Rakhi Sawant: ಆದಿಲ್ ಖಾನ್ ನಾನು ಇಸ್ಲಾಂ ಸ್ವೀಕರಿಸುವಂತೆ ಮಾಡಿದ! ರಾಖಿ ಗಂಭೀರ ಆರೋಪ

ಯಾವಾಗಲೂ ಒಂದಲ್ಲ ಒಂದು ವಿಷಯಕ್ಕೆ ಸುದ್ದಿಯಾಗುವ ನಟಿ ರಾಖಿ ಸಾವಂತ್‌ (Rakhi Sawant) ತಾನೂ ಕೂಡ ಇಸ್ಲಾಂ ಧರ್ಮವನ್ನು  (Islam Religion) ಸ್ವೀಕರಿಸಿದ್ದೇನೆ ಎಂದಿದ್ದಾರೆ. ಈ ಧರ್ಮವನ್ನು ನಾನು ನನ್ನ ಹೃದಯದಿಂದ ಸ್ವೀಕರಿಸಿದ್ದೇನೆ ಎಂದು ಹೇಳಿದ್ದಾರೆ. ಸದಾ ಒಂದಲ್ಲ ಒಂದು ವಿವಾದ ಮೈಮೇಲೆಳೆದುಕೊಳ್ಳುವ ರಾಖಿ ಕರಣ್‌ ಜೋಹರ್‌ (Karan Johar) ಹಾಗೂ ಪ್ರಿಯಾಂಕಾ ಚೋಪ್ರಾ (Priyanka Chopra) ಬಗ್ಗೆಯೂ ಮಾತನಾಡಿದ್ದಾರೆ.

ನನ್ನ ಪತಿ ಆದಿಲ್‌ ನನ್ನನ್ನು ಇಸ್ಲಾಂ ಸ್ವೀಕರಿಸುವಂತೆ ಮಾಡಿದ್ದರಿಂದ ನಾನು ಅದನ್ನು ಅನುಸರಿಸುತ್ತಿದ್ದೇನೆ ಎಂಬುದಾಗಿ ರಾಖಿ ಹೇಳಿದ್ದಾರೆ. ಇದು ನನ್ನ ಇಚ್ಛೆ. ನಾನು ಹಿಂದೂವಾಗಿ ಹುಟ್ಟಿದ್ದೇನೆ. ನನ್ನ ತಾಯಿಯೊಂದಿಗೆ ನಾನು ಕ್ರಿಶ್ಚಿಯನ್ ಧರ್ಮವನ್ನು ಅನುಸರಿಸಲು ಪ್ರಾರಂಭಿಸಿದೆ. ಆದಿಲ್ ರನ್ನು ಮದುವೆಯಾದ ನಂತರ, ಅವರು ನನ್ನನ್ನು ಇಸ್ಲಾಂ ಸ್ವೀಕರಿಸುವಂತೆ ಮಾಡಿದರು.

ಈಗ ಇಸ್ಲಾಂ ನನ್ನ ಧರ್ಮವಾಗಿದೆ. ನಾನು ನಮಾಜ್ ಮಾಡುತ್ತೇನೆ. ರೋಜಾಗಳನ್ನು ಇಟ್ಟುಕೊಂಡು ಉತ್ತಮ ಮುಸ್ಲಿಮಳಾಗಲು ನನ್ನ ಕೈಲಾದಷ್ಟು ಪ್ರಯತ್ನಿಸುತ್ತಿದ್ದೇನೆ. ನಾನು ಅದರಲ್ಲಿ ಶಾಂತಿಯನ್ನು ಕಂಡುಕೊಳ್ಳುತ್ತೇನೆ ಎಂಬುದಾಗಿ ರಾಖಿ ಹೇಳಿದ್ದಾರೆ.

ನಮಾಜ್ ಅನ್ನು ಹೇಗೆ ಅರ್ಪಿಸಲಾಗುತ್ತದೆ ಎಂಬುದನ್ನು ನಾನು ನಿಮಗೆ ಹೇಳುತ್ತೇನೆ. ನಮಾಜ್ ಅನ್ನು 7 ಮೂಳೆಗಳು, ಪಾದಗಳು, ಮೊಣಕಾಲುಗಳು, ಕೈಗಳು ಮತ್ತು ತಲೆಯ ಮೂಲಕ ಮಾಡಲಾಗುತ್ತದೆ.

ಮೂಗನ್ನು ಸಹ ಸ್ಪರ್ಶಿಸಬೇಕಾಗುತ್ತದೆ. ಆದರೆ ನಾನು ಶಸ್ತ್ರಚಿಕಿತ್ಸೆ ಮಾಡಿಸಿದೇನೆ. ಆದ್ದರಿಂದ ನಾನು ನನ್ನ ಮೂಗನ್ನು ಮುಟ್ಟುವುದಿಲ್ಲ. ನಮಾಜ್ ಮಾಡುವುದು ಹೇಗೆಂದು ನನಗೆ ಮೊದಲು ತಿಳಿದಿರಲಿಲ್ಲ. ನಾನು ಈಗ ಪ್ರತಿದಿನ ಇದನ್ನೆಲ್ಲ ಕಲಿಯುತ್ತಿದ್ದೇನೆ ಎಂದು ರಾಖಿ ಹೇಳಿಕೊಂಡಿದ್ದಾರೆ.

ನಾನು ಉಮ್ರಾಗೆ ಹೋಗಬೇಕೆಂದು ಬಯಸಿದ್ದೆ. ಆದರೆ ನನಗೆ ಹೋಗಲು ಸಾಧ್ಯವಾಗಲಿಲ್ಲ. ಹಿಂದೂ ಹಿನ್ನೆಲೆಯಿಂದ ಬಂದ ನನಗೆ ಪ್ರಮಾಣ ಪತ್ರ ಪಡೆಯಲು ಕಷ್ಟವಾಗುತ್ತಿದೆ.

ನಾನು ಈಗಾಗಲೇ ಕಲ್ಮಾವನ್ನು ಜಪಿಸಿದ್ದೇನೆ. ನಾನು ನಮಾಜ್ ಮಾಡುತ್ತೇನೆ, ರೋಜಾಗಳನ್ನು ಇಟ್ಟುಕೊಳ್ಳುತ್ತೇನೆ. ನಾನು ನನ್ನನ್ನು ಈಗ ಮುಸ್ಲಿಂ ಎಂದು ಪರಿಗಣಿಸುತ್ತೇನೆ. ನನ್ನ ಹೆಸರು ಫಾತಿಮಾ. ಆದರೆ ನನಗೆ ಇನ್ನೂ ಪ್ರಮಾಣಪತ್ರವನ್ನು ಪಡೆಯಲು ಸಾಧ್ಯವಾಗಲಿಲ್ಲ ಎಂದು ನೋವು ತೋಡಿಕೊಂಡಿದ್ದಾರೆ.

ಬಾಲಿವುಡ್‌ನ ಕರಣ್ ಜೋಹರ್ ನನ್ನ ಸಹೋದರ. ನಾನು ಅವರ ವಿರುದ್ಧ ಏನನ್ನೂ ಹೇಳಲು ಬಯಸುವುದಿಲ್ಲ. ಬಾಲಿವುಡ್ ವಿರುದ್ಧ ನಾನೇಕೆ ಜಗಳವಾಡಬೇಕು ಎಂದು ಪ್ರಶ್ನಿಸಿದ್ದಾರೆ.

ಅಲ್ಲದೇ ನಟಿ ಪ್ರಿಯಾಂಕಾ ಚೋಪ್ರಾ ಇತ್ತೀಚೆಗೆ ಬಾಲಿವುಡ್‌ ಬಗ್ಗೆ ಮಾಡಿದ್ದ ಕಾಮೆಂಟ್‌ ಕುರಿತು ಮಾತನಾಡಿದ ರಾಖಿ, ನಾನು ಪ್ರಿಯಾಂಕಾ ಚೋಪ್ರಾರನ್ನು ಪ್ರೀತಿಸುತ್ತೇನೆ. ಈಗ ಆಕೆ ಅಮೇರಿಕಾದಲ್ಲಿ ನೆಲೆಸಿದ್ದಾರೆ.

ಪ್ರಿಯಾಂಕಾ ಈ ಮೊದಲೂ ಅದನ್ನು ಹೇಳಬಹುದಿತ್ತು. ಹಿಂದಿನದನ್ನು ತರುವುದರಲ್ಲಿ ಅರ್ಥವಿಲ್ಲ ಎಂದಿರುವ ರಾಖಿ, ಕರಣ್ ಜೋಹರ್ ಹಾಗಲ್ಲ, ಅವರನ್ನು ಟಾರ್ಗೆಟ್ ಮಾಡಲಾಗುತ್ತಿದೆ ಎಂದಿದ್ದಾರೆ.

ಲಾಕ್ ಅಪ್ 2 ನಲ್ಲಿ ಭಾಗವಹಿಸುವ ಅವಕಾಶ ಸಿಗಬಹುದು: ನನಗೆ ಲಾಕ್ ಅಪ್ 2 ಶೋನಲ್ಲಿ ಭಾಗವಹಿಸುವ ಅವಕಾಶ ಸಿಗಬಹುದು. ಆದರೆ ನನಗೆ ಇದರ ಬಗ್ಗೆ ಇನ್ನೂ ಸರಿಯಾಗಿ ಗೊತ್ತಿಲ್ಲ ಎಂದು ಹೇಳಿದ್ದಾರೆ.

'ಯೇ ಜಲ್ದಿ ಠೀಕ್ ಹೋಗಯಿ'! : ತಾಯಿಯ ನಿಧನದ ನಂತರ ಮತ್ತು ನನ್ನ ಮದುವೆಯ ಸಮಸ್ಯೆಯ ನಂತರ ಕೆಲವು ಅಭಿಮಾನಿಗಳು ನನ್ನ ಬಗ್ಗೆ ಅಸೂಯೆ ಪಟ್ಟಿದ್ದಾರೆ. “ಯೇ ಜಲ್ದಿ ಠೀಕ್‌ ಹೋಗಯಿ” ಅಂದರೆ ನಾನು ಬೇಗ ಸರಿಹೋದೆ ಎಂದು ಕಮೆಂಟ್ ಮಾಡುತ್ತಿದ್ದಾರೆ. ಇವರೆಂಥ ಜನರು ? ಅವರು ನನ್ನ ಸಂತೋಷವನ್ನು ಏಕೆ ನೋಡುವುದಿಲ್ಲ? ಅವರು ನನ್ನ ಬಟ್ಟೆ, ಜೀವನ, ಸಂತೋಷ ಮತ್ತು ದುಃಖದ ಬಗ್ಗೆ ಮಾತನಾಡುವುದನ್ನು ನಿಲ್ಲಿಸಬೇಕು ಎಂದು ರಾಖಿ ಸಾವಂತ್‌ ಹೇಳಿದ್ದಾರೆ.