Kareena Kapoor: 34 ವರ್ಷಗಳ ನಂತರ ಒಂದಾದ್ರು ಕರೀನಾ ಪೋಷಕರು!

ಬಾಲಿವುಡ್ ತಾರೆಯರ ಮದುವೆ ಮತ್ತು ವಿಚ್ಛೇದನಗಳು ಆಗಾಗ ಸುದ್ದಿಯಾಗುತ್ತಲೇ ಇರುತ್ತವೆ. ಇದೀಗ ಬಾಲಿವುಡ್‌ನಿಂದ ವಿಭಿನ್ನ ಸುದ್ದಿಯೊಂದು ಕೇಳಿ ಬರುತ್ತಿದೆ. 34 ವರ್ಷಗಳ ಅಗಲಿಕೆಯ ನಂತರ ಸ್ಟಾರ್ ಜೋಡಿ ಒಂದಾಗಲು ತಯಾರಿ ನಡೆಸುತ್ತಿದ್ದಾರೆ.

ಬಾಲಿವುಡ್ ನಾಯಕಿಯರಾದ ಕರಿಷ್ಮಾ ಕಪೂರ್ ಮತ್ತು ಕರೀನಾ ಕಪೂರ್ ಅವರ ಹೆತ್ತವರು ರಣಧೀರ್ ಕಪೂರ್ ಮತ್ತು ಬಬಿತಾ ಕಪೂರ್ ಮತ್ತೆ ಒಂದಾಗಲು ಸಿದ್ಧರಾಗಿದ್ದಾರೆ.

ರಣಧೀರ್ ಕಪೂರ್ ಮತ್ತು ಬಬಿತಾ 1980 ರ ದಶಕದಲ್ಲಿ ಬೇರ್ಪಟ್ಟರು. ಇದಾದ ನಂತರ ಬಬಿತಾ ತನ್ನ ಮಕ್ಕಳಾದ ಕರಿಷ್ಮಾ ಮತ್ತು ಕರೀನಾ ಅವರೊಂದಿಗೆ ಲೋಖಂಡವಾಲಾದಲ್ಲಿನ ಅಪಾರ್ಟ್‌ಮೆಂಟ್‌ನಲ್ಲಿ ವಾಸಿಸುತ್ತಿದ್ದರು. ರಣಧೀರ್ ಕಪೂರ್ ಬಗ್ಗೆ ಹೇಳುವುದಾದರೆ, ಅವರು ಚೆಂಬೂರಿನಲ್ಲಿರುವ ತಮ್ಮ ಕುಟುಂಬದ ಮನೆಯಲ್ಲಿ ವಾಸಿಸುತ್ತಿದ್ದರು.

ಇಬ್ಬರೂ 34 ವರ್ಷಗಳಿಂದ ಬೇರ್ಪಟ್ಟಿದ್ದಾರೆ. ಅಷ್ಟರಲ್ಲಿ ಹೆಣ್ಣುಮಕ್ಕಳಿಬ್ಬರೂ ಬಾಲಿವುಡ್ ಸೂಪರ್ ಹೀರೋಯಿನ್ ಗಳಾದರು. ಮದುವೆಯಾಗಿ ತಾಯಿಯಾದರು. ಇದೀಗ ಬಬಿತಾ ಮತ್ತು ರಣಧೀರ್ ಮತ್ತೆ ಒಂದಾಗಲು ತಯಾರಿ ನಡೆಸಿದ್ದಾರೆ.

ಇದರ ಭಾಗವಾಗಿ ಬಬಿತಾ ಬಾಂದ್ರಾದಲ್ಲಿರುವ ರಣಧೀರ್ ಕಪೂರ್ ಮನೆಗೆ ತೆರಳಿದ್ದಾರೆ ಎಂದು ಎಟೈಮ್ಸ್ ವರದಿ ಮಾಡಿದೆ. ವರದಿಯ ಪ್ರಕಾರ, ಕರಿಷ್ಮಾ ಮತ್ತು ಕರೀನಾ ತಮ್ಮ ಹೆತ್ತವರು ಮತ್ತೆ ಒಂದಾಗಿರುವುದರಿಂದ ತುಂಬಾ ಸಂತೋಷಪಟ್ಟಿದ್ದಾರೆ.

ಏಳು ತಿಂಗಳ ಹಿಂದೆ ರಣಧೀರ್ ಮತ್ತು ಬಬಿತಾ ಮತ್ತೆ ಒಂದಾಗುತ್ತಾರೆ ಎಂದು ಹೇಳಲಾಗಿತ್ತು. ಬೇರ್ಪಟ್ಟಿದ್ದರೂ, ಇಬ್ಬರೂ ತಮ್ಮ ಮಕ್ಕಳೊಂದಿಗೆ ಕಪೂರ್ ಕುಟುಂಬದ ಫಂಕ್ಷನ್​ಗಳಲ್ಲಿ ಒಟ್ಟಿಗೆ ಇರುತ್ತಿದ್ದರು. ವಿಚ್ಛೇದನ ಪಡೆದಿದ್ದರೂ ಇಬ್ಬರೂ ಆತ್ಮೀಯ ಗೆಳೆಯರಾಗಿದ್ದರು.

ಬಬಿತಾ ಮತ್ತು ರಣಧೀರ್ 1971 ರಲ್ಲಿ ವಿವಾಹವಾದರು. ಇಬ್ಬರೂ ಬಾಲಿವುಡ್‌ನ ಮಾಜಿ ತಾರೆಯರು. ಕಲ್ ಆಜ್ ಔರ್ ಕಲ್ ಸಿನಿಮಾದಲ್ಲಿ ಜೊತೆಯಾಗಿ ನಟಿಸಿದಾಗ ಇಬ್ಬರ ನಡುವೆ ಪ್ರೀತಿ ಮೂಡಿತ್ತು.

ರಣಧೀರ್ ಜೊತೆ ಮದುವೆಯಾದಾಗ ಬಬಿತಾಗೆ 24 ವರ್ಷ. 1988ರಲ್ಲಿ ಇಬ್ಬರೂ ಬೇರ್ಪಟ್ಟರು.