Priyanka Chopra ಮಿಸ್​ ವರ್ಲ್ಡ್ ಗೆದ್ದಾಗ ಆಕೆಯ ಗಂಡನಿಗೆ 7 ವರ್ಷವಂತೆ, ಫುಲ್​ ಕಥೆ ಹೇಳಿದ ಪಿಗ್ಗಿ!

ಮಿಸ್‌ ವರ್ಲ್ಡ್ ಪಟ್ಟ ಗೆದ್ದು ನಂತರ ಬಾಲಿವುಡ್‌ಗೆ ಪಾದಾರ್ಪಣೆ ಮಾಡಿ ಇಂದಿಗೂ ಟಾಪ್‌ ಹಿರೋಯಿನ್‌ಗಳ ಪಟ್ಟಿಯಲ್ಲಿದ್ದಾರೆ ದೇಸಿ ಗರ್ಲ್‌ ಪ್ರಿಯಾಂಕಾ ಚೋಪ್ರಾ. ದೊಡ್ಡ ದೊಡ್ಡ ಹಿಟ್‌ ಸಿನಿಮಾ, ಜಾಹೀರಾತು ಅದು ಇದು ಅಂತಾ ಬ್ಯುಸಿ ಇದ್ದ ಚೆಲುವೆ ಕೊನೆಗೂ 2018ರಲ್ಲಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟರು. ಪ್ರಿಯಾಂಕ ಚೋಪ್ರಾ 2018 ಡಿಸೆಂಬರ್‌ನಲ್ಲಿ ತಮ್ಮ ಗೆಳೆಯ, ವಿದೇಶಿ ಗಾಯಕ ನಿಕ್ ಜೋನಸ್ ಕೈ ಹಿಡಿದರು. ಈ ದಂಪತಿಗೆ ಒಂದು ಮುದ್ದಾದ ಹೆಣ್ಣು ಮಗು ಕೂಡ ಇದೆ.

ಹತ್ತು ವರ್ಷ ಚಿಕ್ಕವರನ್ನು ಮದುವೆಯಾದ ಪಿಗ್ಗಿ: ಪ್ರಿಯಾಂಕಾ ಮದುವೆ ಸಂದರ್ಭದಲ್ಲಿ ತುಂಬಾ ಚರ್ಚೆಯಾಗಿದ್ದು, ಇವರಿಬ್ಬರ ನಡುವಿನ ವಯಸ್ಸಿನ ಅಂತರ. 38 ವರ್ಷದ ಪ್ರಿಯಾಂಕಾ ಚೋಪ್ರಾ ಹಾಗೂ 28 ವರ್ಷದ ನಿಕ್ ಜೋನಾಸ್ ಅವರನ್ನು ಮದುವೆಯಾಗಿದ್ದಾರೆ.

ಈ ಬಗ್ಗೆ ಟ್ರೋಲ್‌, ಟೀಕೆ ಎಲ್ಲಾ ವ್ಯಕ್ತವಾದರೂ ಈ ಇಬ್ಬರೂ ದಂಪತಿ ಯಾವುದಕ್ಕೂ ತಲೆ ಕಡೆಸಿಕೊಳ್ಳದೇ ಟ್ರೋಲ್‌ಗಳಿಗೆ ಪ್ರೀತಿ, ಅನ್ಯೂನ್ಯತೆಯ ಮೂಲಕವೇ ಉತ್ತರ ನೀಡುತ್ತಿದ್ದಾರೆ. ಇತ್ತೀಚಿನ ದಿ ಜೆನ್ನಿಫರ್ ಹಡ್ಸನ್ ಶೋನಲ್ಲಿ ಪ್ರಿಯಾಂಕಾ ಚೋಪ್ರಾ ಜೋನಾಸ್ ಕಾಣಿಸಿಕೊಂಡರು. ಇಲ್ಲಿ ಪತಿ ನಿಕ್‌ ಜೋನಸ್‌ ತಮ್ಮನ್ನು ಯಾವಾಗ ನೋಡಿದರು ಎಂಬುದರ ಬಗ್ಗೆ ಒಂದು ಸ್ವಾರಸ್ಯಕರ ವಿಚಾರವನ್ನು ಹಂಚಿಕೊಂಡಿದ್ದಾರೆ.

ಪ್ರಿಯಾಂಕಾ ತಮ್ಮ ಹೊಸ ಚಿತ್ರ ಲವ್ ಎಗೇನ್ ಮತ್ತು ಅವರ ಇತ್ತೀಚಿನ ಪ್ರೈಮ್ ವಿಡಿಯೋ ಸರಣಿ ಸಿಟಾಡೆಲ್‌ಗೆ ಪ್ರಚಾರದ ಭಾಗವಾಗಿ ಶೋಗೆ ಬಂದಿದ್ದರು. ಇಲ್ಲಿ ಅವರು ನಿಕ್‌ ತಾಯಿ ಹೇಳಿದ ಒಂದು ಘಟನೆಯನ್ನು ನೆನಪಿಸಿಕೊಂಡರು.

"ನಾನು ಮಿಸ್‌ ವರ್ಲ್ಡ್ ಪಟ್ಟ ಗೆದ್ದಾಗ ನಿಕ್‌ಗೆ 7 ವರ್ಷ": ನಿಕ್‌ ಜೋನಸ್‌ ಮತ್ತು ಕುಟುಂಬ ನಾನು ಮಿಸ್‌ ವರ್ಲ್ಡ್ ಪಟ್ಟ ಗೆದ್ದಾಗ ನನ್ನನ್ನು ಮೊದಲ ಬಾರಿಗೆ ನೋಡಿದ್ದಾರೆ. ನಿಕ್‌ ಜೋನಸ್‌ ಆಗ ಏಳು ವರ್ಷದವರಾಗಿದ್ದರೆಂದು ನಮ್ಮ ಅತ್ತೆ ನನಗೆ ಹೇಳಿದ್ದರು ಎಂಬ ಇಂಟರೆಸ್ಟಿಂಗ್‌ ಮಾಹಿತಿಯನ್ನು ಬಿಚ್ಚಿಟ್ಟಿದ್ದಾರೆ.

ಪ್ರಿಯಾಂಕಾ 2000ನೇ ಇಸವಿಯಲ್ಲಿ ಅವರು ಮಿಸ್​ ವರ್ಲ್ಡ್​ ಕಿರೀಟ ಮುಡಿಗೇರಿಸಿಕೊಂಡಿದ್ದರು. ಈ ಕ್ಷಣವನ್ನು ನೆನಪಿಸಿಕೊಂಡ ಪ್ರಿಯಾಂಕಾ ಈ ಕಾರ್ಯಕ್ರಮ ಲಂಡನ್‌ನಲ್ಲಿತ್ತು. ನನಗೆ ಆಗಿನ್ನೂ 17 ವರ್ಷ ತುಂಬಿತ್ತು ಎಂದು ಹೇಳಿದರು. ನನ್ನ ಅತ್ತೆ ಕೂಡ ಈ ಕ್ಷಣದ ನೆನಪುಗಳನ್ನು ನನ್ನ ಬಳಿ ಹಂಚಿಕೊಂಡಿದ್ದಾರೆ. ನಾನು ಆ ಪಟ್ಟ ಗೆದ್ದಾಗ ನನ್ನ ಅತ್ತೆಯವರು ಲಂಡನ್‌ನಲ್ಲಿದ್ದರಂತೆ, ನನಗೆ ನಿನ್ನನ್ನು ನೋಡಿದ ಆ ಸಂದರ್ಭ ಇನ್ನೂ ನೆನಪಿದೆ ಎಂದು ಹೇಳಿದರು.

ನಾನು ಮಿಸ್​ ವರ್ಲ್ಡ್ ಆಗಿದ್ದಾಗ ನಿಕ್‌ ಜೋನಸ್‌ಗೆ ಏಳು ವರ್ಷ ವಯಸ್ಸಾಗಿತ್ತಂತೆ. ತನ್ನ ಹೆಂಡತಿ ಈ ಪಟ್ಟ ಗೆಲ್ಲುವುದನ್ನು ನನ್ನ ಮಗ ನೋಡಿದ್ದನು ಎಂದು ನಿಕ್‌ ತಾಯಿ ಪ್ರಿಯಾಂಕಾ ಅವರಿಗೆ ಹೇಳಿದ್ದರಂತೆ.

ಈ ಎಲ್ಲಾ ಕ್ಷಣಗಳು ತುಂಬಾ ಕಾಕತಾಳಿಯ ಎನಿಸುವಂತಿದೆ. ಅವನಿಗೆ ಏಳು, ನನಗೆ 17 ವರ್ಷ. ಎಲ್ಲವೂ ಒಂದಕ್ಕೊಂದು ಸಂಬಂಧ ಇದ್ದಂತೆ ಭಾಸವಾಗುತ್ತಿದೆ ಎಂದು ಪ್ರಿಯಾಂಕಾ ಶೋನಲ್ಲಿ ಹೇಳಿಕೊಂಡರು. ತಾಯಂದಿರ ದಿನದ ಬಗ್ಗೆ ಮಾತನಾಡಿದ ಚೋಪ್ರಾ ತನ್ನ ಮೊದಲ ತಾಯಂದಿರ ದಿನವನ್ನು ತನ್ನ ಮಗಳು ಮಾಲ್ತಿಯೊಂದಿಗೆ ಆಚರಿಸುವುದಾಗಿ ಹೇಳಿಕೊಂಡರು.

ಲವ್ ಎಗೇನ್ ಬಿಡುಗಡೆ: ಚೋಪ್ರಾ ಜೋನಾಸ್ ಅವರ ಹೊಸ ಚಿತ್ರ ಲವ್ ಎಗೇನ್ ಈಗ ಬಿಡುಗಡೆಯಾಗಿದೆ. ಇದರಲ್ಲಿ ಪ್ರಿಯಾಂಕ, ಮಿರಾ ರೇ ಎಂಬ ಯುವತಿ ಪಾತ್ರದಲ್ಲಿ ನಟಿಸಿದ್ದಾರೆ. ಚಿತ್ರವನ್ನು ಸ್ಕ್ರೀನ್‌ ಜೆಮ್ಸ್‌ ಹಾಗೂ ಥಂಡರ್‌ ರೋಡ್‌ ಪಿಕ್ಚರ್ಸ್‌ ಬ್ಯಾನರ್‌ ಅಡಿ ಜೇಮ್ಸ್‌ ಸಿ ಸ್ಟ್ರೋಸ್‌ ಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ.

ಬಾಲಿವುಡ್‌ ನಟಿ ಪ್ರಿಯಾಂಕ ಚೋಪ್ರಾ ಈಗ ಗ್ಲೋಬಲ್‌ ಸ್ಟಾರ್‌ ಅನ್ನೋದು ತಿಳಿದ ವಿಚಾರ. ಮದುವೆ ಆದಾಗಿನಿಂದ ಪತಿ ನಿಕ್‌ ಜೋನಸ್‌ ಜೊತೆ ಅಮೆರಿಕದ ಲಾಸ್‌ ಏಂಜಲೀಸ್‌ನಲ್ಲಿ ನೆಲೆಸಿರುವ ಪ್ರಿಯಾಂಕ ಚೋಪ್ರಾ, ಈಗ ಹಿಂದಿಗಿಂತ ಹಾಲಿವುಡ್‌ ಸಿನಿಮಾಗಳಲ್ಲಿ ಸಕ್ರಿಯರಾಗಿದ್ದಾರೆ.