅಭಿಮಾನಿಗಳಿಗೆ ಶುಭ ಕೋರಿದ್ದಾರೆ.

ಎಷ್ಟೇ ದೊಡ್ಡ ಸ್ಟಾರ್ ಆದರೂ ಯಶ್ ತಾವೊಬ್ಬರು ಸರಳ ವ್ಯಕ್ತಿ ಎಂಬುವುದನ್ನು ಪದೇ ಪದೇ ಸಾಬೀತು ಪಡಿಸುತ್ತಿದ್ದಾರೆ. ಇದಕ್ಕೆ ಸಾಕ್ಷಿ ಹಳ್ಳಿಯಲ್ಲಿಂದು ಯಶ್​ ಬಹಳ ಸರಳವಾಗಿ ಫ್ಯಾಮಿಲಿಯೊಂದಿಗೆ ಸುಗ್ಗಿ ಹಬ್ಬ ಆಚರಿಸಿದ್ದಾರೆ. ಭಾರತಾದ್ಯಂತ ದೊಡ್ಡ ನಟರಾಗಿ ಯಶ್ ಮಿಂಚುತ್ತಿದ್ದರೂ, ಕನ್ನಡ ಭಾಷೆ, ಸಂಸ್ಕೃತಿ, ಪರಂಪರೆ ಬಗ್ಗೆ ವಿಶೇಷ ಅಭಿಮಾನ ಹೊಂದಿರುವುದು  ​ನಿಜಕ್ಕೂ ಹೆಮ್ಮೆಯ ವಿಚಾರ.

ಇಷ್ಟಲ್ಲದೇ ಯಶ್ ಎಂದಿಗೂ​ ತಮ್ಮ ಫ್ಯಾಮಿಲಿಗೆ ಟೈಂ ಕೊಡುವುದನ್ನು ಮಿಸ್ ಮಾಡಿಲ್ಲ. ತಮ್ಮ ಬ್ಯುಸಿ ಶೆಡ್ಯೂಲ್​ಗಳ ನಡುವೆ ಫ್ಯಾಮಿಲಿಯೊಂದಿಗೆ ಡಿನ್ನರ್, ಔಟಿಂಗ್, ಟ್ರಿಪ್​ ಹೀಗೆ ಹೊರಗೆ ಹೋಗುವ ಮೂಲಕ ಪಕ್ಕಾ ಫ್ಯಾಮಿಲಿ ಮ್ಯಾನ್ ಆಗಿದ್ದಾರೆ ಅಂತನೇ ಹೇಳಬಹುದು.