Pathaan: 8 ದಿನ 600 ಕೋಟಿ! ಸದ್ಯಕ್ಕೆ ನಿಲ್ಲಲ್ಲ ಪಠಾಣ್ ಅಬ್ಬರ

ಶಾರುಖ್ ಖಾನ್ ಅವರ ಬ್ಲಾಕ್‌ಬಸ್ಟರ್ ಆಕ್ಷನ್ ಸಿನಿಮಾ 'ಪಠಾಣ್' ಬಾಕ್ಸ್ ಆಫೀಸ್‌ನಲ್ಲಿ ಎರಡನೇ ವಾರದಲ್ಲಿಯೂ ಭರ್ಜರಿ ಕಲೆಕ್ಷನ್ ಮಾಡುತ್ತಿದೆ. ಸಿನಿಮಾ ಬಾಕ್ಸ್​ ಆಫೀಸ್​ನಲ್ಲಿ ಬುಧವಾರದಂದು ಅಂದಾಜು 17-17.50 ಕೋಟಿ ರೂ. ಗಳಿಸಿದೆ.

ಸಿನಿಮಾ ಮಂಗಳವಾರದಂದು 21 ಕೋಟಿ ರೂ ಕಲೆಕ್ಷನ್​ನಿಂದ ಸ್ವಲ್ಪ ಕಡಿಮೆ ಕಲೆಕ್ಷನ್ ಮಾಡಿದರೂ ಟಿಕೆಟ್ ಸೇಲ್ ಕಮ್ಮಿಯಾಗಿಲ್ಲ. ಚಿತ್ರದ ಒಟ್ಟು ಕಲೆಕ್ಷನ್‌ಗಳು ಈಗ ಹಿಂದಿಯಲ್ಲಿ ಸುಮಾರು 332 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದೆ.

ಮೊದಲ ವಾರದ ಕಲೆಕ್ಷನ್ ಸುಮಾರು 347 ಕೋಟಿ ರೂ.ಗಳಷ್ಟು ಇದ್ದು 'ಪಠಾಣ್' ಬಾಕ್ಸ್ ಆಫೀಸ್‌ನಲ್ಲಿ ತನ್ನ ಮೊದಲ ಏಳು ದಿನಗಳಲ್ಲಿ ದಿನಕ್ಕೆ ಸರಾಸರಿ 45 ಕೋಟಿ ರೂ. ಕಲೆಕ್ಷನ್ ಮಾಡಿದೆ.

ವಿಶ್ವಾದ್ಯಂತ ಬಾಕ್ಸ್ ಆಫೀಸ್​​ನಲ್ಲಿ ಪಠಾಣ್ 617 ಕೋಟಿ ರೂಪಾಯಿ ಗಳಿಸಿದೆ. ಕೇವಲ ಒಂದು ವಾರದಲ್ಲಿ ವಿಶ್ವದಾದ್ಯಂತ ಅತಿ ಹೆಚ್ಚು ಗಳಿಸಿದ ಮೂರನೇ ಹಿಂದಿ ಸಿನಿಮಾ ಇದಾಗಿದೆ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಬಾಕ್ಸ್ ಆಫೀಸ್​ನಲ್ಲಿ ಹೆಚ್ಚು ಗಳಿಸಿದ ಇತರ ಸಿನಿಮಾ 'ದಂಗಲ್'(ರೂ 700 ಕೋಟಿ ) ಮತ್ತು 'ಬಾಹುಬಲಿ: ದಿ ಕನ್‌ಕ್ಲೂಷನ್'(ರೂ 800 ಕೋಟಿ).

ವಿಶ್ವಾದ್ಯಂತ 600 ಕೋಟಿ ಗಳಿಸಿದ ಐದನೇ ಹಿಂದಿ ಚಿತ್ರ ಎಂಬ ಹೆಗ್ಗಳಿಕೆಗೆ 'ಪಠಾಣ್' ಪಾತ್ರವಾಗಿದೆ. ಈ ಚಿತ್ರದಲ್ಲಿ ದೀಪಿಕಾ ಪಡುಕೋಣೆ ಮತ್ತು ಜಾನ್ ಅಬ್ರಹಾಂ ಕೂಡ ನಟಿಸಿದ್ದಾರೆ.

ಈ ನಡುವೆ ಶಾರುಖ್ ಖಾನ್ ಅವರು ಪಠಾಣ್ 2 ಸಿನಿಮಾದ ಬಗ್ಗೆಯೂ ಹಿಂಟ್ ಕೊಟ್ಟಿದ್ದಾರೆ. ಸಿನಿಮಾ ಬಂದರೆ ತಾವೂ ಅದರಲ್ಲಿ ನಟಿಸುವುದಾಗಿ ಹೇಳಿದ್ದಾರೆ.

5 ವರ್ಷಗಳ ನಂತರ ಶಾರುಖ್ ಖಾನ್ ಅವರ ಕಮ್ ಬ್ಯಾಕ್ ಸಿನಿಮಾ ಪಠಾಣ್ ಆಗಿದ್ದು ಅವರಿಗೆ ದೊಡ್ಡ ಬ್ರೇಕ್ ಕೊಟ್ಟಿರುವ ಸಿನಿಮಾ ಇದು.