Actor Vishal: 15 ಕೋಟಿ ನೀಡದೆ ಸಿನಿಮಾ ರಿಲೀಸ್ ಮಾಡುವಂತಿಲ್ಲ! ನಟ ವಿಶಾಲ್​ಗೆ ಸಂಕಷ್ಟ

15 ಕೋಟಿಯನ್ನು ಪಾವತಿ ಮಾಡದ ಹೊರತು ನಟ ವಿಶಾಲ್​ ಯಾವುದೇ ಸಿನಿಮಾವನ್ನು ರಿಲೀಸ್ ಮಾಡುವಂತಿಲ್ಲ ಎಂದು ಮದ್ರಾಸ್ ಹೈಕೋರ್ಟ್ ತೀರ್ಪು ನೀಡಿದೆ. ಈ ಪ್ರಕರಣದಲ್ಲಿ ಏಕಸದಸ್ಯ ಪೀಠ ಕೊಟ್ಟಂತಹ ಈ ತೀರ್ಪನ್ನು ಮದ್ರಾಸ್ ಹೈಕೋರ್ಟ್ ಎತ್ತಿಹಿಡಿದಿದೆ. ಅದೇ ರೀತಿ ನಟ, ನಿರ್ದೇಶಕ, ನಿರ್ಮಾಪಕ ವಿಶಾಲ್ ಅವರಿಗೆ ಶೀಘ್ರ ಹಣವನ್ನು ಪಾವತಿಸುವಂತೆ ತಿಳಿಸಿದೆ.

21.29 ಕೋಟಿ ಸಾಲ ಪಡೆದ ವಿಚಾರವಾಗಿ ತಮಿಳುನಾಡಿನ ಖ್ಯಾತ ನಿರ್ಮಾಣ ಸಂಸ್ಥೆ ಲೈಕಾ ಪ್ರೊಡಕ್ಷನ್ಸ್ ನಟ ವಿಶಾಲ್ ವಿರುದ್ಧ ಕೇಸ್ ದಾಖಲಿಸಿತ್ತು. ಈ ಪ್ರಕರಣದ ತೀರ್ಪು ಹೊರಬಿದ್ದಿದ್ದು ಹಣವನ್ನು ಹಿಂದಿರುಗಿಸದ ಹೊರತಾಗಿ ವಿಶಾಲ್ ನಿರ್ಮಾಣದ, ಅಥವಾ ಬಂಡವಾಳ ಹೂಡಿರುವ ಯಾವುದೇ ಸಿನಿಮಾವನ್ನು ಥಿಯೇಟರ್ ಅಥವಾ ಒಟಿಟಿಯಲ್ಲಿ ರಿಲೀಸ್ ಮಾಡಬಾರದು ಎಂದು ನ್ಯಾಯಾಲಯ ತಿಳಿಸಿದೆ.

ಕಾಲಿವುಡ್​ನ ಖ್ಯಾತ ನಟ ವಿಶಾಲ್ ಅವರು ತಮ್ಮ ನಿರ್ಮಾಣ ಕಂಪನಿ ವಿಶಾಲ್ ಫಿಲ್ಮ್ ಫ್ಯಾಕ್ಟರಿಯ ಸಿನಿಮಾ ನಿರ್ಮಾಣಕ್ಕಾಗಿ ಗೋಪುರಂ ಫಿಲ್ಮ್ಸ್‌ನ ಅನ್ಬುಚೆಜಿಯನ್ ಅವರಿಂದ ಒಟ್ಟು 21.29 ಕೋಟಿ ರೂಪಾಯಿಗಳನ್ನು ಸಾಲವಾಗಿ ಪಡೆದಿದ್ದರು. ಈ ಮೊತ್ತ ಇನ್ನೂ ಪಾವತಿಸಲು ಬಾಕಿ ಇದ್ದಾಗಲೇ ಲೈಕಾ ಪ್ರೊಡಕ್ಷನ್ಸ್ ಇದಕ್ಕೆ ಎಂಟ್ರಿ ಕೊಟ್ಟಿದೆ. ಅನ್ಬುಚೆಜಿಯನ್‌ಗೆ ಹಣವನ್ನು ಲೈಕಾ ಪಾವತಿ ಮಾಡಿತು. ಈ ನಿಟ್ಟಿನಲ್ಲಿ ವಿಶಾಲ್ ಮತ್ತು ಲೈಕಾ ನಡುವೆ ಒಪ್ಪಂದ ನಡೆದಿತ್ತು. ಸಂಪೂರ್ಣ ಸಾಲದ ಮೊತ್ತವನ್ನು ಮರುಪಾವತಿ ಮಾಡುವವರೆಗೆ ಎಲ್ಲಾ ವಿಶಾಲ್ ಫಿಲ್ಮ್ ಕಂಪನಿ ನಿರ್ಮಾಣದ ಹಕ್ಕುಗಳನ್ನು ಲೈಕಾ ಪಡೆಯುತ್ತದೆ ಎಂದು ಒಪ್ಪಂದವಾಗಿತ್ತು.

ಆದರೆ ಒಪ್ಪಂದವನ್ನು ಮೀರಿ ನಟ ವಿಶಾಲ್ ಒಡೆತನದ ವಿಶಾಲ್ ಫಿಲ್ಮ್ ಫ್ಯಾಕ್ಟರಿ ವೀರಮೆ ವಾಗೈ ಸೂಡುಂ ಸಿನಿಮಾವನ್ನು 2022ರಲ್ಲಿ ರಿಲೀಸ್ ಮಾಡಿತು. ಈ ಸಂದರ್ಭ ಪಾವತಿಸಬೇಕಾದ ಹಣವನ್ನೂ ಪಾವತಿ ಮಾಡಿರಲಿಲ್ಲ. ಈ ನಿಟ್ಟಿನಲ್ಲಿ ಲೈಕಾ ಪ್ರೊಡಕ್ಷನ್ ವಿಶಾಲ್ ವಿರುದ್ಧ ಕಾನೂನು ಕ್ರಮ ಕೈಗೊಂಡು ಕೇಸ್ ದಾಖಲಿಸಿತ್ತು.

ಏಕಸದಸ್ಯ ಪೀಠ ವಿಶಾಲ್ ಅವರಿಗೆ 15 ಕೋಟಿಯನ್ನು ಪಾವತಿಸುವಂತೆ ಹೇಳಿದ್ದರು. ಸಿವಿಲ್ ಪ್ರಕರಣದ ಕ್ರೆಡಿಟ್‌ಗೆ ಎಫ್​ಡಿ ಖಾತೆಯಲ್ಲಿ 15 ಕೋಟಿ ರೂಪಾಯಿಗಳನ್ನು ಜಮಾ ಮಾಡಲು ಮತ್ತು ಮೂಲ ಎಫ್‌ಡಿ ರಸೀದಿಯನ್ನು ಹೈಕೋರ್ಟ್‌ನ ಮುಖ್ಯ ರಿಜಿಸ್ಟ್ರಾರ್‌ಗೆ ವರ್ಗಾಯಿಸುವಂತೆ ನ್ಯಾಯಾಧೀಶರು ನಟ ವಿಶಾಲ್‌ಗೆ ಆದೇಶಿಸಿದ್ದಾರೆ.

ಈ ಎಫ್‌ಡಿಯನ್ನು ಮೂಲತಃ ಒಂದು ವರ್ಷಕ್ಕೆ ಮಂಜೂರು ಮಾಡಲಾಗಿತ್ತು. ಈ ಪ್ರಕರಣ ಇತ್ಯರ್ಥವಾಗುವವರೆಗೆ ವಿಸ್ತರಿಸಬೇಕಿತ್ತು. ಏಕ ನ್ಯಾಯಾಧೀಶರ ಈ ಸೂಚನೆಯನ್ನು ಪ್ರಶ್ನಿಸಿ ನಟ ಸಲ್ಲಿಸಿದ್ದ ಮೇಲ್ಮನವಿಯನ್ನು ಮುಖ್ಯ ನ್ಯಾಯಮೂರ್ತಿ ರಾಜಾ ಮತ್ತು ನ್ಯಾಯಮೂರ್ತಿ ಭರತ ಚಕ್ರವರ್ತಿ ಅವರ ಸಮಿತಿಯು ವಿಚಾರಣೆ ನಡೆಸುತ್ತಿದೆ.

ನಾನು ಲೈಕಾ ಪ್ರೊಡಕ್ಷನ್ಸ್​ನಿಂದ ಸಾಲ ಪಡೆದಿಲ್ಲ ಎಂದು ವಿಶಾಲ್ ವಾದಿಸಿದ್ದಾರೆ. ಹೆಚ್ಚುವರಿಯಾಗಿ ಲೈಕಾ ಕೇಸ್ ದಾಖಲಿಸಿದ ಕಾರಣವನ್ನು ವಿರೋಧಿಸಿದ್ದಾರೆ. ಲೈಕಾ ಅವರ ಕೆಲವು ವಾದಗಳು ಸ್ಥಿರವಾಗಿಲ್ಲ ಎಂದು ಹೇಳಲಾಗಿದೆ. ಒಪ್ಪಂದವನ್ನು ಉಲ್ಲೇಖಿಸಿದ ಲೈಕಾ ಪ್ರೊಡಕ್ಷನ್ಸ್ ಕಂಪನಿ ವಿಶಾಲ್ ಅವರ ಸಾಲದ ಖಾತೆಯನ್ನು ಸ್ವಾಧೀನಪಡಿಸಿಕೊಳ್ಳುವುದಾಗಿ ಪತ್ರಿಕೆಗಳಲ್ಲಿ ಸ್ಪಷ್ಟವಾಗಿ ಹೇಳಿದೆ. ಇದಕ್ಕೆ ಬದಲಾಗಿ, ವಿಶಾಲ್ ಲೈಕಾಗೆ ಮರುಪಾವತಿ ಮಾಡಬೇಕಾಗಿತ್ತು ಎಂದು ತಿಳಿಸಿದೆ.