Avantika Shetty: ಮತ್ತೆ ಬರ್ತಿದ್ದಾರೆ ರಂಗಿತರಂಗ ಚಿತ್ರದ ಬೆಡಗಿ; ನನಸಾಗ್ತಿದೆ ಆವಂತಿಕಾ ಶೆಟ್ಟಿ ಕನಸು!

ಕನ್ನಡದ ರಂಗಿತರಂಗ ಖ್ಯಾತಿಯ ನಟಿ ಆವಂತಿಕಾ ಶೆಟ್ಟಿ ಮತ್ತೆ ಕನ್ನಡ ಇಂಡಸ್ಟ್ರೀಗೆ ವಾಪಸ್ ಬರೋಕೆ ಆಸೆ ಪಡ್ತಿದ್ದಾರೆ. ಶೀಘ್ರದಲ್ಲಿಯೇ ಆ ಕನಸು ಕೂಡ ನನಸಾಗುವ ಭರವಸೆಯಲ್ಲಿಯೇ ಇದ್ದಾರೆ. ಅದನ್ನ ತಮ್ಮ ಸೋಷಿಯಲ್ ಮೀಡಿಯಾ ಪೇಜ್‌ಲ್ಲೂ ಹೇಳಿಕೊಂಡಿದ್ದಾರೆ.

ಕನ್ನಡದಲ್ಲಿಅವಂತಿಕಾ ಶೆಟ್ಟಿ ಬಹಳ ಸಿನಿಮಾ ಏನೂ ಮಾಡಿಲ್ಲ. ಆದರೆ ಮಾಡಿರೋ ಬೆರಳೆಣಿಕೆಯ ಸಿನಿಮಾಗಳು ಸಾಕಷ್ಟು ಸದ್ದು ಮಾಡಿವೆ. ರಾಜು ಕನ್ನಡ ಮೀಡಿಯಂ ಸಿನಿಮಾ ಅಂತೂ ಬೇಜಾನ್ ಸದ್ದು ಮಾಡಿರೋದು ಗೊತ್ತೇ ಇದೆ.

ಆವಂತಿಕಾ ಶೆಟ್ಟಿ ಅಭಿನಯದ ರಂಗಿತರಂಗ ಚಿತ್ರದ ಮೂಲಕ ಕನ್ನಡ ಸಿನಿ ಪ್ರೇಮಿಗಳಿಗೆ ಪರಿಚಯ ಆದರು. ತಮ್ಮ ವಿಶೇಷ ಅಭಿನಯದ ಮೂಲಕ ಗಮನ ಸೆಳೆದರು. ಇದಾದ್ಮೇಲೆ ರಿಯಲ್ ಸ್ಟಾರ್ ಉಪೇಂದ್ರ ಅಭಿನಯದ ಕಲ್ಪನಾ-2 ಸಿನಿಮಾದಲ್ಲಿ ಅಭಿನಯಿಸಿದ್ದರು.

ರಾಜು ಕನ್ನಡ ಮೀಡಿಯಂ ಚಿತ್ರದಲ್ಲಿ ಗುರುನಂದನ್ ಜೊತೆಗೆ ನಟಿಸಿದ್ದರು. ಆದರೆ ಈ ಚಿತ್ರದ ರಿಲೀಸ್ ಟೈಮ್‌ ಅಲ್ಲಿ ಏನೇನೋ ಆಗಿ ಹೋಯಿತು. ಇದರಿಂದ ತುಂಬಾನೇ ಹರ್ಟ್ ಆಗಿದ್ದ ಆವಂತಿಕಾ ಶೆಟ್ಟಿ ಮತ್ತೆ ಕನ್ನಡ ಸಿನಿಮಾಗಳಲ್ಲಿ ಅಭಿನಯಿಸಲೇ ಇಲ್ಲ.

ರಂಗಿತರಂಗ ಮತ್ತು ರಾಜರಥ ಟೀಮ್ ಜೊತೆಗೆ ಹೆಚ್ಚು ಆತ್ಮೀಯವಾಗಿಯೇ ಇರೋ ಆವಂತಿಕಾ ಶೆಟ್ಟಿ, ಈ ಚಿತ್ರಗಳ ಚಿತ್ರೀಕರಣದ ದಿನವನ್ನ ನೆನಪಿಸಿಕೊಂಡಿದ್ದಾರೆ. ಮಾರ್ಚ್ ತಿಂಗಳಲ್ಲಿ ರಂಗಿತರಂಗ ಸಿನಿಮಾದ ಆಡಿಯೋ ರಿಲೀಸ್ ಆಗಿತ್ತು ಅಂತಲೂ ಆವಂತಿಕಾ ನೆನಪಿಸಿಕೊಂಡಿದ್ದಾರೆ.

ರಾಜರಥ ಚಿತ್ರ ಕೂಡ ಸ್ಪೆಷಲ್ ಆಗಿಯೇ ಇದೆ. ಈ ಚಿತ್ರ 2018 ಮಾರ್ಚ್‌-23 ರಂದು ರಿಲೀಸ್ ಆಗಿತ್ತು. ಇಂತಹ ಚಿತ್ರಗಳನ್ನ ಕೊಟ್ಟ ಕನ್ನಡ ಇಂಡಸ್ಟ್ರೀಯಲ್ಲಿ ಅತ್ಯುತ್ತಮ ಫಿಲ್ಮಂ ಮೇಕರ್ಸ್ ಇದ್ದಾರೆ. ಇವರಿಂದ ನಾನು ಮೊದಲ ಸಕ್ಸಸ್ ಕಂಡಿದ್ದೇನೆ ಅಂತಲೂ ತಿಳಿಸಿದ್ದಾರೆ.

ಆವಂತಿಕಾ ಶೆಟ್ಟಿ ಕನ್ನಡ ಸಿನಿಮಾಗಳಲ್ಲಿ ಅಭಿನಯಿಸದೇ ಐದು ವರ್ಷಗಳೇ ಉರುಳಿವೆ. ಇದೀಗ ಮತ್ತೆ ಕನ್ನಡ ಸಿನಿಮಾಗಳಲ್ಲಿ ಅಭಿನಯಿಸೋ ಆಸೆಯನ್ನ ವ್ಯಕ್ತಪಡಿಸಿದ್ದಾರೆ. ಸೋಷಿಯಲ್ ಮೀಡಿಯ ಮೂಲಕವೇ ಈ ಎಲ್ಲ ವಿಷಯ ಹೇಳಿರೋ ಆವಂತಿಕಾ ಶೆಟ್ಟಿ, ತಮ್ಮ ಕನಸು ಬೇಗ ನನಸಾಗುತ್ತದೆ ಅನ್ನೋ ಭರವಸೆಯನ್ನ ಕೂಡ ಇಟ್ಟುಕೊಂಡಿದ್ದಾರೆ.