Shiva Rajkumar: ಶಿವಣ್ಣನ ಘೋಸ್ಟ್ ಮೂಲಕ ಕನ್ನಡಕ್ಕೆ ಕಾಲಿಟ್ಟ T-Series; ಖುಷಿ ಹಂಚಿಕೊಂಡ ಡೈರೆಕ್ಟರ್ ಶ್ರೀನಿ

ಹ್ಯಾಟ್ರಿಕ್ ಹೀರೋ ಶಿವರಾಜ್‌ ಕುಮಾರ್ ಅಭಿನಯದ ಘೋಸ್ಟ್ ಸಿನಿಮಾ ಕನ್ನಡದಲ್ಲಿ ಭಾರೀ ಸದ್ದು ಮಾಡುತ್ತಲೇ ಇದೆ. ಚಿತ್ರದ ಆರಂಭದಿಂದಲೂ ಒಂದಿಲ್ಲ ಒಂದು ಸುದ್ದಿ ಕೊಡ್ತಾನೇ ಇದೆ ಈ ಸಿನಿಮಾ ತಂಡ ಮತ್ತು ಡೈರೆಕ್ಟರ್ ಶ್ರೀನಿವಾಸ್, ಅದರಂತೆ ಈಗೊಂದು ಹೊಸ ಸುದ್ದಿಯನ್ನ ಶ್ರೀನಿ ನ್ಯೂಸ್‌-18 ಕನ್ನಡ ಡಿಜಿಟಲ್‌ಗೆ ಹಂಚಿಕೊಂಡಿದ್ದಾರೆ.

ಕನ್ನಡದ ಘೋಸ್ಟ್ ಸಿನಿಮಾ ತನ್ನದೇ ರೀತಿಯಲ್ಲಿ ಈಗಾಗಲೇ ಗಮನ ಸೆಳೆಯುತ್ತಿದೆ. ಚಿತ್ರದಲ್ಲಿ ಮಾಲಿವುಡ್‌ನ ನಟ ಜಯರಾಮ್ ಅಭಿನಯಿಸಿರೋದು ಎಲ್ಲರಿಗೂ ಗೊತ್ತೇ ಇದೆ. ಅದರ ಬೆನ್ನಲ್ಲಿಯೇ ಬಾಲಿವುಡ್‌ನಿಂದ ಅನುಪಮ್ ಖೇರ್ ಬರೋದು ಪಕ್ಕಾ ಆಗಿದೆ. ಇನ್ನೇನೂ ಶೂಟಿಂಗ್ ಹೋಗೋದು ಬಾಕಿ ಇದೆ ಅಷ್ಟೆ ನೋಡಿ.

ಇದೀಗ ಘೋಸ್ಟ್ ಚಿತ್ರದ ಹೊಸ ಸುದ್ದಿ ಕನ್ನಡಿಗರೆಲ್ಲ ಹೆಮ್ಮೆ ಪಡುವಂತಹ ಸುದ್ದಿನೇ ಆಗಿದೆ. ಶಿವರಾಜ್‌ ಕುಮಾರ್ ಅಭಿಮಾನಿಗಳೂ ಈ ವಿಷಯವನ್ನ ಕೇಳಿ ಖುಷಿ ಪಡುತ್ತಾರೆ. ಹೌದು, ಕನ್ನಡಕ್ಕೆ TSeries ಕಂಪನಿ ಕಾಲಿಟ್ಟಿದೆ. ಅದು ಘೋಸ್ಟ್ ಚಿತ್ರದ ಮೂಲಕ ಅನ್ನೋದೇ ವಿಶೇಷ ಅಂತ ಹೇಳಬಹುದು.

ಬಾಲಿವುಡ್‌ ನಲ್ಲಿ TSeries ದೊಡ್ಡ ಹೆಸರಿದೆ. ಈ ಸಂಸ್ಥೆಯಿಂದ ಭಕ್ತಿಗೀತೆಗಳೂ ಅತಿ ಹೆಚ್ಚು ಬರ್ತಿದ್ದವು ಅನ್ನೋದು ಗೊತ್ತಿರೋ ವಿಷಯವೇ ಆಗಿದೆ. ಆದರೆ ಘೋಸ್ಟ್ ಮೂಲಕ TSeries ಸ್ಯಾಂಡಲ್‌ವುಡ್‌ಗೆ ಕಾಲಿಟ್ಟಿದ್ದು ಈ ವಿಷಯವನ್ನ ಡೈರೆಕ್ಟರ್‌ ಎಂ. ಜೆ. ಶ್ರೀನಿ ಈಗ ಅಧಿಕೃತವಾಗಿ ನ್ಯೂಸ್‌-18 ಕನ್ನಡ ಡಿಜಿಟಲ್‌ಗೆ ಹಂಚಿಕೊಂಡಿದ್ದಾರೆ.

ಅರ್ಜುನ್ ಜನ್ಯ ಸಂಗೀತ ನಿರ್ದೇಶನದ ಘೋಸ್ಟ್ ಚಿತ್ರದ ಆಡಿಯೋ ಮತ್ತು ವಿಡಿಯೋ ಹಕ್ಕನ್ನ TSeries ಸಂಸ್ಥೆ ಖರೀದಿಸಿದ್ದು, ಇದನ್ನ ಹೇಳಲಿಕ್ಕೆ ತುಂಬಾ ಖುಷಿ ಆಗುತ್ತದೆ ಅಂತ ಡೈರೆಕ್ಟರ್ ಶ್ರೀನಿ ಈಗ ತಮ್ಮ ಸಂತೋಷವನ್ನ ಸೋಷಿಯಲ್ ಮೀಡಿಯಾದಲ್ಲೂ ವ್ಯಕ್ತಪಡಿಸಿದ್ದಾರೆ.

ಅರ್ಜುನ್ ಜನ್ಯ ಸಂಗೀತದಲ್ಲಿ ಒಂದು ಮ್ಯಾಜಿಕ್ ಇದ್ದೇ ಇರುತ್ತದೆ. ಅದರಲ್ಲೂ ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ಅವರ ಸಿನಿಮಾ ಅಂದ್ಮೇಲೆ ಅಲ್ಲೊಂದು ವಿಶೇಷ ಪ್ರೀತಿ ಇದ್ದೇ ಇರುತ್ತದೆ. ಅದೇ ರೀತಿ ಅರ್ಜುನ್ ಜನ್ಯ ಇಲ್ಲೂ ಒಳ್ಳೆ ಹಾಡುಗಳನ್ನ ಕೊಟ್ಟಿರುತ್ತಾರೆ ಅನ್ನುವ ನಂಬಿಕೆ ಈಗಲೇ ಮೂಡಿದೆ.

ಘೋಸ್ಟ್ ಚಿತ್ರದ ಚಿತ್ರೀಕರಣ ಶೇಕಡ 90 ರಷ್ಟು ಪೂರ್ಣ ಆಗಿದೆ. ಬರುವ ಏಪ್ರಿಲ್ ತಿಂಗಳಲ್ಲಿ ಮೂರನೇ ಹಂತದ ಚಿತ್ರೀಕರಣ ಮಾಡೋ ತಯಾರಿಯಲ್ಲೂ ಡೈರೆಕ್ಟರ್ ಶ್ರೀನಿ ಬ್ಯುಸಿ ಇದ್ದಾರೆ. ಅಷ್ಟರಲ್ಲಿಯೇ TSeries ಸುದ್ದಿ ಕೊಟ್ಟಿದ್ದು ಘೋಸ್ಟ್ ಸಿನಿಮಾ ಬಗ್ಗೆ ಇನ್ನಷ್ಟು ನಿರೀಕ್ಷೆ ಹುಟ್ಟಿದೆ.