Parineeti Chopra: ಆಮ್ ಆದ್ಮಿ ಪಕ್ಷದ ಯುವ ನಾಯಕನ ಜೊತೆ ಎಂಗೇಜ್ಮೆಂಟ್! ಪರಿಣಿತಿ ಮದುವೆ ಡೇಟ್ ಫಿಕ್ಸ್

ಬಾಲಿವುಡ್ ನಟಿ ಪರಿಣಿತಿ ಚೋಪ್ರಾ ಅವರು ಸಂಸದ ರಾಘವ್ ಚಡ್ಡಾ ಅವರನ್ನು ಮದುವೆಯಾಗುತ್ತಿದ್ದಾರೆ. ಕಳೆದ ಕೆಲವು ವಾರಗಳಿಂದ ಸುದ್ದಿಯಲ್ಲಿರುವ ಈ ಜೋಡಿ ಈಗ ಮದುವೆ ಸುದ್ದಿ ಕೊಟ್ಟಿದ್ದಾರೆ. ಇವರ ನಿಶ್ಚಿತಾರ್ಥವೂ ನಡೆದಿದೆ ಎನ್ನಲಾಗಿದೆ.

ಇಬ್ಬರೂ ತಮ್ಮ ಸಂಬಂಧವನ್ನು ಅಧಿಕೃತವಾಗಿ ಇನ್ನಷ್ಟೇ ಅನೌನ್ಸ್ ಮಾಡಬೇಕಾಗಿದೆ. ಆದರೆ ಇತ್ತೀಚಿನ ಮಾಹಿತಿ ಪ್ರಕಾರ ಈ ಜೋಡಿ ಈಗಾಗಲೇ ನಿಶ್ಚಿತಾರ್ಥ ಮಾಡಿಕೊಂಡಿದ್ದಾರಂತೆ. ಹಾಗಾಗಿ ಈಗ ಅವರ ಮದುವೆ ಕುರಿತ ಕುತೂಹಲ ಇನ್ನಷ್ಟು ಹೆಚ್ಚಾಗಿದೆ.

ಈ ಜೋಡಿ ಅಕ್ಟೋಬರ್​ನಲ್ಲಿ ಮದುವೆಯಾಗುತ್ತಿದ್ದಾರೆ ಎನ್ನಲಾಗಿದೆ. ಇವರ ವಿವಾಹ ಕಾರ್ಯಕ್ರಮ ಅಕ್ಟೋಬರ್​ನಲ್ಲಿ ನಡೆಯಲಿದ್ದು ಈ ಜೋಡಿ ಅದರ ಸಿದ್ಧತೆಯಲ್ಲಿ ಬ್ಯುಸಿಯಾಗಿದ್ದಾರೆ ಎನ್ನುವ ಸುದ್ದಿ ಹರಿದಾಡುತ್ತಿದೆ.

ಇಂಡಿಯಾ ಟುಡೆ ವರದಿ ಪ್ರಕಾರ ರಾಘವ್ ಚಡ್ಡಾ ಅವರು ಈಗಾಗಲೇ ಪರಿಣಿತಿ ಬೆರಳಿಗೆ ಉಂಗುರ ತೊಡಿಸಿಯಾಗಿದೆ. ಈ ಮೂಲಕ ಈ ಜೋಡಿ ಮದುವೆ ಫಿಕ್ಸ್ ಆದಂತಾಗಿದೆ. ಸಾಂಪ್ರದಾಯಿಕ ರೋಕಾ ಕಾರ್ಯಕ್ರಮದಲ್ಲಿ ಉಂಗುರ ಬದಲಾಯಿಸಿದ್ದಾರೆ ಎನ್ನಲಾಗಿದೆ.

ತುಂಬಾ ಆಪ್ತರು ಹಾಗೂ ಕುಟುಂಬ ಸದಸ್ಯರು ಮಾತ್ರ ಈ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದಾರೆ. ಈ ವರ್ಷ ಅಕ್ಟೋಬರ್ ಕೊನೆಯೊಳಗೆ ಈ ಜೋಡಿ ಮದುವೆಯಾಗುತ್ತಾರೆ ಎನ್ನಲಾಗಿದೆ. ಅಂತೂ ಬಾಲಿವುಡ್​ನ ಮತ್ತೊಬ್ಬ ನಟಿ ಮಿಸಸ್ ಆಗಲಿದ್ದಾರೆ.

ಪರಿಣಿತಿ ಅವರ ಸಹೋದರಿ ಪ್ರಿಯಾಂಕಾ ಚೋಪ್ರಾ ಅವರು ಕೂಡಾ ಇದೇ ತಿಂಗಳಲ್ಲಿ ಭಾರತದಲ್ಲಿರುತ್ತಾರೆ. ಜಿಯೋ ಮಮಿ ಫಿಲ್ಮ್ ಫೆಸ್ಟಿವಲ್​ನಲ್ಲಿ ಭಾಗವಹಿಸಲು ಪ್ರಿಯಾಂಕಾ ಚೋಪ್ರಾ ಅಕ್ಟೋಬರ್​ನಲ್ಲಿ ಭಾರತಕ್ಕೆ ಬರುತ್ತಾರೆ. ಪ್ರಿಯಾಂಕಾ ಮದುವೆಯಲ್ಲಿ ಅವರ ಬ್ರೈಡ್ಸ್ ಮೇಯ್ಡ್ ಆಗಿದ್ದ ಪರಿಣಿತಿ ಅವರಿಗೆ ಈಗ ಪ್ರಿಯಾಂಕಾ ಬ್ರೈಡ್ಸ್ ಮೇಯ್ಡ್ ಆಗಲಿದ್ದಾರೆ.

ಸದ್ಯ ರಾಘವ್ ಕೂಡಾ ಬ್ಯುಸಿಯಾಗಿದ್ದು ಇತ್ತ ಪರಿಣಿತಿ ಚೋಪ್ರಾ ಕೂಡಾ ಕೆಲವು ಪ್ರಾಜೆಕ್ಟ್​ಗಳಲ್ಲಿ ಬ್ಯುಸಿಯಾಗಿದ್ದಾರೆ ಎನ್ನಲಾಗಿದೆ. ಹಾಗಾಗಿ ಇಬ್ಬರೂ ಕೂಡಾ ಮದುವೆಗೆ ಅರ್ಜೆಂಟ್ ಮಾಡುತ್ತಿಲ್ಲ ಎನ್ನುವುದು ಸದ್ಯದ ಮಾಹಿತಿ.

ಕಳೆದ ಒಂದು ತಿಂಗಳಿಂದ ರಾಘವ್ ಹಾಗೂ ಪರಿಣಿತಿ ಚೋಪ್ರಾ ಹಲವಾರು ಸಲ ಹೊರಗಡೆ ಕಾಣಿಸಿಕೊಂಡಿದ್ದಾರೆ. ಹಲವಾರು ಸಲ ಒಟ್ಟಿಗೆ ಡೇಟ್​ಗೆ ಹೋಗಿದ್ದಾರೆ. ಈ ಸಂದರ್ಭ ಮಾಧ್ಯಮದ ಕಣ್ಣಿಗೂ ಬಿದ್ದಿದ್ದಾರೆ.

ರಾಘವ್ ಅವರು ಪರಿಣಿತಿ ಜೊತೆ ಸಮಯ ಕಳೆಯಲು ಮುಂಬೈಗೆ ಬಂದಾಗ ಈ ಎಲ್ಲ ಚರ್ಚೆ ಶುರುವಾಗಿತ್ತು. ನಂತರ ನಟಿ ಪರಿಣಿತಿ ಚೋಪ್ರಾ ಕೂಡಾ ಗೆಳೆಯನ ಜೊತೆ ಸಮಯ ಕಳೆಯಲು ದೆಹಲಿಗೆ ಬಂದಾಗ ಇವರ ಲವ್​ಸ್ಟೋರಿ ಹಿಂಟ್ ಸಿಕ್ಕಿತ್ತು.

ಇತ್ತೀಚೆಗೆ ಪರಿಣಿತಿ ಕಾಣಿಸಿಕೊಂಡಾಗ ಅವರ ಎಡಗೈನಲ್ಲಿ ಉಂಗುರವನ್ನು ಗುರುತಿಸಲಾಗಿದೆ. ಹಾಗಾಗಿ ಇವರು ನಿಶ್ಚಿತಾರ್ಥ ಮಾಡಿಕೊಂಡಿದ್ದಾರೆ ಎನ್ನುವ ಸಂದೇಹ ಬಲವಾಗಿದೆ. ಇಬ್ಬರೂ ಯುಕೆಯಲ್ಲಿ ಎಕನಾಮಿಕ್ಸ್ ಅಧ್ಯಯನ ಮಾಡಿದ್ದು ಇಬ್ಬರ ಆಸಕ್ತಿಯೂ ಒಂದೇ ಆಗಿದೆ.

ಇವರಿಬ್ಬರ ಕುಟುಂಬಸ್ಥರು ಕೂಡಾ ಬಹಳಷ್ಟು ವರ್ಷಗಳಿಂದ ಸ್ನೇಹಿತರು ಎನ್ನುವುದು ಇತ್ತೀಚೆಗಷ್ಟೇ ತಿಳಿದುಬಂದಿದೆ. ಹಾಗಾಗಿ ಈ ಜೋಡಿಗೆ ಕುಟುಂಬಸ್ಥರ ಸಮ್ಮತಿಯೂ ಸಿಕ್ಕಿದೆ.

ಅಂತೂ ಬಾಲಿವುಡ್ ನಟಿಯ ಮದುವೆ ಫಿಕ್ಸ್ ಆಗಿದ್ದು ಅಕ್ಟೋಬರ್​ನಲ್ಲಿ ಪರಿಣಿತಿ ಮಿಸಸ್ ಆಗಲಿದ್ದಾರೆ. ಇನ್ನು ಬೇರೆ ಯಾವ ಜೋಡಿ ಮದುವೆಯಾಗುತ್ತಾರೆ ಎನ್ನುವುದನ್ನು ಕಾದು ನೋಡಬೇಕು.