'ಕವಲುದಾರಿ' ನಾಯಕನ ಬದುಕಲ್ಲಿ ಹೊಸ ತಿರುವು; ನಟ ರಿಷಿ ಮದುವೆಯಾಗುವ ಹುಡುಗಿ ಯಾರು ಗೊತ್ತಾ?

ಸ್ಯಾಂಡಲ್​ವುಡ್​ನ ಯುವನಟ ರಿಷಿ ದಾಂಪತ್ಯ ಜೀವನಕ್ಕೆ ಕಾಲಿಡಲು ಸಿದ್ಧರಾಗಿದ್ದಾರೆ.

ಕಿರುತೆರೆಯಲ್ಲಿ ನಟನೆಯನ್ನು ಆರಂಭಿಸಿ ಬೆಳ್ಳಿತೆರೆಗೆ ಕಾಲಿಟ್ಟ ನಟ ರಿಷಿ ನಾಯಕನಾಗಿ ನಟಿಸಿದ ಮೊದಲ ಸಿನಿಮಾದಲ್ಲೇ ಸಿನಿಪ್ರೇಮಿಗಳ ಗಮನ ಸೆಳೆದವರು.

'ಮನಿ ಹನಿ ಶನಿ' ಎಂಬ ಬಹುತಾರಾಗಣದ ಸಿನಿಮಾದಲ್ಲಿ ಮೊದಲು ನಟಿಸಿದ್ದರೂ ಪೂರ್ಣ ಪ್ರಮಾಣದ ನಾಯಕನಾಗಿ ಗುರುತಿಸಿಕೊಂಡಿದ್ದು 'ಸಿಂಪಲ್ ಆಗೊಂದ್ ಲವ್​ಸ್ಟೋರಿ' ಖ್ಯಾತಿಯ ನಿರ್ದೇಶನ ಸುನಿ ಅವರ 'ಆಪರೇಷನ್ ಅಲಮೇಲಮ್ಮ' ಸಿನಿಮಾದಲ್ಲೇ.

ನಂತರ ತೆರೆಕಂಡ 'ಗೋಧಿ ಬಣ್ಣ ಸಾಧಾರಾಣ ಮೈಕಟ್ಟು' ಸಿನಿಮಾ ಖ್ಯಾತಿಯ ಹೇಮಂತ್ ರಾವ್ ನಿರ್ದೇಶನದ 'ಕವಲುದಾರಿ' ಸಿನಿಮಾದಲ್ಲಿ ಟ್ರಾಫಿಕ್ ಪೊಲೀಸ್ ಆಗಿ ಕಾಣಿಸಿಕೊಂಡಿದ್ದ ರಿಷಿ ಗಮನ ಸೆಳೆದಿದ್ದರು.

'ಆಪರೇಷನ್ ಅಲಮೇಲಮ್ಮ' ಸಿನಿಮಾದ ಚೊಚ್ಚಲ ನಟನೆಗೆ ರಿಷಿಗೆ ಸೈಮಾ ಪ್ರಶಸ್ತಿಯೂ ಲಭಿಸಿತ್ತು.

ಬೆಳ್ಳಿತೆರೆಗೆ ಬರುವ ಮೊದಲು 'ಮಹಾಪರ್ವ' ಮತ್ತು 'ಅನುರೂಪ' ಧಾರಾವಾಹಿಯಲ್ಲಿ ರಿಷಿ ಅಭಿನಯಿಸಿದ್ದರು.

ನಾಯಕನಾಗಿ ನಟಿಸಿದ ಎರಡೂ ಸಿನಿಮಾಗಳು ಹಿಟ್ ಆದ ಹಿನ್ನೆಲೆಯಲ್ಲಿ ರಿಷಿ ಕೈಯಲ್ಲೀಗ ಸಾಲು ಸಾಲು ಸಿನಿಮಾಗಳಿವೆ. ಜಾಕೋಬ್ ವರ್ಗೀಸ್ ನಿರ್ದೇಶನದ 'ಸಕಲಕಲಾವಲ್ಲಭ' ಸಿನಿಮಾ ಚಿತ್ರೀಕರಣ ಮುಗಿದಿದ್ದು, ಬಿಡುಗಡೆಯ ಸಿದ್ಧತೆಗಳು ನಡೆದಿವೆ.

ರಿಷಿ ನಟಿಸುತ್ತಿರುವ 'ಸಾರ್ವಜನಿಕರಿಗೆ ಸುವರ್ಣಾವಕಾಶ' ಸಿನಿಮಾದ ಟೀಸರ್ ಮತ್ತು ಹಾಡು ಇತ್ತೀಚೆಗಷ್ಟೆ ಬಿಡುಗಡೆಯಾಗಿ ಮೆಚ್ಚುಗೆಯನ್ನೂ ಗಳಿಸಿದೆ. ಇದಾದ ನಂತರ 'ರಾಮನ ಅವತಾರ' ಎಂಬ ಸಿನಿಮಾಗೂ ರಿಷಿ ಸಹಿ ಹಾಕಿದ್ದಾರೆ.

ಸಾರ್ವಜನಿಕರಿಗೆ ಸುವರ್ಣಾವಕಾಶ ಸಿನಿಮಾದ ಪೋಸ್ಟರ್

ಆಪರೇಷನ್ ಅಲಮೇಲಮ್ಮ ಸಿನಿಮಾದಲ್ಲಿ ತರಲೆ ಹುಡುಗನಾಗಿ ಕಾಣಿಸಿಕೊಂಡಿದ್ದ ರಿಷಿ ಕವಲುದಾರಿ ಸಿನಿಮಾದಲ್ಲಿ ಕೊಲೆಯೊಂದನ್ನು ಪತ್ತೆಹಚ್ಚುವ ಟ್ರಾಫಿಕ್ ಪೊಲೀಸ್ ಆಫೀಸರ್ ಪಾತ್ರದಲ್ಲಿ ನಟಿಸಿ ಗಮನ ಸೆಳೆದಿದ್ದರು.

ರಾಮನ ಅವತಾರ ಸಿನಿಮಾದ ಪೋಸ್ಟರ್

ಇದೇ ವರ್ಷ ಏಪ್ರಿಲ್ ತಿಂಗಳಲ್ಲಿ ಸ್ವಾತಿ ಎಂಬ ಬರಹಗಾರ್ತಿ ಜೊತೆಗೆ ಹೈದರಾಬಾದ್​ನಲ್ಲಿ ರಿಷಿ ನಿಶ್ಚಿತಾರ್ಥ ನೆರವೇರಿತ್ತು. ಕೇವಲ ಆಪ್ತರು ಮತ್ತು ಕುಟುಂಬದವರ ಸಮ್ಮುಖದಲ್ಲಿ ಈ ಸಮಾರಂಭ ನಡೆದಿತ್ತು.

ಇದೀಗ ನಾಳೆ ಅಂದರೆ ನ. 10ರಂದು ಚೆನ್ನೈನಲ್ಲಿ ರಿಷಿ ಮತ್ತು ಸ್ವಾತಿ ಚೆನ್ನೈನಲ್ಲಿ ಸಪ್ತಪದಿ ತುಳಿಯಲಿದ್ದಾರೆ.

ರಿಷಿ- ಸ್ವಾತಿ ಮದುವೆಯ ಆಮಂತ್ರಣ ಪತ್ರಿಕೆ

ನ. 20ರಂದು ಚಿತ್ರಂಗದ ಗಣ್ಯರು, ಆಪ್ತರು, ಕುಟುಂಬದವರಿಗಾಗಿ ಬೆಂಗಳೂರಿನಲ್ಲಿ ರಿಷಿ ಆರತಕ್ಷತೆಯನ್ನು ಆಯೋಜಿಸಿದ್ದಾರೆ.

ಶುಕ್ರವಾರ ಹಳದಿ ಶಾಸ್ತ್ರ ಮತ್ತು ಸಂಗೀತ್ ಕಾರ್ಯಕ್ರಮ ನೆರವೇರಿದ್ದು, ಇಂದು ನಿಶ್ಚಿತಾರ್ಥ ಸೇರಿದಂತೆ ಇತ್ಯಾದಿ ಕಾರ್ಯಕ್ರಮಗಳು ಇರಲಿವೆ.

ನಾಳೆ ಬೆಳಗ್ಗೆ 7.30ಕ್ಕೆ ಚೆನ್ನೈನಲ್ಲಿ ತಮ್ಮ ಗೆಳತಿ ಸ್ವಾತಿ ಜೊತೆ ರಿಷಿ ದಾಂಪತ್ಯ ಜೀವನಕ್ಕೆ ಕಾಲಿಡಲಿದ್ದಾರೆ.

ಮೂಲತಃ ಮೈಸೂರಿನವರಾದ ಇಂಜಿನಿಯರಿಂಗ್ ಪದವೀಧರ ರಿಷಿ ಮದುವೆಯಾಗುತ್ತಿರುವ ಸ್ವಾತಿ ಪರಶುರಾಮನ್ ಕೂಡ ಇಂಜಿನಿಯರಿಂಗ್ ಮಾಡಿದ್ದಾರೆ. ಆದರೆ, ಬರವಣಿಗೆಯತ್ತ ಆಸಕ್ತಿ ಇದ್ದಿದ್ದರಿಂದ ಅದೇ ಕ್ಷೇತ್ರವನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಸ್ವಾತಿ ಚೆನ್ನೈನಲ್ಲಿ ವಾಸವಾಗಿದ್ದಾರೆ. ಹೀಗಾಗಿ, ಚೆನ್ನೈನಲ್ಲಿ ನಾಳೆ ಮದುವೆ ಏರ್ಪಡಿಸಲಾಗಿದೆ.