Nawazuddin Siddiqui: ಊಟಕ್ಕೆ ಕುಳಿತಾಗ ಕಾಲರ್ ಹಿಡಿದು ಹೊರಗೆ ಹಾಕಿದ್ರು! ನಟನ ನೋವು

ಬಾಲಿವುಡ್ ನಟ ನವಾಜುದ್ದೀನ್ ಸಿದ್ದಿಕಿ ಅವರು ಸಣ್ಣ ಪುಟ್ಟ ಪಾತ್ರಗಳನ್ನು ಮಾಡುತ್ತಾ ಚಿತ್ರರಂಗದಲ್ಲಿ ಮುಂದೆ ಬಂದ ಸೆಲೆಬ್ರಿಟಿ. ಸರ್ಫರೋಶ್, ಮುನ್ನಾ ಭಾಯ್ ಎಂಬಿಬಿಎಸ್ ಸಿನಿಮಾಗಳಲ್ಲಿ ನಟಿಸಿದ್ದರು. ಆದರೆ ನಟ ಈಗ ಸಿನಿಮಾದಲ್ಲಿ ಲೀಡ್ ರೋಲ್ ಮಾಡುತ್ತಾರೆ. ಸೇಕ್ರೆಡ್ ಗೇಮ್ಸ್, ಗಾಂಗ್ಸ್ ಆಫ್ ವಾಸೇಪುರ್​​ನಂತಹ ಪ್ರಾಜೆಕ್ಟ್​​ಗಳಲ್ಲಿ ಲೀಡ್​ ರೋಲ್​ನಲ್ಲಿ ನಟಿಸಿದ್ದಾರೆ.

ಭಾರತದ ಪ್ರತಿಭಾನ್ವಿತ ನಟ ಎಂದು ಗುರುತಿಸಿಕೊಳ್ಳಲು ನವಾಜುದ್ದೀನ್ ಅವರ ಜೀವನದ 20 ವರ್ಷಗಳೇ ಬೇಕಾದವು. ಇತ್ತೀಚೆಗೆ ನಟ ಬಿಬಿಸಿಗೆ ನೀಡಿದ ಸಂದರ್ಶನವೊಂದರಲ್ಲಿ ತಮ್ಮ ಹಳೆಯ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ. ನೋವು, ಅವಮಾನ ಎದುರಿಸಿದ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ.

ನಿಮ್ಮ ಜೊತೆ ಯಾರಾದರೂ ಕೆಟ್ಟದಾಗಿ ವರ್ತಿಸುತ್ತಿದ್ದರೇ ಎಂದು ಪ್ರಶ್ನಿಸಿದಾಗ ನವಾಜುದ್ದೀನ್ ಅವರು ತನ್ನ ನೋವಿನ ಅನುಭವವನ್ನು ಶೇರ್ ಮಾಡಿದ್ದಾರೆ. ಹೌದು. ಸಾವಿರಾರು ಸಲ ಇಂಥಹ ಘಟನೆಗಳಾಗಿವೆ ಎಂದಿದ್ದಾರೆ ನಟ.

ನಾನು ಸ್ಪಾಟ್​ ಬಾಯ್​ ಬಳಿ ನೀರು ಕೇಳುತ್ತಿದ್ದೆ. ಅವರು ನನ್ನನ್ನು ಸಂಪೂರ್ಣವಾಗಿ ನಿರ್ಲಕ್ಷ್ಯಿಸುತ್ತಿದ್ದರು. ಆಮೇಲೆ ನೀವೇ ಅದನ್ನು ತರಬೇಕಿತ್ತು. ಬಹಳಷ್ಟು ಸಲ ಊಟದ ಸಮಯದಲ್ಲಿ ನಟರು ಹಾಗೂ ಇತರ ಸಿಬ್ಬಂದಿ ಮಧ್ಯೆ ತಾರತಮ್ಯವಾಗುತ್ತದೆ ಎಂದಿದ್ದಾರೆ.

ಜೂನಿಯರ್ ಆರ್ಟಿಸ್ಟ್​​ಗಳು ಬೇರೆಯದೇ ಕುಳಿತು ಊಟ ಮಾಡುತ್ತಿದ್ದರು. ಸಪೋರ್ಟಿಂಗ್ ಆರ್ಟಿಸ್ಟ್ ಬೇರೆಯೇ ಕುಳಿತು ಊಟ ಮಾಡುತ್ತಿದ್ದರು. ಸ್ಟಾರ್ ನಟ, ನಟಿಯರು ಊಟ ಮಾಡುವ ಸ್ಥಳವೂ ಬೇರೆಯದೇ ಆಗಿರುತ್ತಿತ್ತು ಎಂದಿದ್ದಾರೆ.

ಕೆಲವು ಪ್ರೊಡಕ್ಷನ್ಸ್​​ಗಳಲ್ಲಿ ಈ ತಾರತಮ್ಯವಿರುತ್ತದೆ. ಯಶ್ ರಾಜ್ ಫಿಲ್ಮ್ಸ್​ನಲ್ಲಿ ಮಾತ್ರ ಎಲ್ಲರೂ ಒಟ್ಟಿಗೇ ಊಟ ಮಾಡುತ್ತಿದ್ದರು. ಆದರೆ ಉಳಿದ ಬಹಳಷ್ಟು ಪ್ರೊಡಕ್ಷನ್ ಹೌಸ್​ಗಳಲ್ಲಿ ಇದು ವಿಭಿನ್ನವಾಗಿರುತ್ತದೆ. ನಾನು ಲೀಡ್ ರೋಲ್ ಮಾಡುವ ನಟರೊಂದಿಗೆ ಕುಳಿತು ಊಟ ಮಾಡಲು ಪ್ರಯತ್ನಿಸಿದರೆ ನನ್ನನ್ನು ಕಾಲರ್ ಹಿಡಿದು ಹೊರಗೆ ತಳ್ಳಿದ್ದಾರೆ ಎಂದಿದ್ದಾರೆ.

ನನಗೆ ಆಗ ಸ್ವಾಭಿಮಾನಕ್ಕೆ ಧಕ್ಕೆಯಾಗುತ್ತಿತ್ತು. ನನಗೆ ಕೋಪ ಬರುತ್ತಿತ್ತು. ನಟರಿಗೆ ಗೌರವ ಕೊಡಬೇಕು. ಕೆಲವೊಮ್ಮೆ ನಮ್ಮನ್ನೂ ಎಲ್ಲರೊಂದಿಗೆ ಕುಳಿತು ಊಟ ಮಾಡಲು ಬಿಡುತ್ತಿದ್ದರು ಎಂದು ಅವರು ರಿವೀಲ್ ಮಾಡಿದ್ದಾರೆ.

ನವಾಜುದ್ದೀನ್ ಅವರು ನೂರಾನಿ ಚೆಹ್ರಾ, ಹಡ್ಡಿ, ಟಿಕು ವೆಡ್ಸ್ ಶೇರು, ಅದ್ಭುತ್ ಸಿನಿಮಾ ಮಾಡಲಿದ್ದಾರೆ. ನಟ ಇತ್ತೀಚೆಗೆ ತಮ್ಮ ಕೌಟುಂಬಿಕ ಕಲಹಗಳ ಕಾರಣದಿಂದಲೂ ಸುದ್ದಿಯಾಗಿದ್ದಾರೆ.