ಭಾರತ-ಚೀನಾ ಗಡಿಯಲ್ಲಿ ರವಿಚಂದ್ರನ್ ಪುತ್ರ ತ್ರಿ'ವಿಕ್ರಮ'ನ ಪರಾಕ್ರಮ..!

ಕನಸುಗಾರ ರವಿಚಂದ್ರನ್ ಎರಡನೇ‌ ಪುತ್ರ ವಿಕ್ರಂ ರವಿಚಂದ್ರನ್ ಬೆಳ್ಳಿತೆರೆಗೆ ಎಂಟ್ರಿ ಕೊಡಲು ರೆಡಿಯಾಗಿ ನಿಂತಿದ್ದಾರೆ. ಕೊರೋನಾ ಇಲ್ಲದೇ ಇದ್ದಿದ್ರೆ ಇಷ್ಟೊತ್ತಿಗಾಗ್ಲೆ ಮರಿ ರವಿಚಂದ್ರನ್ ಹೀರೋ ಆಗಿ ಅಬ್ಬರಿಸುತ್ತಿದ್ದರು. ಆದರೆ ಚಿತ್ರತಂಡದ ಎಲ್ಲಾ ಲೆಕ್ಕಚಾರಗಳನ್ನು ತಲೆಕೆಳಗಾಗಿಸಿದ್ದು ಕೊರೋನಾ ಮಹಾಮಾರಿ.

ಸಿನಿಮಾ ಬಿಡುಗಡೆ ಆಗೋ ಮೊದಲೇ ಸ್ಯಾಂಡಲ್ ವುಡ್ ನಲ್ಲಿ ಈ ಹುಡುಗ ಮಾಸ್ ಹೀರೋ ಆಗಿ ನಿಲ್ಲಲಿದ್ದಾನೆ ಎಂಬ ಮಾತುಗಳು ಸ್ಟಾರ್ ಹೀರೋಗಳು, ನಿರ್ದೇಶಕರಿಂದ ಕೇಳಿ ಬರುತ್ತಿದೆ. ಯಾಕೆಂದರೆ ವಿಕ್ಕಿ ಅಭಿನಯಿಸುತ್ತಿರೋ 'ತ್ರಿವಿಕ್ರಮ' ಸಿನಿಮಾದ ಫಸ್ ಲುಕ್​ನಲ್ಲಿ ಒಬ್ಬ ಮಾಸ್, ಲವರ್ ಬಾಯ್ ಇಮೇಜ್​ ಎರಡೂ ಕೂಡ ಎದ್ದು ಕಾಣುತ್ತಿದೆ. ಇದರ ಜೊತೆಗೆ ವಿಕ್ರಂಗೆ ಅಭಿನಯದ ಸ್ಕಿಲ್ ತಂದೆಯಿಂದ ಕರಗತವಾಗಿ ಬಂದಿದೆ.

ವಿಕ್ರಂ ರವಿಚಂದ್ರನ್ ಟ್ಯಾಲೆಂಟ್ ಏನು ಎಂಬುದು ತ್ರಿವಿಕ್ರಮ ಸಿನಿಮಾ ಮೂಲಕ ಅನಾವರಣಗೊಳಲಿದ್ದು, ಎರಡು ಹಾಡುಗಳ ಚಿತ್ರೀಕರಣ ಪೂರ್ಣಗೊಂಡರೆ ತ್ರಿವಿಕ್ರಮ ಕುಂಬಳಕಾಯಿ ಹೊಡೆಯಲಿದ್ದಾರೆ. ಇನ್ನು ಬಾಕಿ ಇರುವ ಹಾಡಿನ ಶೂಟಿಂಗ್​ಗಾಗಿ ಚಿತ್ರತಂಡ ಭರ್ಜರಿ ಪ್ಲ್ಯಾನ್ ರೂಪಿಸಿದೆ.

ಅದೇನೆಂದರೆ
ಭಾರತ, ಚೀನಾ ವಿವಾದಿತ ಗಡಿಯಲ್ಲಿ 'ತ್ರಿವಿಕ್ರಮ'ನ ಪರಾಕ್ರಮ. ಹೌದು, ಚಿತ್ರದ ಉಳಿದ ಹಾಡುಗಳನ್ನು ಗಾಲ್ವಾನ್ ಗಡಿಯಲ್ಲಿ ಚಿತ್ರೀಕರಿಸಲು ನಿರ್ದೇಶಕ ಸಹನಾ ಮೂರ್ತಿ ಯೋಜನೆ ರೂಪಿಸಿದ್ದಾರೆ. ಇದಕ್ಕೆ ನಿರ್ಮಾಪಕರಿಂದ ಕೂಡ ಫುಲ್ ಸಪೋರ್ಟ್ ಕೂಡ ಸಿಕ್ಕಿದೆ.

ಎರಡು ಹಾಡುಗಳ ಶೂಟಿಂಗ್‌ಗೆ ತ್ರಿವಿಕ್ರಮ ಟೀಮ್ ಗಲ್ವಾನ್ ಗಡಿ ಪ್ರದೇಶಕ್ಕೆ ತೆರಳಲಿದ್ದು, ಶೂಟಿಂಗ್ ಅನುಮತಿಗಾಗಿ ಚಿತ್ರತಂಡ ಕಾಯುತ್ತಿದೆ. ಅಷ್ಟೆ ಅಲ್ಲದೆ ಜಮ್ಮು- ಕಾಶ್ಮಿರ ಹಾಗೂ ಪಾಕಿಸ್ತಾನದ ವಿವಾದಿತ ಪ್ರದೇಶದಲ್ಲೂ ಚಿತ್ರೀಕರಣ ಮಾಡಲಿದ್ದಾರೆ.

ಇಷ್ಟೆಲ್ಲಾ ಹೇಳಿದ ಮೇಲೆ ನಿಮ್ಮಲ್ಲೂ ಈ ಪ್ರಶ್ನೆ ಮೂಡಬಹುದು. ಅದ್ಯಾಕೆ ವಿವಾದಿತ ಪ್ರದೇಶದಲ್ಲೇ ಚಿತ್ರೀಕರಣ ಎಂದು. ಇದಕ್ಕೂ. ಉತ್ತರ ನೀಡಿದ್ದಾರೆ ನಿರ್ದೇಶಕ ಸಹನಾ ಮೂರ್ತಿ. ಭಾರತ ಚೀನಾ‌ ಗಡಿ ವಿವಾದ ಈಗ ಅಂತರಾಷ್ಟ್ರೀಯ ಚರ್ಚಿತ ವಿಷಯ. ನಮ್ಮ ನೆಲದಲ್ಲಿ ನಾವು ಹೆಚ್ಚಾಗಿ ಭೇಟಿ ಕೊಟ್ಟರೆ ಆ ಜಾಗಕ್ಕೆ ಬೇರೆಯವರ ಪ್ರವೇಶ ಅಸಾಧ್ಯ. ಹಾಗೆಯೇ ನಮ್ಮ‌ ದೇಶದ ಸಾರ್ವಭೌಮತ್ವವನ್ನ ಇಡೀ‌ ದೇಶಕ್ಕೆ‌ ತಿಳಿಸಬಹುದು.

ಇದೇ ಉದ್ದೇಶದಿಂದ ಭಾರತ- ಚೀನಾ ಗಡಿ ಗಾಲ್ವಾನ್ ನಲ್ಲಿ‌ ಚಿತ್ರೀಕರಣ ಮಾಡಲು ನಿರ್ಧರಿಸಿದ್ದೇವೆ ಎಂದಿದ್ದಾರೆ ನಿರ್ದೇಶಕ ಸಹನಾ ಮೂರ್ತಿ. ಈ ಹಿಂದೆ ಹ್ಯಾಟ್ರಿಕ್ ಹೀರೋ ಶಿವಣ್ಣ ಅವರ ಲೀಡರ್ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳಿದ್ದ ಸಹನಾ ಮೂರ್ತಿ, ಆ ಸಿನಿಮಾದ ಶೂಟಿಂಗ್​ನ್ನು ಭಾರತ ಮತ್ತು ಪಾಕ್ ಗಡಿಯ 6 ಕಿ.ಮೀ ದೂರದಲ್ಲಿ ಮಾಡಿದ್ರು.

ಇನ್ನು ಇಡೀ ಚಿತ್ರತಂಡಕ್ಕೆ ಫುಲ್ ಸಪೋರ್ಟ್ ಆಗಿ ನಿಂತಿರುವುದು ನಿರ್ಮಾಪಕ ಸೋಮಣ್ಣ. ಅದೆಷ್ಟೇ ಸಮಯವಾದರೂ ಪರವಾಗಿಲ್ಲ. ಜೂ. ಕ್ರೇಜಿಸ್ಟಾರ್​ ಅನ್ನು ಸಖತ್ತಾಗಿ ತೋರಿಸಲು ಪಣತೊಟ್ಟಿದ್ದಾರೆ. ಅದರಂತೆ ಚಿತ್ರತಂಡದ ಕೋರಿಕೆಯಂತೆ ಗಾಲ್ವಾನ್​ ಚಿತ್ರೀಕರಣಕ್ಕೂ ಸಕಲ ವ್ಯವಸ್ಥೆ ಮಾಡಿಕೊಡಲು ಮುಂದಾಗಿದ್ದಾರೆ.

ನಿರ್ದೇಶಕ ಸಹಾನಾ ಮೂರ್ತಿ ರವಿಚಂದ್ರನ್ ಎರಡನೇ ಪುತ್ರದ ಚೊಚ್ಚಲ ಸಿನಿಮಾವನ್ನ ಸಿಕ್ಕಾಪಟ್ಟೆ ಮುತ್ತುವರ್ಜಿ ವಹಿಸಿ ನಿರ್ದೇಶಿಸುತ್ತಿದ್ದು, ಇದರ ಕಥೆಗಾಗಿ ಒಂದೂವರೆ ವರ್ಷಗಳ ಕಾಲ ಸಮಯ ವಿನಿಯೋಗಿಸಿದ್ದಾರೆ. ಚಿತ್ರದ ಡೈಲಾಗ್, ಮಾಸ್ ಸನ್ನಿವೇಶ, ಲವ್, ಸೆಂಟಿಮೆಂಟ್ ಕಥೆಯನ್ನು ಅಚ್ಚುಕಟ್ಟಾಗಿ ಜೋಡಿಸಿ ಚಿತ್ರಕಥೆ ರೂಪಿಸಿ ಪರದೆ ಮೇಲೆ ತೋರಿಸುವ ಇರಾದೆಯಲ್ಲಿದ್ದಾರೆ.

ಇನ್ನೆರಡು ಹಾಡುಗಳ ಚಿತ್ರೀಕರಣ ಮುಗಿದ್ರೆ ತ್ರಿವಿಕ್ರಮನ ಅವತಾರದೊಂದಿಗೆ ವಿಕ್ರಂ ಬೆಳ್ಳಿತೆರೆ ಮೇಲೆ ಮಿಂಚೋಕೆ ಬಂದು ಬಿಡಲಿದ್ದಾರೆ. ಅಲ್ಲಿಗೆ ಸ್ಯಾಂಡಲ್​ವುಡ್​ನಲ್ಲಿ ಜೂ. ಕ್ರೇಜಿಸ್ಟಾರ್​ ಯುಗವೊಂದು ಆರಂಭವಾಗಲಿದೆ.

ತ್ರಿವಿಕ್ರಮ

ತ್ರಿವಿಕ್ರಮ ಚಿತ್ರದ ನಿರ್ದೇಶಕ ಸಹನಾಮೂರ್ತಿ