NMACC-Rekha: ಅಮಿತಾಭ್ ಬಚ್ಚನ್ ಸೊಸೆ, ಮೊಮ್ಮಗಳನ್ನು ಪ್ರೀತಿಯಿಂದ ತಬ್ಬಿಕೊಂಡ ರೇಖಾ! ಹಳೆ ಪ್ರೀತಿ ಮಧುರ ಎಂದ ನೆಟ್ಟಿಗರು

ಅಮಿತಾಭ್ ಬಚ್ಚನ್ ಮತ್ತು ರೇಖಾ ನಡುವಿನ ಸಂಬಂಧ ಎಲ್ಲರಿಗೂ ಗೊತ್ತಿರುವ ವಿಚಾರ. ಇವರಿಬ್ಬರ ಪ್ರೀತಿ ಇವತ್ತಿಗೂ ಚರ್ಚೆಯಾಗುತ್ತದೆ. ಅವರ ಕಥೆಯು ಬಾಲಿವುಡ್‌ನ ಅತ್ಯಂತ ಜನಪ್ರಿಯ ಪ್ರೇಮಕಥೆಗಳಲ್ಲಿ ಒಂದಾಗಿದೆ. ಪರಸ್ಪರ ಪ್ರೀತಿಸುತ್ತಿದ್ದ ಜೋಡಿ ಮದುವೆಯಾಗಲಿಲ್ಲ. ಅಮಿತಾಭ್ ಬಚ್ಚನ್ ಜಯಾ ಬಚ್ಚನ್ ಅವರನ್ನು ಮದುವೆಯಾಗುವಂತಾಯಿತು. ರೇಖಾ ಒಂಟಿಯಾಗಿ ಉಳಿದರು.

ಇತ್ತೀಚೆಗೆ ನೀತಾ ಮುಕೇಶ್ ಅಂಬಾನಿ ಕಲ್ಚರಲ್ ಸೆಂಟರ್​ನ ಕಾರ್ಯಕ್ರಮದಲ್ಲಿ ರೇಖಾ ಹಾಗೂ ಐಶ್ವರ್ಯಾ ಭೇಟಿಯಾದರು. ಐಶ್ವರ್ಯಾ ಅವರನ್ನು ಕಂಡು ಪ್ರೀತಿಯಿಂದ ಅಪ್ಪಿಕೊಂಡಿದ್ದಾರೆ ರೇಖಾ. ಅವರ ಮಗಳು ಆರಾಧ್ಯಾ ಬಚ್ಚನ್ ಅವರನ್ನು ಪ್ರೀತಿಯಿಂದ ಹಗ್ ಮಾಡಿದರು.

ಅರೆ ಇದರಲ್ಲೇನು ವಿಶೇಷ? ನಟಿ ರೇಖಾ ಅವರು ಕಾಜೊಲ್ ಅವರ ಪುತ್ರಿ ನೈಸಾ ಅವರನ್ನು ಹಗ್ ಮಾಡಿದ್ದರಲ್ಲಾ ಎನ್ನಬಹುದು. ಆದರೆ ಇದು ಹಾಗಲ್ಲ. ಅಮಿತಾಭ್ ಅವರ ಸೊಸೆ ಹಾಗೂ ಮೊಮ್ಮಗಳ ಜೊತೆ ಪೋಸ್ ಕೊಟ್ಟ ರೇಖಾ ಮುಖದಲ್ಲಿ ಸುಂದರವಾದ ನಗುವಿತ್ತು, ಆತ್ಮೀಯತೆ ತುಂಬಿತ್ತು.

ಇದಕ್ಕೆ ಕಾರಣವಿದೆ. ರೇಖಾ ಅವರು ಅಮಿತಾಭ್ ಬಚ್ಚನ್ ಅವರನ್ನು ತುಂಬಾ ಪ್ರೀತಿಸಿದ್ದರು. ಅವರಿಬ್ಬರು ಮದುವೆಯಾಗುವುದರಲ್ಲಿಯೂ ಇದ್ದರು. ಆದರೆ ಆ ಪ್ರೀತಿ ಸಕ್ಸಸ್ ಆಗಲಿಲ್ಲ. ಮದುವೆಯಲ್ಲಿ ಈ ಜೋಡಿ ಒಂದಾಗಲಿಲ್ಲ.

ಆದರೆ ರೇಖಾ ಅವರು ಎಂದಿಗೂ ಅಮಿತಾಭ್ ಬಚ್ಚನ್ ಅವರನ್ನಾಗಲೀ ಜಯಾ ಬಚ್ಚನ್ ಅವರನ್ನಾಗಲಿ ದೂರಲೇ ಇಲ್ಲ. ಯಾವುದೇ ಕಾರ್ಯಕ್ರಮದಲ್ಲಿ ಅಮಿತಾಭ್ ನನಗೆ ಮೋಸ ಮಾಡಿದರು ಎಂದು ಗೋಳು ತೋಡಿಕೊಳ್ಳಲಿಲ್ಲ.

ಪಾಸ್ಟ್ ಈಸ್ ಪಾಸ್ಟ್ ಎಂದುಬಿಟ್ಟಿದ್ದಾರೆ ರೇಖಾ. ಇವರಿಬ್ಬರ ಪ್ರೀತಿ ವಿಚಾರದಲ್ಲಿ ಹಲವು ಬಾರಿ ರೇಖಾ ಜಯಾಬಚ್ಚನ್ ಅವರಿಂದ ಅವಮಾನಕ್ಕೊಳಗಾಗಿದ್ದರೂ ರೇಖಾ ಮಾತ್ರ ಎಂದೂ ಅವರಿಗೆ ಅವಮಾನ ಮಾಡುವಂತಹ ಕೆಲಸ ಮಾಡಿಲ್ಲ ಎನ್ನುವುದು ಎಲ್ಲರಿಗೂ ಗೊತ್ತು.

ರೇಖಾ ಅವರು ಅಮಿತಾಭ್ ಬಚ್ಚನ್ ಹೆಸರಿನಲ್ಲಿಯೇ ಮಾಂಗಲ್ಯ ಧರಿಸುತ್ತಾರೆ ಎನ್ನುವ ಮಾತುಗಳೂ ಕೇಳಿಬಂದಿದ್ದವು. ಆದರೆ ಇವರಿಬ್ಬರೂ ತಮ್ಮ ಹಳೆಯ ಸಂಬಂಧದ ಬಗ್ಗೆ ಎಂದಿಗೂ ಮಾತನಾಡಲಿಲ್ಲ.

ಈಗ ಐಶ್ವರ್ಯಾ ರೈ ಹಾಗೂ ಆರಾಧ್ಯ ಅವರು ಎನ್​ಎಂಎಸಿಸಿ ಇವೆಂಟ್​ಗೆ ಬಂದಾಗ ರೇಖಾ ಅವರು ಖುಷಿಯಿಂದ ಅವರೊಂದಿಗೆ ಕ್ಯಾಮೆರಾಗೆ ಪೋಸ್ ಕೊಟ್ಟರು. ಮನೀಷ್ ಮಲ್ಹೋತ್ರಾ ಕ್ಲಿಕ್ ಮಾಡಿದ ಸೆಲ್ಫಿಯಲ್ಲಿ ಸೆಲೆಬ್ರಿಟಿಗಳ ನಗು, ಖುಷಿ ಹಾಗು ಪ್ರೀತಿಯನ್ನು ಒಂದೇ ಫ್ರೇಮ್​ನಲ್ಲಿ ಕಾಣಬಹುದು.

ಇನ್ನೊಂದು ಫೋಟೋದಲ್ಲಿ ರೇಖಾ ಅವರು ತಮ್ಮ ಮಾಜಿ ಪ್ರಿಯತಮನ ಮೊಮ್ಮಗಳು ಆರಾಧ್ಯ ಬಚ್ಚನ್ ಅವರನ್ನು ಪ್ರೀತಿಯಿಂದ ಅಪ್ಪಿಕೊಂಡಿದ್ದಾರೆ. ಈ ಫೊಟೋ ಸುಂದರವಾಗಿ ಮೂಡಿಬಂದಿದೆ. ಅದೇ ರೀತಿ ಈ ಪೋಟೋ ಸೋಷಿಯಲ್ ಮೀಡಿಯಾದಲ್ಲಿ ಭರ್ಜರಿಯಾಗಿ ವೈರಲ್ ಆಗಿದೆ.

ನಟಿ ರೇಖಾ ಅವರು ಹಳೆದ ಪ್ರೀತಿ, ಬ್ರೇಕಪ್, ನೋವು ಯಾವುದನ್ನೂ ಮನಸ್ಸಿನಲ್ಲಿ ಇಟ್ಟುಕೊಂಡಿಲ್ಲ. ಎಷ್ಟು ಆತ್ಮೀಯರಾಗಿ ಬಚ್ಚನ್ ಸೊಸೆ, ಮೊಮ್ಮಗಳೊಂದಿಗೆ ಪೋಸ್ ಕೊಟ್ಟಿದ್ದಾರೆ ನೋಡಿ ಎಂದು ನೆಟ್ಟಿಗರು ಕಮೆಂಟ್ ಮಾಡುತ್ತಿದ್ದಾರೆ.

ರೇಖಾ ಹಾಗೂ ಐಶ್ವರ್ಯಾ ರೈ, ಆರಾಧ್ಯ ಬಚ್ಚನ್ ಅವರ ಫೋಟೋಗಳು ವೈರಲ್ ಆಗಿದ್ದು ಅಭಿಮಾನಿಗಳನ್ನು ಇದನ್ನು ಇಷ್ಟಪಟ್ಟಿದ್ದಾರೆ. ರೇಖಾ ಅವರ ಪ್ರೀತಿಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.