ಚಪಾಕ್, ತಾನ್ಹಾಜಿ ಚಿತ್ರಗಳ ಫ್ರೀ ಟಿಕೆಟ್: ಯಾರಿಗುಂಟು, ಯಾರಿಗಿಲ್ಲ..!

ದೀಪಿಕಾ ಪಡುಕೋಣೆ ಅಭಿನಯದ ಚಪಾಕ್, ಅಜಯ್ ದೇವಗನ್-ಸೈಫ್ ಅಲಿ ಖಾನ್ ನಟನೆಯ ತಾನ್ಹಾಜಿ ಹಾಗೂ ಸೂಪರ್ ಸ್ಟಾರ್ ರಜನಿಕಾಂತ್ ಅಭಿನಯದ ದರ್ಬಾರ್ ಚಿತ್ರಗಳು ಈ ವಾರ ಬಾಕ್ಸಾಫೀಸ್​ನಲ್ಲಿ ಮುಖಾಮುಖಿಯಾಗಿವೆ.

ಅದರಲ್ಲಿ ಚಪಾಕ್ ಚಿತ್ರವು ಆ್ಯಸಿಡ್ ಸಂತ್ರಸ್ತೆ ಲಕ್ಷ್ಮಿ ಅಗರ್ವಾಲ್ ಅವರ ಜೀವನಾಧಾರಿತ ಕಥೆ ಹೇಳಿದರೆ, ತಾನ್ಹಾಜಿ ಮರಾಠ ಚಕ್ರವರ್ತಿಯ ಐತಿಹಾಸಿಕ ಕಥೆಯನ್ನು ಬೆಳ್ಳಿಪರದೆ ಮೇಲೆ ತಿಳಿಸುತ್ತಿದೆ.

ಇನ್ನು ನಟಿ ದೀಪಿಕಾ ಪಡುಕೋಣೆ ಜೆಎನ್​ಯು ವಿವಿಗೆ ಭೇಟಿ ನೀಡಿ ವಿದ್ಯಾರ್ಥಿಗಳ ಪ್ರತಿಭಟನೆ ಬೆಂಬಲ ನೀಡಿರುವುದಕ್ಕೆ ಕೆಲವರು ಆಕ್ರೋಶ ವ್ಯಕ್ತಪಡಿಸಿದ್ದರು. ಅಲ್ಲದೆ ಚಪಾಕ್ ಚಿತ್ರವನ್ನು ಬಾಯ್ಕಟ್ ಮಾಡುವಂತೆ ಸೋಷಿಯಲ್ ಮೀಡಿಯಾದಲ್ಲಿ ಹ್ಯಾಷ್​ಟ್ಯಾಗ್ ಅಭಿಮಾನ ನಡೆಸಿದ್ದರು.

ಇಷ್ಟೆಲ್ಲಾ ವಿರೋಧದ ನಡುವೆ ಚಪಾಕ್ ತೆರೆಕಂಡಿದೆ. ಚಿತ್ರಕ್ಕೆ ಅತ್ಯುತ್ತಮ ರೆಸ್ಪಾನ್ಸ್ ವ್ಯಕ್ತವಾಗುತ್ತಿದೆ. ಅದರಲ್ಲೂ ಮಧ್ಯಪ್ರದೇಶದ ಭೂಪಾಲ್ ನಲ್ಲಿ ಎನ್​ಎಸ್​ಯುಐ ಕಾರ್ಯಕರ್ತರು ಚಪಾಕ್ ಟಿಕೆಟ್ ಹಂಚುವ ಮೂಲಕ ಚಿತ್ರದ ಬೆಂಬಲಕ್ಕೆ ನಿಂತಿದ್ದಾರೆ.

ಇನ್ನೊಂದೆಡೆ ಬಿಜೆಪಿ ಕಾರ್ಯಕರ್ತರು ಕೂಡ ಅಜಯ್ ದೇವಗನ್ ನಟನೆಯ ತಾನ್ಹಾಜಿ ಸಿನಿಮಾದ ಟಿಕೆಟ್​ಗಳನ್ನು ಉಚಿತವಾಗಿ ನೀಡುತ್ತಿದ್ದಾರೆ.

ಎರಡು ಪಕ್ಷಗಳ ಕಾರ್ಯಕರ್ತರ ಜಗಳದಿಂದ ಮೂರನೆಯವರಿಗೆ ಲಾಭ ಎನ್ನುವಂತೆ ಪ್ರೇಕ್ಷಕರಿಗೆ ಉಚಿತವಾಗಿ ಎರಡು ಸಿನಿಮಾಗಳನ್ನು ನೋಡಿ ಎಂಜಾಯ್ ಮಾಡುತ್ತಿದ್ದಾರೆ.

ಚಪಾಕ್ ಸಿನಿಮಾವನ್ನು ಮೇಘನಾ ಗುಲ್ಜಾರ್ ನಿರ್ದೇಶನ ಮಾಡಿದ್ದು, ಚಿತ್ರದಲ್ಲಿ ದೀಪಿಕಾ ಮಾಲ್ತಿ ಎಂಬ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

ಈ ಚಿತ್ರವು ಆ್ಯಸಿಡ್ ದಾಳಿಗೆ ಒಳಗಾಗಿದ್ದ ಲಕ್ಷ್ಮಿ ಅಗರ್ವಾಲ್ ಎಂಬ ಯುವತಿಯ ಕಥೆ ತಿಳಿಸುತ್ತದೆ. ಲಕ್ಷ್ಮಿಗೆ 15 ವರ್ಷವಿದ್ದಾಗ ಪರಿಚಿತ ವ್ಯಕ್ತಿಯಿಂದ ಆಸಿಡ್ ದಾಳಿಗೊಳಗಾಗಿದ್ದರು.

ಆನಂತರ ಲಕ್ಷ್ಮಿ ಯಾವ ರೀತಿ ಯಾತನೆ ಅನುಭವಿಸಿದಳು, ಸಮಾಜ ಆ್ಯಸಿಡ್ ದಾಳಿಗೊಳಗಾದ ಯುವತಿಯನ್ನು ಹೇಗೆ ನೋಡುತ್ತಿದ್ದರು. ಆರೋಪಿ ವಿರುದ್ಧ ಲಕ್ಷ್ಮಿ ಹೇಗೆ ಹೋರಾಟ ಮಾಡಿದಳು ಎಂಬುದನ್ನು ತಿಳಿಯಲು ಚಪಾಕ್ ಸಿನಿಮಾ ನೋಡಲೇಬೇಕು.