Kangana Ranaut: ನನ್ನನ್ನು ಹುಚ್ಚಿ ಅಂತೀರಾ? ಮನೆಗೆ ನುಗ್ಗಿ ಹೊಡೀತೀನಿ ಎಂದ ಕಂಗನಾ! ಸ್ಟಾರ್ ದಂಪತಿಗೆ ವಾರ್ನಿಂಗ್ ಕೊಟ್ಟ ಕ್ವೀನ್

ಬಾಲಿವುಡ್‌ ಕ್ವೀನ್ ಕಂಗನಾ ರಣಾವತ್ ಸದಾ ಸುದ್ದಿಯಲ್ಲಿರುತ್ತಾರೆ. ಈಗ ಕ್ವೀನ್ ನಟಿ ತಮ್ಮ ಮೇಲೆ ಸ್ಪೈ ಮಾಡ್ತಿದ್ದಾರೆ ಎಂದು ಬಾಲಿವುಡ್​ನ ಸ್ಟಾರ್ ದಂಪತಿಗೆ ಎಚ್ಚರಿಕೆ ಕೊಟ್ಟಿದ್ದಾರೆ.

ಬಾಲಿವುಡ್ ಸೆಲೆಬ್ರಿಟಿ ಜೋಡಿ ತನ್ನ ಮೇಲೆ ಬೇಹುಗಾರಿಕೆ ನಡೆಸುತ್ತಿದೆ ಎಂದು ಕಂಗನಾ ಸೋಷಿಯಲ್ ಮೀಡಿಯಾದಲ್ಲಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಇನ್​ಸ್ಟಾಗ್ರಾಮ್ ಸ್ಟೋರಿ ಹಾಕಿದ ನಟಿ ಸೆಲೆಬ್ರಿಟಿ ದಂಪತಿಗೆ ವಾರ್ನ್ ಮಾಡಿದ್ದಾರೆ.

ತನ್ನ ಮೇಲೆ ಸ್ಪೈ ಮಾಡಲಾಗುತ್ತಿದೆ ಎಂದು ಕಂಗನಾ ರಣಾವತ್ ಆರೋಪಿಸಿದ್ದಾರೆ. ನನ್ನ ಬಗ್ಗೆ ಚಿಂತೆ ಮಾಡುತ್ತಿರುವವರಿಗೆ ಇದನ್ನ ಹೇಳುತ್ತಿದ್ದೇನೆ ಎಂದು ನಟಿ ಪೋಸ್ಟ್ ಬರೆದಿದ್ದಾರೆ.

ನಿನ್ನೆ ರಾತ್ರಿಯಿಂದ ನನ್ನ ಸುತ್ತ ಯಾವುದೇ ಅನುಮಾನಾಸ್ಪದ ಚಟುವಟಿಕೆ ನಡೆದಿಲ್ಲ. ಕ್ಯಾಮರಾ ಯಾರೂ ನನ್ನನ್ನ ಹಿಂಬಾಲಿಸುತ್ತಿಲ್ಲ. ಪದಗಳ ಮೂಲಕ ಅರ್ಥ ಮಾಡಿಕೊಳ್ಳದವರಿಗೆ, ಬೇರೆ ರೀತಿ ಅರ್ಥ ಮಾಡಿಸಬೇಕಾಗುತ್ತದೆ ಎಂದು ನಟಿ ಖಾರವಾಗಿ ಬರೆದಿದ್ದಾರೆ.

ಚಂಗು - ಮಂಗುಗೆ ಇದು ನನ್ನ ಸಂದೇಶ: ನೀವು ಹಳ್ಳಿಯಿಂದ ಬಂದವರನ್ನು ಎದುರಿಸುತ್ತಿಲ್ಲ. ನಿಮ್ಮನ್ನ ನೀವು ಸರಿಪಡಿಸಿಕೊಳ್ಳಿ ಎಂದು ನಾನು ಎಚ್ಚರಿಕೆ ನೀಡುತ್ತಿದ್ದೇನೆ ಎಂದಿದ್ದಾರೆ.

ನಿಮ್ಮ ಮನೆಗೆ ನುಗ್ಗಿ ನಿಮಗೆ ಹೊಡೆಯುತ್ತೇನೆ. ಕೆಲವರಿಗೆ ನಾನು ಹುಚ್ಚಿ ಎನಿಸಬಹುದು. ನನ್ಯಾವ ಮಟ್ಟಕ್ಕೆ ಹೋಗಬಲ್ಲೆ ಎಂಬ ಅಂದಾಜು ನಿಮಗಿಲ್ಲ ಎಂದು ಬರೆದುಕೊಂಡಿದ್ದಾರೆ.

ಎಲ್ಲಿಯೂ ಅವರು ಬಾಲಿವುಡ್​ನ ಯಾವುದೇ ಸೆಲೆಬ್ರಿಟಿ ಕಪಲ್ ಬಗ್ಗೆ ಪ್ರಸ್ತಾಪಿಸಿಲ್ಲ. ಆದರೆ ಸೋಶಿಯಲ್​ ಮೀಡಿಯಾದಲ್ಲಿ ಈ ಬಗ್ಗೆ ಚರ್ಚೆ ಆಗಿದೆ.

ಇದಕ್ಕೆ ಕಾರಣವೂ ಇದೆ. ಈ ಎಲ್ಲ ಚರ್ಚೆಗೆ ಕಾರಣವಾಗಿದ್ದು ಕಮಲ್ ಆರ್ ಖಾನ್​ ಅವರ ಟ್ವೀಟ್. ಅವರೇ ಟ್ವಿಟರ್​ನಲ್ಲಿ ರಣಬೀರ್ ಕಂಗನಾ ಅವರನ್ನು ಸ್ಪೈ ಮಾಡುತ್ತಿರುವುದಾಗಿ ಬರೆದಿದ್ದರು.