Salman Khan: ಕ್ಯಾಬ್​ಗೆ ಹಣ ಕೊಡದೆ ಹೋದ ಸಲ್ಮಾನ್ ಖಾನ್! ಹಲವು ವರ್ಷದ ನಂತ್ರ ಬಡ್ಡಿ ಸೇರಿಸಿ ಕೊಟ್ಟಿದ್ದೆಷ್ಟು ಗೊತ್ತಾ?

ಬಾಲಿವುಡ್ ಸ್ಟಾರ್ ನಟ ಸಲ್ಮಾನ್ ಖಾನ್ ಅವರು ತಮ್ಮ ಮುಂದಿನ ಸಿನಿಮಾ ಕಿಸಿ ಕಾ ಭಾಯ್, ಕಿಸಿ ಕಿ ಜಾನ್ ಪ್ರಚಾರದಲ್ಲಿ ಬ್ಯುಸಿಯಾಗಿದ್ದಾರೆ. ಸಿನಿಮಾ ಏಪ್ರಿಲ್ 21ರಂದು ರಿಲೀಸ್ ಆಗಲಿದೆ. ಈದ್ ಸಂದರ್ಭ ಸಲ್ಮಾನ್ ಖಾನ್ ಅವರ ಅದ್ಧೂರಿ ಸಿನಿಮಾ ತೆರೆಗಪ್ಪಳಿಸಲಿದೆ. ಈದ್​ ದಿನ ಸಿನಿಮಾ ರಿಲೀಸ್ ಮಾಡುವ ಸಲ್ಮಾನ್ ಖಾನ್ ಪದ್ಧತಿ 2009ರಲ್ಲಿ ಶುರುವಾಯಿತು.

ಮೈನೆ ಪ್ಯಾರ್ ಕಿಯಾ(1989) ಸಿನಿಮಾದಲ್ಲಿ ನಟಿಸಿ ಹಿಟ್ ಆಗುವ ಮೊದಲು ನಡೆದ ಘಟನೆಯೊಂದರ ಬಗ್ಗೆ ಸಲ್ಮಾನ್ ಖಾನ್ ಮಾತನಾಡಿದ್ದಾರೆ. ಒಂದು ಕ್ಯಾಬ್​ಗೆ ಪೇ ಮಾಡುವುದಕ್ಕೂ ನನ್ನಲ್ಲಿ ಹಣವಿಲ್ಲದ ಕಾಲವಿತ್ತು ಎನ್ನುವುದನ್ನು ನಟ ರಿವೀಲ್ ಮಾಡಿದ್ದಾರೆ. ತನ್ನ ಕಾಲೇಜ್ ದಿನಗಳಲ್ಲಿ ಕ್ಯಾಬ್ ಡ್ರೈವರ್​ಗೆ ಹೇಗೆ ಮೋಸ ಮಾಡಿದ್ದೆ ಎನ್ನುವುದನ್ನು ನಟ ತಿಳಿಸಿದ್ದಾರೆ.

ಸ್ಕ್ರೀನ್ ರೈಟರ್ ಆಗಿದ್ದ ಸಲೀಮ್ ಖಾನ್ ಹಾಗೂ ಅವರ ಪತ್ನಿ ಸಲ್ಮಾ ಖಾನ್ ಅವರ ಹಿರಿಯ ಮಗ ಸಲ್ಮಾನ್ ಖಾನ್. ಅವರಿಗೆ ಇಬ್ಬರು ಸಹೋದರರು ಅರ್ಬಾಜ್ ಖಾನ್ ಹಾಗೂ ಸೋಹೈಲ್ ಖಾನ್. ಇಬ್ಬರು ಸಹೋದರಿಯರು ಅಲ್ವಿರಾ ಅಗ್ನಿಹೋತ್ರಿ ಹಾಗೂ ಅರ್ಪಿತಾ ಖಾನ್.

ಸಲೀಂ ಖಾನ್ ಅವರು ಜಾವೇದ್ ಅಖ್ತರ್ ಜೊತೆ ಒಡಕಿನ ನಂತರ ಸ್ವಲ್ಪ ಕಷ್ಟಕಾಲ ಅನುಭವಿಸಿದರು. ಸೋಲೂ ರೈಟರ್ ಆಗಿ ಸಂಪಾದಿಸುವುದು ಅಷ್ಟು ಸುಲಭವಾಗಿರಲಿಲ್ಲ. ಹಾಗಾಗಿ ಖಾನ್ ಕುಟುಂಬದಲ್ಲಿ ಹಣಕ್ಕೆ ಕಷ್ಟವಿತ್ತು. ಹಣವಿಲ್ಲದೆ ತೊಂದರೆ ಅನುಭವಿಸುತ್ತಿದ್ದರು.

ತನ್ನ ಸಿನಿಮಾವನ್ನು ಟಿವಿ ಶೋ ಒಂದರಲ್ಲಿ ಪ್ರಮೋಟ್ ಮಾಡುವ ಸಂದರ್ಭ ತನ್ನ ಕ್ಯಾಬ್​ಗೆ ಹಣ ಕೊಡದೆ ಹೋಗಿದ್ದನ್ನು ಸಲ್ಮಾನ್ ಖಾನ್ ನೆನಪಿಸಿಕೊಂಡಿದ್ದಾರೆ. ನಾವು ಕಾಲೇಜು ಹೋಗುವಾಗ ಟ್ರೈನ್​ನಲ್ಲಿ ಹೋಗುತ್ತಿದ್ದೆವು. ಕೆಲವೊಮ್ಮೆ ಸ್ವಲ್ಪ ಆರಾಮವಾಗಿ ಹೋಗು ಎಂದೆನಿಸುತ್ತಿತ್ತು.

ಹಾಗಾಗಿ ಒಂದು ದಿನ ಟ್ಯಾಕ್ಸಿಯಲ್ಲಿ ಹೋಗೋಣ ಅನಿಸಿತು. ಆದರೆ ಆಗ ನನ್ನ ಬಳಿ ಚಿಲ್ಲರೆ ಹಣವೂ ಇರಲಿಲ್ಲ. ನಾನು ಕಾಲೇಜಿಗಿಂತ ಸ್ವಲ್ಪ ಮೊದಲೇ ಕ್ಯಾಬ್ ನಿಲ್ಲಲು ಹೇಳಿದೆ. ನಾನು ಹೋಗಿ ಹಣ ತರುತ್ತೇನೆ ಎಂದು ಹೇಳಿ ಹೋಗಿ ಮತ್ತೆ ಬರಲೇ ಇಲ್ಲ ಎಂದು ನೆನಪಿಸಿಕೊಂಡಿದ್ದಾರೆ. ನಟ ಮುಂಬೈನ ಸೇಂಟ್ ಕ್ಸೇವಿಯರ್ ಕಾಲೇಜಿನಲ್ಲಿ ಓದುತ್ತಿದ್ದರು. ನಂತರ ಶಿಕ್ಷಣ ಮೊಟಕುಗೊಳಿಸಿದರು.

ನಂತರ ಮಾಡೆಲಿಂಗ್ ಆರಂಭಿಸಿದೆ. ಹಾಗಾಗಿ ಸ್ವಲ್ಪ ಚೆನ್ನಾಗಿಯೇ ಸಂಪಾದಿಸಲು ಶುರು ಮಾಡಿದೆ. ಒಮ್ಮೆ ನಾನು ಟ್ಯಾಕ್ಸಿಯಲ್ಲಿ ಮನೆಗೆ ಬರಲು ನಿರ್ಧರಿಸಿದ್ದೆ. ಆಗ ಟ್ಯಾಕ್ಸಿ ಹತ್ತಿದೆ. ದಾರಿಯಲ್ಲಿ ಹೋಗುತ್ತಲೇ ಡ್ರೈವರ್ ನಿಮ್ಮನ್ನು ಎಲ್ಲಿಯೋ ನೋಡಿದ್ದೇನೆ ಎಂದು ಹೇಳುತ್ತಲೇ ಇದ್ದ.

ಮನೆ ತಲುಪಿದಾಗ ನಾನು ಮೇಲೆ ಹೋಗಿ ಹಣ ತರುತ್ತೇನೆ ಎಂದೆ. ಆಗ ಆತ ಸ್ವಲ್ಪ ಹೊತ್ತು ನನ್ನನ್ನೇ ನೋಡಿನಿಂತ. ನಂತರ ನಾವಿಬ್ಬರೂ ಜೋರಾಗಿ ನಗಲಾರಂಭಿಸಿದೆವು. ಆದರೆ ಈ ಸಲ ನಾನು ಅವನ ಹಣವನ್ನು ಪಾವತಿಸಿದೆ. ಬಡ್ಡಿ ಸಮೇತ ಹಣವನ್ನು ಕೊಟ್ಟೆ ಎಂದಿದ್ದಾರೆ.