Rider ಚಿತ್ರದ ಡವ್ವ ಡವ್ವ... ಮೊದಲ ಹಾಡಿನ ರಿಲೀಸ್​ ದಿನಾಂಕ ಫಿಕ್ಸ್​

ಸೀತಾರಾಮ ಕಲ್ಯಾಣ ಚಿತ್ರದ ಮೂಲಕ ಲವರ್ ಬಾಯ್​ ಆಗಿ ಸ್ಯಾಂಡಲ್​ವುಡ್​ ಪ್ರೇಕ್ಷಕರನ್ನು ರಂಜಿಸಿದ್ದ ನಿಖಿಲ್​ ಕುಮಾರಸ್ವಾಮಿ ಈಗ ಮತ್ತೆ ಅಂತಹದ್ದೇ ಪಾತ್ರದಲ್ಲಿ ರೈಡರ್​ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಸೀತಾರಾಮ ಕಲ್ಯಾಣ ಚಿತ್ರದ ನಂತರ ನಿಖಿಲ್​ ರಾಜಕೀಯದಲ್ಲಿ ಸಕ್ರಿಯವಾಗಿದ್ದರು. ಈ ಕಾರಣದಿಂದ ಅವರ ಯಾವುದೇ ಸಿನಿಮಾಗಳು ಸೆಟ್ಟೇರಿರಲಿಲ್ಲ. ನಂತರ ಕಳೆದ ದೀಪಾವಳಿ ಹಬ್ಬದ ಸಮಯದಲ್ಲಿ ರೈಡರ್ ಚಿತ್ರದ ಪೋಸ್ಟರ್​ ರಿಲೀಸ್ ಮಾಡುವ ಮೂಲಕ ತಮ್ಮ ಹೊಸ ಸಿನಿಮಾದ ಪ್ರಕಟಣೆ ಮಾಡಿದ್ದರು.

N4 ವರ್ಕಿಂಗ್ ಟೈಟಲ್​ನಲ್ಲೇ ಆರಂಭವಾದ ರೈಡರ್​ ಸಿನಿಮಾ ಈಗ ರಿಲೀಸ್​ಗೆ ರೆಡಿಯಾಗಿದೆ. ಟಾಲಿವುಡ್​ ನಿರ್ದೇಶಕ ಆ್ಯಕ್ಷನ್ ಕಟ್​ ಹೇಳಿರುವ ಚಿತ್ರದ ಟೀಸರ್ ಈಗಾಗಲೇ ರಿಲೀಸ್ ಆಗಿದ್ದು, ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿದೆ.

ಅರ್ಜುನ್ ಜನ್ಯ ಸಂಗೀತ ಕೊಟ್ಟಿರುವ ರೈಡರ್ ಸಿನಿಮಾದ ವಿಡಿಯೋ ಹಾಡು ಡವ್ವ ಡವ್ವ ಅಕ್ಟೋಬರ್ 16ರಂದು ರಿಲೀಸ್ ಆಗಲಿದೆ. ಇದು ಈ ಸಿನಿಮಾದಿಂದ ರಿಲೀಸ್​ ಆಗುತ್ತಿರುವ ಮೊಲದ ವಿಡಿಯೋ ಹಾಡಾಗಿದೆ.

ರೈಡರ್​ ಚಿತ್ರದಲ್ಲಿ ಚಿಕ್ಕಣ್ಣ, ದತ್ತಣ್ಣ ಹಾಗೂ ಶಿವರಾಜ್​ ಕೆ.ಆರ್ ಪೇಟೆ ಅವರ ತಾರಾಗಣವಿದೆ. ನಿಖಿಲ್​ ಕೈಯಲ್ಲಿ ಸಾಲು ಸಾಲು ಸಿನಿಮಾಗಳಿವೆ. ರೈಡರ್​ ಒಂದು ಪಕ್ಕಾ ಆ್ಯಕ್ಷನ್​ ಚಿತ್ರವಾಗಿದ್ದು, ಕನ್ನಡದ ಜೊತೆ ತೆಲುಗಿನಲ್ಲೂ ರಿಲೀಸ್ ಆಗಲಿದೆ.

ಜಾಗ್ವಾರ್​, ಸೀತಾರಾಮ ಕಲ್ಯಾಣ ಹಾಗೂ ಕುರುಕ್ಷೇತ್ರ ಸಿನಿಮಾದ ನಟಿಸುತ್ತಿರುವ ನಾಲ್ಕನೇ ಚಿತ್ರ ರೈಡರ್​ ಆಗಿದೆ. ಈ ಸಿನಿಮಾದಲ್ಲಿ ನಾಯಕಿಯಾಗಿ ಕಾಶ್ಮೀರಾ ಪರದೇಸಿ ನಟಿಸಿದ್ದಾರೆ. ಸದ್ಯ ನಿಖಿಲ್ ಅಪ್ಪನಾದ ಖುಷಿಯಲ್ಲಿದ್ದಾರೆ. ಕೆಲವೇ ದಿನಗ ಹಿಂದೆಯಷ್ಟೆ ನಿಖಿಲ್ ಹಾಗೂ ರೇವತಿ ಅವರ ಜೀವನಕ್ಕೆ ಗಂಡು ಮಗುವಿನ ಆಗಮನವಾಗಿದೆ.

ಮನೆಗೆ ಮಗ ಬಂದ ಖುಷಿಯಲ್ಲೇ ನಿಖಿಲ್ ತಮ್ಮ ಐದನೇ ಸಿನಿಮಾ ಸಹಿ ಮಾಡಿದ್ದಾರೆ. ಕೆವಿಎನ್​ ಪ್ರೊಡಕ್ಷನ್ಸ್​ ನಿರ್ಮಾಣದ ಈ ಹೊಸ ಸಿನಿಮಾವನ್ನು ಹೊಸ ನಿರ್ದೇಶಕ ಮಂಜು ಅಥರ್ವ ನಿರ್ದೇಶನ ಮಾಡಲಿದ್ದಾರಂತೆ. ಈ ಹಿಂದೆ ಮಂಜು ಅಥರ್ವ ಅವರು ಸಹ ನಿರ್ದೇಶಕನಾಗಿ ಕೆಲಸ ಮಾಡಿದ್ದಾರೆ.

ಕೆವಿಎನ್​ ಪ್ರೊಡಕ್ಷನ್ಸ್​ ಈಗಾಗಲೇ ಬೈಟು ಲವ್​, ಸಖತ್​ ಹಾಗೂ ಪ್ರೇಮ್​ ಹಾಗೂ ಧ್ರುವ ಸರ್ಜಾ ನಟನೆಯ ಸಿನಿಮಾ ನಿರ್ಮಾಣಕ್ಕೂ ಹಣ ಹೂಡಿದ್ದು, ತಮ್ಮ ಬ್ಯಾನರ್ ಅಡಿ ನಿರ್ಮಿಸುತ್ತಿರುವ ನಾಲ್ಕನೇ ಚಿತ್ರವನ್ನು ನಿಖಿಲ್​ ಜೊತೆ ಮಾಡಲಿದೆ. ಇನ್ನು, ಮೊದಲು ಫೋಟೋಶೂಟ್​ ಮುಗಿದ ಕೂಡಲೇ ಸಿನಿಮಾ ಚಿತ್ರೀಕರಣ ಸಹ ಆರಂಭವಾಗಲಿದೆಯಂತೆ.