Kannada Ghost Look: ಘೋಸ್ಟ್ ಸಿನಿಮಾದ ಅನುಪಮ್ ಖೇರ್ ಲುಕ್ ಹೇಗಿದೆ? ಮೊದಲ ದಿನವೇ ಫೋಟೋ ವಿಡಿಯೋ ಲೀಕ್!

ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ಅಭಿನಯದ ಘೋಸ್ಟ್ ಸಿನಿಮಾದಲ್ಲಿ ಅನುಪಮ್ ಖೇರ್ ಪಾತ್ರ ಹೇಗಿರುತ್ತದೆ ಅನ್ನೋ ಕುತೂಹಲ ಇತ್ತು. ಅದಕ್ಕೆ ಈಗ ಉತ್ತರ ಸಿಕ್ಕಿದೆ. ಅನುಪಮ್ ಖೇರ್ ಪಾತ್ರದ ಗೆಟಪ್‌ನ ಫೊಟೋ ರಿವೀಲ್ ಆಗಿದೆ.

ಬಾಲಿವುಡ್ ಸಿನಿಮಾಗಳಲ್ಲಿ ವಿಭಿನ್ನ ಪಾತ್ರಗಳನ್ನ ಮಾಡುತ್ತಲೇ ಹೆಸರಾದ ಹಿರಿಯ ನಟ ಅನುಪಮ್ ಖೇರ್, ಕನ್ನಡದಲ್ಲಿ ಸಖತ್ ಸ್ಟೈಲೀಶ್ ಪಾತ್ರವನ್ನ ನಿರ್ವಹಿಸಿದ್ದಾರೆ. ಹಾಲಿವುಡ್‌ನ ಮೆನ್ ಇನ್ ಬ್ಲಾಕ್ ಪಾತ್ರವನ್ನ ನೋಡಿದ ಭಾವನೆ ಈಗಲೇ ಮೂಡುತ್ತಿದೆ.

ಘೋಸ್ಟ್ ಸಿನಿಮಾದ ಮೊದಲ ದಿನವೇ ಚಿತ್ರದ ಒಂದಷ್ಟು ದೃಶ್ಯಗಳನ್ನ ಡೈರೆಕ್ಟರ್ ಶ್ರೀನಿ ತೆಗೆದಿದ್ದಾರೆ. ಶಿವರಾಜ್ ಕುಮಾರ್ ಮತ್ತು ಅನುಪಮ್ ಖೇರ್ ಅವರ ಒಟ್ಟಿಗೆ ಈ ದೃಶ್ಯಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಆ ದೃಶ್ಯಗಳಲ್ಲಿ ಅನುಪಮ್ ಖೇರ್ ಕಪ್ಪು ಸೂಟ್ ಧರಿಸಿಕೊಂಡು ಕಂಗೊಳಿಸುತ್ತಿದ್ದಾರೆ. ಶಿವಣ್ಣ ಕೂಡ ಅದೇ ರೀತಿಯ ಕಪ್ಪು ಬಣ್ಣದ ಕಾಸ್ಟೂಮ್ ತೊಟ್ಟು ಗಮನ ಸೆಳೆದಿದ್ದಾರೆ.

ಘೋಸ್ಟ್ ಚಿತ್ರದಲ್ಲಿ ಶಿವಣ್ಣನ ಪಾತ್ರ ಹೇಗಿರುತ್ತದೆ ಅನ್ನೋ ಝಲಕ್ ಸಿಕ್ಕಾಗಿದೆ. ಅದಕ್ಕೆ ಪೂರಕ ಅನ್ನೋ ಹಾಗೆ ಶಿವಣ್ಣನ ಪಾತ್ರಕ್ಕೆ ಅನುಪಮ್ ಖೇರ್ ಪಾತ್ರವೂ ಇದೀಗ ಜೊತೆಯಾಗಿ ಹೊಸ ಖದರ್ ತಂದಿದೆ ಅಂತಲೇ ಹೇಳಬಹುದು.

ಅನುಪಮ್ ಖೇರ್ ಚಿತ್ರೀಕರಣದ ಮೊದಲ ದಿನ ಇಡೀ ಸಿನಿಮಾ ಟೀಮ್ ಜೊತೆಗೆ ಫೋಟೋ ಕೂಡ ತೆಗೆಸಿಕೊಂಡಿದ್ದಾರೆ. ಚಿತ್ರದ ಘೋಸ್ಟ್ ಅನ್ನೋ ಕ್ಲಾಪ್ ಬೋರ್ಡ್ ಹಿಡಿದು ಕ್ಯಾಮೆರಾಗೆ ಫೋಸ್ ಕೊಟ್ಟಿದ್ದಾರೆ.

ಅನುಪಮ್ ಖೇರ್ ತಮ್ಮ ಚಿತ್ರ ಜೀವನದಲ್ಲಿ ಎಲ್ಲ ರೀತಿಯ ಪಾತ್ರ ಮಾಡಬೇಕು ಅಂದುಕೊಡಿದ್ದರು. ಅದೇ ರೀತಿ ಕಾಂತಾರ ಬಂದ್ಮೇಲೆ ಕನ್ನಡ ಸಿನಿಮಾಗಳಲ್ಲೂ ಅಭಿನಯಿಸಬೇಕು ಅಂತಲೇ ಆಸೆ ವ್ಯಕ್ತಪಡಿಸಿದ್ದರು. ಅದು ಈಗ ಘೋಸ್ಟ್ ಸಿನಿಮಾ ಮೂಲಕ ಸಾಕಾರಗೊಂಡಿದೆ.

ಕನ್ನಡದ ಘೋಸ್ಟ್ ಸಿನಿಮಾ ಮೂಲಕ ಅನುಪಮ್ ಖೇರ್ ಕನ್ನಡಕ್ಕೆ ಬಂದಾಗಿದೆ. ನಾಲ್ಕು ದಿನಗಳ ಕಾಲ ಕಾಲ್ ಶೀಟ್ ಕೊಟ್ಟಿದ್ದಾರೆ. ಈ ನಾಲ್ಕು ದಿನಗಳಲ್ಲಿ ಡೈರೆಕ್ಟರ್ ಶ್ರೀನಿ, ತಮ್ಮ ಕಲ್ಪನೆಯ ಪಾತ್ರದ ಚಿತ್ರೀಕರಣವನ್ನ ಮಾಡಲಿದ್ದಾರೆ.