Rakhi Sawant: ರಾಖಿ ಸಾವಂತ್ ಪತಿ, ಕರ್ನಾಟಕದ ಆದಿಲ್ ಖಾನ್ ಅರೆಸ್ಟ್

ಬಾಲಿವುಡ್ ನಟಿ ರಾಖಿ ಸಾವಂತ್ ಪತಿ ಆದಿಲ್ ಖಾನ್ ದುರಾನಿ ಅರೆಸ್ಟ್ ಆಗಿದ್ದಾರೆ. ಆದಿಲ್ ಖಾನ್ ರಾಖಿಯನ್ನು ಭೇಟಿ ಮಾಡಲು ಆಕೆ ಇದ್ದ ಸ್ಥಳಕ್ಕೆ ಹೋಗಿದ್ದರು ಎಂದು ತಿಳಿದು ಬಂದಿದೆ.

ರಾಖಿ ಸ್ಥಳಕ್ಕೆ ಬಂದ ಆದಿಲ್​ನನ್ನು ಓಶಿವರ ಪೊಲೀಸರು ಅರೆಸ್ಟ್ ಮಾಡಿದ್ದಾರೆ. ವರದಿಗಳ ಪ್ರಕಾರ ರಾಖಿ ಸಾವಂತ್ ಅವರು ಆದಿಲ್ ವಿರುದ್ಧ ಎಫ್​ಐಆರ್ ದಾಖಲಿಸಿದ್ದಾರೆ.

ರಾಖಿ ಸಾವಂತ್ ಅವರು ಓಶಿವರ ಪೊಲೀಸ್ ಠಾಣೆಯ ಆಸುಪಾಸಿನಲ್ಲಿ ಇತ್ತೀಚೆಗೆ ಕಾಣಿಸಿಕೊಂಡಿದ್ದು ಆ ಸಂದರ್ಭ ಅವರು ತಮ್ಮ ಪತಿ ವಿರುದ್ಧ ಕೇಸ್ ದಾಖಲಿಸಿದ್ದರು.

ಆ ಘಟನೆಯ ಬೆನ್ನಲ್ಲೇ ಈಗ ಆದಿಲ್ ಖಾನ್ ಅರೆಸ್ಟ್ ನಡೆದಿದೆ. ಎಫ್​ಐಆರ್ ದಾಖಲಿಸಿಕೊಂಡ ಪೊಲೀಸರು ಆದಿಲ್​ನನ್ನು ಅರೆಸ್ಟ್ ಮಾಡಿದ್ದಾರೆ.

ಎಫ್​ಐಆರ್​ನಲ್ಲಿ ದಾಖಲಿಸಿದ ಕಾರಣಗಳು ಯಾವುದೆಂದು ತಿಳಿದುಬಂದಿಲ್ಲ. ಆದಿಲ್ ಖಾನ್​ ಇಟ್ಟುಕೊಂಡಿದ್ದ ವಿವಾಹೇತರ ಸಂಬಂಧ ಈ ಎಫ್​ಐಆರ್​ಗೆ ಕಾರಣ ಎನ್ನಲಾಗುತ್ತಿದೆ.

ಈ ಹಿಂದೆ ಆದಿಲ್ ವಿರುದ್ಧ ಹಲವು ಆರೋಪಗಳನ್ನು ಮಾಡಿದ್ದರು ರಾಖಿ ಸಾವಂತ್. ಈ ಸಂದರ್ಭ ತನ್ನ ತಾಯಿಯ ಚಿಕಿತ್ಸೆಗೆ ಆದಿಲ್ ಹಣ ನೀಡಿಲ್ಲ ಎಂದು ಆರೋಪಿಸಿದ್ದರು.

ಆದಿಲ್ ಖಾನ್​ನಿಂದಾಗಿಯೇ ತಾಯಿ ಸಾವನ್ನಪ್ಪಿದ್ದಾರೆ ಎಂದು ರಾಖಿ ಸಾವಂತ್ ಆರೋಪಿಸಿದ್ದಾರೆ. ನಿನ್ನನ್ನು ಬಿಟ್ಟು ಗರ್ಲ್​ಫ್ರೆಂಡ್ ತನು ಜೊತೆ ಇರುತ್ತೇನೆ ಎಂದು ಆದಿಲ್ ಹೇಳಿದ್ದಾರೆ ರಾಖಿ ಸಾವಂತ್ ತಿಳಿಸಿದ್ದಾರೆ.