Vedha Movie: ವೇದ ಸಿನಿಮಾ ರಿಲೀಸ್, ಶಿವಣ್ಣ ಸಿನಿಮಾ ಬಗ್ಗೆ ಇಂಟ್ರೆಸ್ಟಿಂಗ್ ವಿಚಾರಗಳಿವು

ಹ್ಯಾಟ್ರಿಕ್ ಹೀರೋ ಶಿವರಾಜ್​ಕುಮಾರ್ ಅಭಿನಯದ ವೇದ ಸಿನಿಮಾ ಡಿಸೆಂಬರ್ 23ರಂದು ಬಿಡುಗಡೆಯಾಗುತ್ತಿದೆ. ಸಿನಿಮಾ ರಿಲೀಸ್​​ಗೆ ಮುನ್ನವೇ ಭಾರೀ ಹವಾ ಸೃಷ್ಟಿಸಿದ್ದು ಈ ಸಿನಿಮಾ ಕುರಿತು ಇಂಟ್ರೆಸ್ಟಿಂಗ್ ವಿಚಾರಗಳು ಇಲ್ಲಿವೆ.

ಮಹಿಳಾ ಪ್ರಧಾನ ಸಿನಿಮಾ ಇದು ಎನ್ನುವ ಮಾತು ಕೇಳಿ ಬಂದಿದೆ. ವೇದ ಸಿನಿಮಾ ಮಹಿಳಾ ಪ್ರಧಾನ ಸಿನಿಮಾವೇ ಎಂದು ಬಹಳಷ್ಟು ಜನರು ಚರ್ಚಿಸುತ್ತಿದ್ದಾರೆ. ಶಿವರಾಜ್​ಕುಮಾರ್ ಅವರು ನಾಲ್ವರು ಮಹಿಳೆಯರು ಪ್ರಧಾನ ಪಾತ್ರ ಮಾಡುತ್ತಿರುವ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ ಎನ್ನುವುದು ವಿಶೇಷ.

ಉಮಾಶ್ರೀ, ಅದಿತಿ ಸಾಗರ್, ಗಾನವಿ, ಶ್ವೇತಾ ಚಂಗಪ್ಪ ಅವರು ಈ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಮಹಿಳಾ ಪ್ರಧಾನ ಪಾತ್ರಗಳ ಜೊತೆ ಶಿವಣ್ಣ ಕಾಣಿಸಿಕೊಳ್ಳಲಿದ್ದಾರೆ. ಅದೇ ರೀತಿ ಇದರ ಕೆಲವೊಂದು ಪೋಸ್ಟರ್​ನಲ್ಲಿ ಶಿವರಾಜ್​ಕುಮಾರ್ ಹೆಣ್ಮಕ್ಕಳ ಹಿಂದೆ ನಿಂತಿರುವುದು ಗಮನಾರ್ಹವಾಗಿ ಕಂಡಿದೆ.

ಲಾಂಗು, ಮಚ್ಚು ಹಿಡಿದು ಈಗಾಗಲೇ ಶಿವರಾಜ್​ಕುಮಾರ್ ಹಲವು ಸಿನಿಮಾಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಲುಕ್ ಹೊಸದೇನಲ್ಲ. ಆದರೂ ವೇದ ಸಿನಿಮಾದಲ್ಲಿ ಶಿವರಾಜ್​ಕುಮಾರ್ ಅವರ ಲುಕ್ ಗಮನ ಸೆಳೆದಿದೆ.

ವೇದ ಸಿನಿಮಾ ಶಿವರಾಜ್​ಕುಮಾರ್ ಅವರ 125ನೇ ಸಿನಿಮಾ ಎನ್ನುವುದು ದೊಡ್ಡ ವಿಶೇಷ. ಇದೊಂದು ಮೈಲಿಗಲ್ಲು. ಹಾಗಾಗಿ ಈ ಸಿನಿಮಾ ಸಾಕಷ್ಟು ನಿರೀಕ್ಷೆ ಹುಟ್ಟಿಸಿದೆ.

ಮಗಳು ಜಾನಕಿ ಧಾರವಾಹಿಯ ಮೂಲಕ ಕನ್ನಡಿಗರ ಮನಗೆದ್ದ ನಟಿ ಗಾನವಿ ಅವರು ಈ ಸಿನಿಮಾದಲ್ಲಿ ಶಿವರಾಜ್​ಕುಮಾರ್ ಅವರಿಗೆ ನಾಯಕಿಯಾಗಿರುವುದು ಇನ್ನೊಂದು ಕುತೂಹಲಕಾರಿ ಸಂಗತಿ. ಈಗಾಗಲೇ ಸೂಪರ್​ಸ್ಟಾರ್ ಆದ ನಟಿಯನ್ನು ಇಲ್ಲಿ ಹೀರೋಯಿನ್ ಆಗಿ ಆಯ್ಕೆ ಮಾಡಿಲ್ಲ.

ಇದು ಗೀತಾ ಪಿಕ್ಚರ್‌ ಮೂಲಕ ಗೀತಾ ಶಿವರಾಜ್‌ಕುಮಾರ್‌ ನಿರ್ಮಾಣದ ಮೊದಲ ಚಿತ್ರ ಎನ್ನುವುದು ಇನ್ನೊಂದು ಇಂಟ್ರೆಸ್ಟಿಂಗ್ ವಿಚಾರ. ಜೀ ಸ್ಟುಡಿಯೋಸ್‌ ನಿರ್ಮಾಣಕ್ಕೆ ಸಾಥ್‌ ನೀಡಿದೆ.

ವೇದ ಸಿನಿಮಾದ ಜುಂಜಪ್ಪ ಹಾಡನ್ನು ಜಾನಪದ ಹಾಡುಗಾರ ಮೋಹನ್ ಕುಮಾರ್ ಅವರಿಂದ ಹಾಡಿಸಲಾಗಿದೆ. ಇದು ಈ ಸಿನಿಮಾದ ಹಾಡುಗಳಲ್ಲಿ ಒಂದು ವಿಶೇಷ.

ಶಿವರಾಜ್​ಕುಮಾರ್ ಅವರ ಮೊದಲ ಸಿನಿಮಾವನ್ನು ಅವರ ತಾಯಿ ನಿರ್ಮಿಸಿದ್ದರು ಹಾಗೂ ಈಗ 125ನೇ ಸಿನಿಮಾವನ್ನು ಪತ್ನಿ ನಿರ್ಮಿಸುತ್ತಿದ್ದಾರೆ ಎನ್ನುವುದು ಗಮನಾರ್ಹ.