Madhuri Dixit: ಖ್ಯಾತ ಕ್ರಿಕೆಟಿಗನಿಗೆ ಮನಸೋತಿದ್ದ ಮಾಧುರಿ, ಆತನಿಂದ ದೂರಾಗಿದ್ದೇಕೆ ಧಕ್ ಧಕ್ ಬೆಡಗಿ?

ಬಾಲಿವುಡ್‌ನ 'ಧಕ್ ಧಕ್ ಗರ್ಲ್' ಮಾಧುರಿ ದೀಕ್ಷಿತ್ ಹೆಸರು ಈ ಹಿಂದೆ ಭಾರತೀಯ ಕ್ರಿಕೆಟ್ ತಂಡದ ಮಾಜಿ ಕ್ರಿಕೆಟಿಗನ ಜೊತೆ ಥಳುಕು ಹಾಕಿಕೊಂಡಿತ್ತು. ಆ ಕ್ರಿಕೆಟಿಗನಿಗೆ ಬೌಲ್ಡ್ ಆಗಿದ್ದ ಮಾಧುರಿ, ಅವರನ್ನೇ ಮದ್ವೆಯಾಗಲು ಯತ್ನಿಸಿದ್ದರು. ಆದರೆ ಅವರ ಪ್ರೀತಿ ಫಲಿಸಲೇ ಇಲ್ಲ!

ಮಾಧುರಿ ದೀಕ್ಷಿತ್ 80 ಮತ್ತು 90ರ ದಶಕದ ಜನಪ್ರಿಯ ನಟಿಯರಲ್ಲಿ ಒಬ್ಬರು. ಮದುವೆಗೂ ಮುನ್ನ ಮಾಧುರಿ ಅವರ ಹೆಸರು ಸಂಜಯ್ ದತ್, ಜಾಕಿ ಶ್ರಾಫ್ ಮತ್ತು ಮಿಥುನ್ ಚಕ್ರವರ್ತಿಯಂತಹ ನಟರೊಂದಿಗೆ ಸೇರಿಕೊಂಡಿತ್ತು. ಆದರೆ ಮಾಧುರಿ ಭಾರತೀಯ ಕ್ರಿಕೆಟಿಗ ಅಜಯ್ ಜಡೇಜಾ ಅವರೊಂದಿಗೆ ಡೇಟಿಂಗ್ ಮಾಡುತ್ತಿದ್ದರು ಎನ್ನಲಾಗಿದೆ.

ಮಾಧುರಿ ದೀಕ್ಷಿತ್ ಮತ್ತು ಅಜಯ್ ಜಡೇಜಾ ಪ್ರೀತಿ ಫಿಲ್ಮ್‌ಫೇರ್ ಫೋಟೋಶೂಟ್ ಸಮಯದಲ್ಲಿ ಪ್ರಾರಂಭವಾಯಿತು. ಫಿಲ್ಮ್‌ಫೇರ್ ಫೋಟೋಶೂಟ್‌ಗಾಗಿ ಇಬ್ಬರೂ ತುಂಬಾ ರೋಮ್ಯಾಂಟಿಕ್ ಪೋಸ್‌ಗಳನ್ನು ನೀಡಿದ್ದರು. ಬಳಿಕ ಅಜಯ್ ಸಿನಿಮಾಗಳಲ್ಲಿ ಕೆಲಸ ಮಾಡಲು ಬಯಸಿದ್ದರಿಂದ ಮಾಧುರಿ ದೀಕ್ಷಿತ್ ಅವರು ಅಜಯ್‌ಗಾಗಿ ಚಲನಚಿತ್ರ ನಿರ್ಮಾಪಕರೊಂದಿಗೆ ಮಾತನಾಡಿದ್ದರಂತೆ.

ಮಾಧುರಿ ದೀಕ್ಷಿತ್ ಮತ್ತು ಅಜಯ್ ಜಡೇಜಾ ನಡುವೆ ಎಲ್ಲವೂ ಚೆನ್ನಾಗಿತ್ತು, ಆದರೆ ಇದ್ದಕ್ಕಿದ್ದಂತೆ ಅವರ ಸಂಬಂಧ ಹಳಸಲು ಶುರುವಾಯ್ತು. ಅತ್ತ ಅಜಯ್ ಜಡೇಜಾ ಅವರ ಕ್ರಿಕೆಟ್ ಪ್ರದರ್ಶನದಲ್ಲಿ ಕಳಪೆಯಾಗತೊಡಗಿತು. ಅದರ ಪರಿಣಾಮ ಅವರ ಸಂಬಂಧದ ಮೇಲೂ ಗೋಚರಿಸಿತು.

ಅಜಯ್ ಜಡೇಜಾ ರಾಜಮನೆತನಕ್ಕೆ ಸೇರಿದವರು. ಮಾಧುರಿ ಬ್ರಾಹ್ಮಣ ಮಧ್ಯಮ ವರ್ಗದ ಕುಟುಂಬಕ್ಕೆ ಸೇರಿದವರು. ಹೀಗಿರುವಾಗ ಅಜಯ್ ಮನೆಯವರು ಈ ಸಂಬಂಧವನ್ನು ಒಪ್ಪಿರಲಿಲ್ಲ. 1999ರಲ್ಲಿ ಮೊಹಮ್ಮದ್ ಅಜರುದ್ದೀನ್ ಜೊತೆಗೆ ಕ್ರಿಕೆಟಿಗರು ಮ್ಯಾಚ್ ಫಿಕ್ಸಿಂಗ್‌ನಲ್ಲಿ ತಪ್ಪಿತಸ್ಥರೆಂದು ಸಾಬೀತಾದಾಗ, ಅಜಯ್ ಜಡೇಜಾ ಕೂಡ ನಿಷೇಧಕ್ಕೊಳಗಾದರು. ಅತ್ತ ಮಾಧುರಿ ಮತ್ತು ಅಜಯ್ ಅವರ ಸಂಬಂಧವು ಕೊನೆಗೊಂಡಿತು.

ಇದಾದ ನಂತರ ಮಾಧುರಿ ದೀಕ್ಷಿತ್ ಅಜಯ್ ಜಡೇಜಾ ಅವರೊಂದಿಗಿನ ಎಲ್ಲಾ ಸಂಪರ್ಕಗಳನ್ನು ಕೊನೆಗೊಳಿಸಿದರು. ಮಾಧುರಿ ಅಮೆರಿಕಕ್ಕೆ ಹೋಗಿ ಡಾ.ಶ್ರೀರಾಮ್ ನೆನೆಯನ್ನು ಮದುವೆಯಾಗಿ ನಂತರ ಅಲ್ಲೇ ನೆಲೆಸಿದರು. ಮದುವೆಯಾಗಿ ಹಲವು ವರ್ಷಗಳ ಬಳಿಕ ಮತ್ತೆ ಮುಂಬೈಗೆ ಬಂದ ಮಾಧುರಿ ಈಗ ಪತಿಯೊಂದಿಗೆ ಇಲ್ಲಿಯೇ ನೆಲೆಸಿದ್ದಾರೆ.

ಮತ್ತೊಂದೆಡೆ, ಅಜಯ್ ಜಡೇಜಾ ಅವರು ಖ್ಯಾತ ರಾಜಕಾರಣಿ ಜಯಾ ಜೇಟ್ಲಿ ಅವರ ಪುತ್ರಿ ಅದಿತಿ ಜೇಟ್ಲಿ ಅವರನ್ನು ವಿವಾಹವಾದರು. ಅಜಯ್ ಜಡೇಜಾ ಮತ್ತು ಅದಿತಿಗೆ ಇಬ್ಬರು ಮಕ್ಕಳಿದ್ದಾರೆ.