Pathaan 2: ಪಠಾಣ್ 2 ಬಗ್ಗೆ ಶಾರುಖ್ ಬಿಗ್ ಅಪ್ಡೇಟ್! ಫ್ಯಾನ್ಸ್ ಥ್ರಿಲ್

ಶಾರುಖ್ ಖಾನ್ ಅವರು ಝಿರೋ ಸಿನಿಮಾ ಫ್ಲಾಪ್ ಆದ ನಂತರ 5 ವರ್ಷಗಳ ಬಳಿಕ ಬಾಕ್ಸ್ ಆಫೀಸ್​ನಲ್ಲಿ ಮಿಂಚುತ್ತಿದ್ದಾರೆ. ಪಠಾಣ್ ಸಿನಿಮಾ ಮೂಲಕ ಭರ್ಜರಿ ಹಿಟ್ ಕೊಟ್ಟಿದ್ದಾರೆ. 2023ರ ಮೊದಲ ಹಿಟ್ ಆಗಿ ಈ ಸಿನಿಮಾ ಸುದ್ದಿಯಾಗಿದೆ. ಸಿನಿಮಾ ಬಗ್ಗೆ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗುತ್ತಿದ್ದು ಎಲ್ಲೆಡೆಯಿಂದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಇದೇ ಕಾರಣದಿಂದಾಗಿ ಪಠಾಣ್ ಸಿನಿಮಾದ ಸೀಕ್ವೆಲ್ ಬಗ್ಗೆ ಕುತೂಹಲ ಹೆಚ್ಚಾಗಿದೆ.

ರಿಲೀಸ್​ಗೂ ಮುನ್ನ ಸಾಕಷ್ಟು ಕಿರಿಕಿರಿ ಎದುರಿಸಿದ್ದ ಸಿನಿಮಾ ತಂಡ ಚಿತ್ರದ ಕುರಿತು ಯಾವುದೇ ಪ್ರಚಾರ ಮಾಡಿರಲಿಲ್ಲ. ಸಿನಿಮಾ ಬಗ್ಗೆ ಪ್ರಚಾರ ಮಾಡುವುದಾಗಲಿ, ಪ್ರಮೋಷನ್ ಇವೆಂಟ್​ಗಳೂ ನಡೆದಿರಲಿಲ್ಲ. ಹಾಗಾಗಿ ಜನರಲ್ಲಿ ಈ ಸಿನಿಮಾ ಸ್ಟಾರ್​ಗಳ ಶೂಟಿಂಗ್ ಅನುಭವ ತಿಳಿಯುವ ಕುತೂಹಲ ಹೆಚ್ಚಾಗಿದೆ.

ಸಿನಿಮಾ ರಿಲೀಸ್ ಮೊದಲು ಮಾಧ್ಯಮಗಳ ಜೊತೆಗಿನ ಇಂಟರಾಕ್ಷನ್ ಅವಾಯ್ಡ್ ಮಾಡಿದ ಚಿತ್ರತಂಡ ಈಗ ಪತ್ರಕರ್ತರ ಕೈಗೆ ಸಿಗುತ್ತಿದ್ದಾರೆ. ಸಿನಿಮಾಗಳ ಕುರಿತು ಪ್ರಶ್ನೆಗಳಿಗೆ ಉತ್ತರ ಕೊಡುತ್ತಿದ್ದಾರೆ.

ಮಾಧ್ಯಮದ ಜೊತೆ ಸಂಭಾಷಣೆ ಸಂದರ್ಭ ಪಠಾಣ್ 2 ಸಿನಿಮಾ ಬಗ್ಗೆ ಹೊಸ ಅಪ್ಡೇಟ್ ಸಿಕ್ಕಿದೆ. ಪಠಾಣ್ 2 ಸಿನಿಮಾ ಮಾಡುವ ಬಗ್ಗೆ ಹಾಗೂ ಅದರಲ್ಲಿ ನಟಿಸುವ ಬಗ್ಗೆ ಶಾರುಖ್ ಖಾನ್ ಅವರಲ್ಲಿ ಪ್ರಶ್ನೆಗಳನ್ನು ಕೇಳಲಾಗಿದೆ.

ಇದಕ್ಕೆ ಉತ್ತರಿಸಿದ ಕಿಂಗ್ ಖಾನ್, ಪಠಾಣ್ ಸಿನಿಮಾದಲ್ಲಿ ನಟಿಸಿದ್ದು ದೊಡ್ಡ ಅನುಭವ. ನಾನು ಇವತ್ತು ತುಂಬಾ ಸೀರಿಯಸ್ ಆಗಿದ್ದೇನೆ. ಸಿನಿಮಾದ ಪ್ರೀತಿ ಹಾಗೂ ಗೆಲುವು ನನ್ನ ಕುಟುಂಬಕ್ಕೆ ಹಾಗೂ ಸ್ನೇಹಿತರಿಗೆ ಖುಷಿ ತಂದಿದೆ. ನನಗೆ ಸಿಕ್ಕಿದ ಅವಕಾಶದ ಬಗ್ಗೆ ತುಂಬಾ ಖುಷಿ ಇದೆ. ಒಂದು ವೇಳೆ ಸಿದ್ಧಾರ್ಥ್​ ಪಠಾಣ್ 2 ಮಾಡಲು ಬಯಸಿದರೆ ನಾನು ಅದರಲ್ಲಿರುತ್ತೇನೆ ಎಂದಿದ್ದಾರೆ.

ಸೀಕ್ವೆಲ್ ಸಿನಿಮಾಗೋಸ್ಕರ ನನ್ನ ಸೊಂಟದವರೆಗೆ ಕೂದಲು ಬೆಳೆಸೋಕು ನಾನು ರೆಡಿ. ಪಠಾಣ್ 2ಗಾಗಿ ನನ್ನದೆಲ್ಲವನ್ನು ನೀಡಲು ನಾನು ಪ್ರಯತ್ನಿಸುತ್ತೇನೆ. ಅದು ನನಗೆ ಗೌರವ ಎಂದು ಹೇಳಿದ್ದಾರೆ.

ಪಠಾಣ್ ಸಿನಿಮಾಗೆ ಸಿದ್ಧಾರ್ಥ್ ಆನಂದ್ ಕಥೆ ಬರೆದು ನಿರ್ದೇಶಿಸಿದ್ದಾರೆ. ಈ ಸಿನಿಮಾವನ್ನು ಯಶ್ ರಾಜ್ ಫಿಲ್ಮ್​ ನಿರ್ಮಿಸಿದೆ. ಈ ಸಿನಿಮಾ 2018ರ ಝಿರೋ ನಂತರ ಶಾರುಖ್ ಅವರ ಕಮ್ ಬ್ಯಾಕ್ ಕೂಡಾ ಹೌದು.

ಜನವರಿ 25ರಂದು ಪಠಾಣ್ ಸಿನಿಮಾ ರಿಲೀಸ್ ಆಗಿದೆ. ತಮಿಳು ಹಾಗೂ ತೆಲುಗಿನಲ್ಲಿ ಕೂಡಾ ಡಬ್ ಮಾಡಿ ಸಿನಿಮಾ ರಿಲೀಸ್ ಮಾಡಲಾಗಿದೆ. ಶಾರುಖ್ ಅವರು ಇಲ್ಲಿ ಪಠಾಣ್ ಎಂಬ ಹೆಸರಿನ ರಾ ಏಜೆಂಟ್ ಆಗಿ ಕಾಣಿಸಿಕೊಂಡಿದ್ದಾರೆ.

ಈ ಸಿನಿಮಾದಲ್ಲಿ ದೀಪಿಕಾ ಪಡುಕೋಣೆ, ಜಾನ್ ಅಬ್ರಹಾಂ ಅವರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಇದು ದೀಪಿಕಾ ಪಡುಕೋಣೆಗೂ ಬಿಗ್ ಹಿಟ್ ಸಿನಿಮಾ.