Priyanka Chopra: ದೇಸಿ ಗರ್ಲ್​ನ್ನು ಬ್ಯಾನ್ ಮಾಡಿದ್ರಂತೆ ಕರಣ್! ಬಾಲಿವುಡ್​ ಅಸಲಿ ಬಣ್ಣ ಬಯಲು

ಸಾಮಾನ್ಯವಾಗಿ ಎಲ್ಲಾ ಭಾಷೆಯ ಚಿತ್ರರಂಗದಲ್ಲಿ ಕೆಲವು ನಟ ಮತ್ತು ನಟಿಯರು ಬೇಗನೆ ಜನಪ್ರಿಯತೆ ಪಡೆಯುತ್ತಿದ್ದಾರೆ ಅಂತ ಸಣ್ಣ ಸುಳಿವು ಸಿಕ್ಕರೆ ಸಾಕು ಅವರ ಜನಪ್ರಿಯತೆಗೆ ಹೇಗಾದರೂ ಮಾಡಿ ಬ್ರೇಕ್ ಹಾಕಬೇಕು ಅನ್ನೋ ಜನರು ತುಂಬಾನೇ ಇರುತ್ತಾರೆ. ಅದರಲ್ಲೂ ಬಾಲಿವುಡ್‌ನಲ್ಲಿ ಕಾಮನ್.

ಯಾರಾದರೂ ನಟ ಅಥವಾ ನಟಿ ತಮ್ಮ ಚಿತ್ರಗಳಿಂದ ಜನಪ್ರಿಯತೆ ಗಳಿಸುತ್ತಿದ್ದಾರೆ ಅಂತ ಗೊತ್ತಾದರೆ ಸಾಕು, ಅವರನ್ನು ಹೇಗಾದರೂ ಮಾಡಿ ಮೂಲೆ ಗುಂಪು ಮಾಡಬೇಕೆಂದು ಕೆಲವರು ಕಾಯುತ್ತಾ ಇರುತ್ತಾರೆ. ಇಲ್ಲಿಯೂ ಸಹ ಒಬ್ಬ ನಟಿ ತುಂಬಾನೇ ಹೆಸರು ಮಾಡುತ್ತಿದ್ದಾರೆ ಅಂತ ಸ್ವಲ್ಪ ಸುಳಿವು ಸಿಕ್ಕಾಗ ಬಾಲಿವುಡ್ ಮಂದಿ ಆಕೆಯನ್ನು ಮೂಲೆ ಗುಂಪು ಮಾಡಿದ್ರಂತೆ.

ಆದರೆ ಆಕೆ ತುಂಬಾನೇ ಗಟ್ಟಿಗಿತ್ತಿ, ಹಾಗಾಗಿ ಆಕೆ ಬಾಲಿವುಡ್ ಮಂದಿಯ ರಾಜಕೀಯ ನಮಗೆ ಬೇಡವೇ ಬೇಡ ಅಂತ ನೇರವಾಗಿ ಹಾಲಿವುಡ್‌ಗೆ ಹಾರಿದ್ದಾರೆ. ಬಾಲಿವುಡ್ ನಿಂದ ಹಾಲಿವುಡ್‌ಗೆ ಹೋದ ನಟಿ ಅಂತ ಹೇಳಿದರೆ ಸಾಕು ನೀವು ಆ ನಟಿ ಪ್ರಿಯಾಂಕಾ ಚೋಪ್ರಾ ಅಂತ ಸರಿಯಾಗಿ ಊಹಿಸಿರುತ್ತೀರಿ.

ಇತ್ತೀಚೆಗೆ ಬಾಲಿವುಡ್​ನಲ್ಲಿ ತನ್ನ ವೃತ್ತಿಜೀವನದ ಉತ್ತುಂಗದಲ್ಲಿದ್ದಾಗ ಹಾಲಿವುಡ್​ಗೆ ಏಕೆ ಹೋದ್ರು ಅನ್ನೋ ಪ್ರಶ್ನೆಗೆ ನಟಿ ಪ್ರಿಯಾಂಕಾ ಚೋಪ್ರಾ ಉತ್ತರಿಸಿದ್ದಾರೆ. ಮಾಜಿ ವಿಶ್ವ ಸುಂದರಿ ಇತ್ತೀಚೆಗೆ ನೀಡಿದ ಸಂದರ್ಶನವೊಂದರಲ್ಲಿ ತಾನು ಬಾಲಿವುಡ್​ನಲ್ಲಿ ಮೂಲೆಗೆ ತಳ್ಳಲ್ಪಟ್ಟಿದೆ ಅಂತ ಹೇಳಿದ್ದಾರೆ. ಬಾಲಿವುಡ್ ನಲ್ಲಿರುವ ರಾಜಕೀಯದಿಂದ ಬೇಸತ್ತಿದ್ದೆ ಎಂದು ಹೇಳಿದರು.

ಪ್ರಿಯಾಂಕಾ ಅವರ ಈ ಹೇಳಿಕೆಗೆ ನಟಿ ಕಂಗನಾ ಅವರು ತಕ್ಷಣವೇ ಪ್ರತಿಕ್ರಿಯಿಸಿ ಇನ್ನೊಂದು ದೊಡ್ಡ ಮಾತನ್ನು ಬಿಚ್ಚಿಟ್ಟಿದ್ದಾರೆ ಅಂತ ಹೇಳಬಹುದು. ಕಂಗನಾ ಅವರು ಪ್ರಿಯಾಂಕಾ ಅವರ ಮಾತಿಗೆ ಪ್ರತಿಕ್ರಿಯಿಸಿ ನಿರ್ಮಾಪಕ ಕರಣ್ ಜೋಹರ್ ಪ್ರಿಯಾಂಕಾ ಅವರನ್ನು ಬಾಲಿವುಡ್ ನಲ್ಲಿ ಬ್ಯಾನ್ ಮಾಡಿದ್ದರು ಎಂದು ಹೇಳಿದರು. ಪ್ರಿಯಾಂಕಾ ಮತ್ತು ಕಂಗನಾ 2008 ರಲ್ಲಿ ತೆರೆಕಂಡ ‘ಫ್ಯಾಷನ್’ ಚಿತ್ರದಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದರು.

ಬಾಲಿವುಡ್ ಬಗ್ಗೆ ಪ್ರಿಯಾಂಕಾ ಚೋಪ್ರಾ ಹೇಳುವುದು ಇದನ್ನೇ, ಇಲ್ಲಿನವರು ಅವರ ವಿರುದ್ಧ ಗುಂಪು ಗೂಡಿದರು, ಅವಳನ್ನು ಬೆದರಿಸಿದರು. ಅವಳನ್ನು ಇಲ್ಲಿಂದ ಓಡಿಸಿದರು. ಹಿಂದಿ ಚಿತ್ರೋದ್ಯಮವು ಸೆಲ್ಫ್ ಮೇಡ್ ನಟಿಯರನ್ನು ದೇಶ ಬಿಟ್ಟು ಹೋಗುವಂತೆ ಮಾಡಿತು. ನಿರ್ಮಾಪಕ ಕರಣ್ ಜೋಹರ್ ಆಕೆಯನ್ನು ಬ್ಯಾನ್ ಮಾಡಿದ್ದರು ಎಂಬುದು ಎಲ್ಲರಿಗೂ ಗೊತ್ತು ಎಂದು ಬರೆದಿದ್ದಾರೆ.

ಮತ್ತೊಂದು ಟ್ವೀಟ್‌ನಲ್ಲಿ ಎಸ್‌ಆರ್‌ಕೆ ಅವರೊಂದಿಗಿನ ಸ್ನೇಹದಿಂದಾಗಿ ಕರಣ್ ಜೋಹರ್ ಅವರೊಂದಿಗೆ ಜಗಳ ಆಗಿತ್ತು. ಅವರು ಯಾವಾಗಲೂ ಹೊರಗಿನ ಹೊಸ ಮುಖಗಳನ್ನು ಹುಡುಕುತ್ತಾರೆ. ಪ್ರಿಯಾಂಕಾ ಅವರಿಗೆ ಒಂದು ರೀತಿಯಲ್ಲಿ ಪಂಚಿಂಗ್ ಬ್ಯಾಗ್ ತರಹ ಕಾಣಿಸಿದರು. ಅವರಿಗೆ ಕಿರುಕುಳ ನೀಡಲು ಶುರು ಮಾಡಿದರು. ಇದನ್ನು ತಾಳದೆ ಆಕೆ ಭಾರತ ಬಿಟ್ಟು ಹಾಲಿವುಡ್‌ಗೆ ಹಾರಿದಳು ಎಂದು ಬರೆದಿದ್ದಾರೆ. ಚಲನಚಿತ್ರೋದ್ಯಮದ ಸಂಸ್ಕೃತಿ ಮತ್ತು ಪರಿಸರವನ್ನು ಹಾಳುಮಾಡಿದ್ದು ಕರಣ್‌ ಎಂದು ಕಂಗನಾ ದೂರಿದ್ದಾರೆ.

ಡಾಕ್ಸ್ ಶೆಫರ್ಡ್ ಅವರ ಪಾಡ್‌ಕ್ಯಾಸ್ಟ್ ಆರ್ಮ್‌ಚೇರ್ ಎಕ್ಸ್‌ಪರ್ಟ್ ನಲ್ಲಿ ಮಾತನಾಡುವಾಗ ಪ್ರಿಯಾಂಕಾ ತನಗೆ ಬಾಲಿವುಡ್ ನಲ್ಲಿ ಒಳ್ಳೆಯ ಪಾತ್ರಗಳು ಸಿಗುತ್ತಿರಲಿಲ್ಲ, ಚಿತ್ರೋದ್ಯಮದಲ್ಲಿದ್ದ ರಾಜಕೀಯ ತುಂಬಾ ಕಷ್ಟವಾಗಿತ್ತು ಎಂದು ಅವರು ಹೇಳಿದ್ದಾರೆ.

ಈಗ ಹಾಲಿವುಡ್​ನಲ್ಲಿ ಕ್ವಾಂಟಿಕೋ ಮೂಲಕ ದೊಡ್ಡ ಮಟ್ಟದ ಜನಪ್ರಿಯತೆಯನ್ನು ಗಳಿಸಿದ್ದಾರೆ. ಸತತ ಎರಡು ಪೀಪಲ್ಸ್ ಚಾಯ್ಸ್ ಪ್ರಶಸ್ತಿಗಳನ್ನು ಸಹ ಗೆದ್ದರು. ಅವರು ಈಗ ರುಸ್ಸೋ ಬ್ರದರ್ಸ್ ಶೋ ಸಿಟಾಡೆಲ್ ಮತ್ತು ಹಾಲಿವುಡ್ ಚಲನಚಿತ್ರ ‘ಲವ್ ಎಗೇನ್‌’ ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.