Samantha: ಮಯೋಸಿಟಿಸ್ ಜೊತೆ ಸಮಂತಾರನ್ನು ಕಾಡ್ತಿದ್ಯಾ ಮರೆವಿನ ಕಾಯಿಲೆ?

ಟಾಲಿವುಡ್​ನ ಖ್ಯಾತ ನಟಿ ಸಮಂತಾ ರುತ್ ಪ್ರಭು ಅವರು ತಮ್ಮ ಮುಂಬರುವ ಸಿನಿಮಾ ಶಾಕುಂತಲಂನ ಬಿಡುಗಡೆಯ ನಿರೀಕ್ಷೆಯಲ್ಲಿದ್ದಾರೆ. ಈ ಸಿನಿಮಾದಲ್ಲಿ ಸಮಂತಾ ರುತ್ ಪ್ರಭು ಟೈಟಲ್ ಪಾತ್ರದಲ್ಲಿಯೇ ಕಾಣಿಸಿಕೊಂಡಿದ್ದಾರೆ.

ಫ್ಯಾಮಿಲಿ ಮ್ಯಾನ್ 2 ಮೂಲಕ ಒಟಿಟಿಗೆ ಕಾಲಿಟ್ಟಿದ್ದ ಸಮಂತಾ ಅವರು ಮೊದಲ ಸಿನಿಮಾದಲ್ಲಿಯೇ ಭರ್ಜರಿಯಾಗಿ ಸೌಂಡ್ ಮಾಡಿದ್ದರು. ಇದೀಗ ನಟಿ ಸಿಟೆಡಾಲ್​ನಲ್ಲಿ ಬಾಲಿವುಡ್ ನಟ ವರುಣ್ ಧವನ್ ಜೊತೆ ಕಾಣಿಸಿಕೊಳ್ಳಲಿದ್ದಾರೆ.

ನಟಿಗೆ ಸಿಟೆಡಾಲ್ ಸೆಟ್​ನಲ್ಲಿ ಎಲ್ಲರ ಹೆಸರುಗಳೂ ಮರೆತುಹೋಗುತ್ತಿದ್ದವು ಎನ್ನುವುದನ್ನು ನಟಿ ರಿವೀಲ್ ಮಾಡಿದ್ದಾರೆ. ಮಯೋಸಿಟಿಸ್ ಎಂಬ ಕಾಯಿಲೆಯಿಂದ ಬಳಲುತ್ತಿರುವ ಸಮಂತಾ ಅವರು ಈಗ ತಮಗೆ ಇದೇ ಮೊದಲ ಬಾರಿ ಈ ರೀತಿ ಹೆಸರುಗಳನ್ನು ಮರೆತ ಅನುಭವಾಯಿತು ಎಂದಿದ್ದಾರೆ.

ನಟಿ ಸದ್ಯ ತಮ್ಮ ಸಿನಿಮಾ ಶಾಕುಂತಲಂನ ಪ್ರಮೋಷನ್ ಕೆಲಸಗಳಲ್ಲಿ ಬ್ಯುಸಿಯಾಗಿದ್ದಾರೆ. ಮಿಸ್ ಮಾಲಿನಿ ಜೊತೆ ಮಾತನಾಡುವ ವೇಳೆ ಸಮಂತಾ ಹಲವು ವಿಚಾರಗಳನ್ನು ರಿವೀಲ್ ಮಾಡಿದ್ದಾರೆ. ಸಿಟೆಡಾಲ್ ಶೂಟಿಂಗ್​ನ ವೇಳೆ ಗಾಯವಾಗಿದ್ದಾಗಿಯೂ ನಟಿ ತಿಳಿಸಿದ್ದಾರೆ.

ಎರಡರಿಂದ ಮೂರು ಗಂಟೆಗಳ ಕಾಲ ನಾನು ಸೆಟ್​ನಲ್ಲಿದ್ದವರ ಹೆಸರುಗಳನ್ನೇ ಮರೆತಿದ್ದೆ. ನಾನು ಯಾರದು, ಒಂದು ನಿಮಿಷ, ಮೊಬೈಲ್​ನಲ್ಲಿ ಚೆಕ್ ಮಾಡುತ್ತೇನೆ ಎಂದು ಫೋನ್ ಚೆಕ್ ಮಾಡುತ್ತಿದ್ದೆ. ಈ ರೀತಿ ಹಿಂದೆಂದೂ ಆಗಿರಲಿಲ್ಲ ಎಂದಿದ್ದಾರೆ ನಟಿ.

ಸಮಂತಾ ರುತ್ ಪ್ರಭು ಅವರು ಪುಷ್ಪಾ ಸಿನಿಮಾದಲ್ಲಿ ಸ್ಪೆಷಲ್ ಸಾಂಗ್ ಮಾಡಿ ಸಿಕ್ಕಾಪಟ್ಟೆ ಫೇಮಸ್ ಆದರು. ಅಲ್ಲು ಅರ್ಜುನ್ ಹಾಗೂ ಸಮಂತಾ ಅವರ ಡ್ಯಾನ್ಸ್ ಸಖತ್ ಸೌಂಡ್ ಮಾಡಿತ್ತು.

ಸಮಂತಾ ಅವರು ವಿಜಯ್ ದೇವರಕೊಂಡ ಜೊತೆ ಖುಷಿ ಸಿನಿಮಾದಲ್ಲಿಯೂ ಕಾಣಿಸಿಕೊಳ್ಳಲಿದ್ದಾರೆ. ಇದರ ಪೋಸ್ಟರ್ ಕೂಡಾ ಈಗಾಗಲೇ ವೈರಲ್ ಆಗಿದೆ. ಆದರೆ ಸಮಂತಾ ಅನಾರೋಗ್ಯದ ಕಾರಣ ಶೂಟಿಂಗ್​​ಗೆ ಬ್ರೇಕ್ ಬಿದ್ದಿತ್ತು.