Rocking Star Yash: ತೆಲುಗಿನಲ್ಲಿ ಯಶ್​ ಅಭಿನಯದ ಲಕ್ಕಿ ಚಿತ್ರ - ಬರೋಬ್ಬರಿ 10 ವರ್ಷದ ನಂತರ ಡಬ್​ ಆಯ್ತು ಸಿನಿಮಾ

ಕೆಜಿಎಫ್​ 2 ಚಿತ್ರದ ನಂತರ ರಾಕಿಂಗ್ ಸ್ಟಾರ್​ ಯಶ್​ ಬೇಡಿಕೆ ಹೆಚ್ಚಾಗಿದೆ. ಎಲ್ಲಾ ಭಾಷೆಗಳಲ್ಲಿ ಜನರು ಅವರನ್ನು ಇಷ್ಟಪಡುತ್ತಿದ್ದಾರೆ. ಹಾಗೆಯೇ ಅವರ ಹಳೆಯ ಚಿತ್ರಗಳನ್ನು ಸಹ ನೊಡಲು ಬಯಸುತ್ತಿದ್ದಾರೆ. ಅದಕ್ಕೆ ಉದಾಹರಣೆ ಎಂದರೆ ಈ ಲಕ್ಕಿ ಚಿತ್ರ.

ಬಿಡುಗಡೆಯಾಗಿ ಸುಮಾರು ಹತ್ತು ವರ್ಷಗಳ ನಂತರ ತೆಲುಗಿಗೆ ಈ ಚಿತ್ರ ಡಬ್​ ಆಗುತ್ತಿದ್ದು, ಈಗಾಗಲೇ ಡಬ್​ ಆಗಿ, ಸೆನ್ಸಾರ್​ ಆಗಿ ಬಿಡುಗಡೆಗೆ ಸಜ್ಜಾಗಿ ಕುಳಿತಿದೆ, ಆದರೆ ಇನ್ನೂ ಬಿಡುಗಡೆ ಯಾವಾಗ ಎಂಬುದು ಅಧಿಕೃತವಾಗಿಲ್ಲ.

ಯಶ್​ ಮತ್ತು ಸ್ಯಾಂಡಲ್​ ವುಡ್​ ಕ್ವೀನ್​ ರಮ್ಯಾ ಅಭಿನಯದ ಮೊದಲ ಚಿತ್ರ ಇದಾಗಿದ್ದು, ಪ್ರೇಮ ಕಥೆಯಲ್ಲಿ ನಾಯಿಯೇ ಪ್ರಮುಖ ಪಾತ್ರವಹಿಸುತ್ತದೆ. ಈ ವಿಭಿನ್ನ ಕಥೆಯಲ್ಲಿ ಯಶ್​ ಅಭಿನಯ ಜನರ ಮೆಚ್ಚುಗೆಗೆ ಪಾತ್ರವಾಗಿತ್ತು.

ಈ ಚಿತ್ರದಲ್ಲಿ ನಾಯಕಿಯನ್ನು ಇಂಪ್ರೆಸ್​ ಮಾಡಲು ಯಶ್​ ಮಾಡುವ ಸಾಹಸಗಳು ಹಲವಾರು. ವಿಭಿನ್ನ ವೇಷದಲ್ಲಿ ಕಾಣಿಸಿಕೊಂಡು, ಆಕೆಯನ್ನು ಬೀಳಿಸಿಕೊಳ್ಳಲು ಪ್ರಯತ್ನ ಮಾಡುತ್ತಾರೆ.

ಡಾ. ಸೂರಿ ನಿರ್ದೇಶನ ಮಾಡಿದ್ದ ಈ ಸಿನಿಮಾವನ್ನು ರಾಧಿಕಾ ಕುಮಾರಸ್ವಾಮಿ ನಿರ್ಮಾಣ ಮಾಡಿದ್ದರು. ಇನ್ನು ಯಶ್​ ಜೊತೆ ಗೆಳೆಯನಾಗಿ ನಟ ಶರಣ್ ಕೂಡ ಕಾಮಿಡಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು.

ಇದೊಂದೇ ಚಿತ್ರವಲ್ಲದೇ ಯಶ್​ ಅಭಿನಯದ ಹಳೆಯ ಚಿತ್ರಗಳನ್ನು ಡಬ್​ ಮಾಡಿ ಬಿಡಿಗಡೆ ಮಾಡಲು ಹಲವಾರು ನಿರ್ಮಾಪಕರು ಸಿದ್ದರಿದ್ದು, ಯಶ್​ ಚಿತ್ರಗಳಿಗೆ ಎಲ್ಲಾ ಭಾಷೆಯಲ್ಲಿ ಬೇಡಿಕೆ ಹೆಚ್ಚಾಗುತ್ತಿದೆ ಎಂದರೆ ತಪ್ಪಲ್ಲ.

ಸದ್ಯ ಕೆಜಿಎಫ್​ 2 ಯಶಸ್ಸಿನಲ್ಲಿರುವ ಯಶ್​ ಮುಂದಿನ ಚಿತ್ರಗಳಿಗೆ ಸಹ ಸಜ್ಜಾಗುತ್ತಿದ್ದಾರೆ. ಜೂನ್​ನಲ್ಲಿ ಅವರ ಹೊಸ ಚಿತ್ರದ ಬಗ್ಗೆ ಅಪ್​ಡೇಟ್​ ಸಿಗಲಿದೆ ಎಂದು ಹೇಳಲಾಗುತ್ತಿದೆ. ಅಲ್ಲದೇ ಕೆಜಿಎಫ್​ 3 ಸಹ ಬರಲಿದೆ ಎಂದು ಚಿತ್ರತಂಡ ತಿಳಿಸಿದೆ.

ಒಟ್ಟಾರೆಯಾಗಿ ಕನ್ನಡದ ನಟನೊಬ್ಬ ಪ್ಯಾನ್​ ಇಂಡಿಯಾ ಸ್ಟಾರ್​ ಆಗಿ, ಜನರ ಮೆಚ್ಚುಗೆಗೆ ಪಾತ್ರವಾಗಿರುವುದು ನಿಜಕ್ಕೂ ಹೆಮ್ಮೆಯ ಸಂಗತಿ.