Actor Nani: ದಸರಾ ಶೂಟಿಂಗ್ ವೇಳೆ ನನಗೆ ನರಕ ದರ್ಶನವಾಯ್ತು! ಈ ಆಘಾತದಿಂದ ಹೊರಬರಲು 2 ತಿಂಗಳೇ ಬೇಕಾಯ್ತು

ನಾನಿ ತಮ್ಮ ನಟನಾ ಪ್ರತಿಭೆಯಿಂದ ನ್ಯಾಚುರಲ್ ಸ್ಟಾರ್ ಎನಿಸಿಕೊಂಡಿದ್ದಾರೆ. ಟಾಲಿವುಡ್​ನಲ್ಲಿ ಹಲವು ಹಿಟ್ ಸಿನಿಮಾಗಳನ್ನು ಮಾಡಿದ್ದಾರೆ. ದಸರಾ ಸಿನಿಮಾ ನಾನಿ ಅವರ ಕೆರಿಯರ್​ನಲ್ಲಿ ವಿಭಿನ್ನ ಸಿನಿಮಾವಾಗಿ ಮೂಡಿಬರುತ್ತಿದೆ.

ಶ್ರೀ ಲಕ್ಷ್ಮೀ ವೆಂಕಟೇಶ್ವರ ಸಿನಿಮಾಸ್ ಬ್ಯಾನರ್ ಅಡಿಯಲ್ಲಿ ಸುಧಾಕರ್ ಚೆರುಕುರಿ ನಿರ್ಮಿಸಿರುವ ಈ ಚಿತ್ರದ ಮೂಲಕ ಶ್ರೀಕಾಂತ್ ಒಡೆಲಾ ಅವರು ತಮ್ಮ ಚೊಚ್ಚಲ ನಿರ್ದೇಶನ ಮಾಡಲಿದ್ದಾರೆ. ಈ ಚಿತ್ರದಲ್ಲಿ ನಾನಿಗೆ ನಾಯಕಿಯಾಗಿ ಕೀರ್ತಿ ಸುರೇಶ್ ನಟಿಸುತ್ತಿದ್ದಾರೆ. ಮಾರ್ಚ್ 30 ರಂದು ವಿಶ್ವದಾದ್ಯಂತ ಚಿತ್ರಮಂದಿರಗಳಲ್ಲಿ ರಿಲೀಸ್ ಆಗಲಿದೆ.

ಸಿನಿಮಾ ರಿಲೀಸ್ ಆಗಲು ಕೆಲ ದಿನಗಳು ಬಾಕಿ ಇದ್ದು, ನಿರ್ಮಾಪಕರು ಚಿತ್ರದ ಪ್ರಚಾರದಲ್ಲಿ ಫುಲ್ ಆ್ಯಕ್ಟಿವ್ ಆಗಿದ್ದಾರೆ. ನಾನಿ ಹಲವು ಸಂದರ್ಶನಗಳಲ್ಲಿ ಸಿನಿಮಾ ಬಗ್ಗೆ ಮಾತಾಡಿದ್ರು. ಈ ಸಿನಿಮಾಗೆ ಸಂಬಂಧಿಸಿದ ಹಲವು ವಿಷಯಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. ಇದೀಗ ಭಯಾನಕ ಘಟನೆಯೊಂದನ್ನು ನಾನಿ ಹಂಚಿಕೊಂಡಿದ್ದಾರೆ.

ಸಿನಿಮಾ ಕಥೆ ಕಲ್ಲಿದ್ದಲು ಗಣಿಗಾರಿಕೆ ಹಿನ್ನೆಲೆಯನ್ನ ಒಳಗೊಂಡಿದೆ. ಈ ಸಿನಿಮಾದಲ್ಲಿ ನಾನಿ ಪ್ರಯೋಗಾತ್ಮಕ ಪಾತ್ರದಲ್ಲಿ ಕಾಣಿಸಿಕೊಳ್ತಿದ್ದಾರೆ. ಆದರೆ ಒಂದು ದೃಶ್ಯದಲ್ಲಿ ಡಂಪರ್ ಟ್ರಕ್ ಕಲ್ಲಿದ್ದಲು ಸಾಗಿಸಿ ಸುರಿಯುತ್ತಿದ್ದಾಗ ನಾನಿ ಡಂಪರ್ ಟ್ರಕ್ ನಿಂದ ಕೆಳಗೆ ಬಿದ್ದಾಗ ಕಲ್ಲಿದ್ದಲು ನಾನಿ ಮೇಲೆ ಬಿದ್ದಿತಂತೆ.

ನಾನು ಡಂಪರ್​ನಿಂದ ಕೆಳಗೆ ಬಿದ್ದೆ. ಕಲ್ಲಿದ್ದಲಿನ ಕೆಳಗಿದ್ದ ನನ್ನನ್ನು ಎಳೆಯಲು ಸ್ವಲ್ಪ ಸಮಯ ಬೇಕಾಯ್ತು. ಆ ಸಮಯದಲ್ಲಿ ನನಗೆ ಉಸಿರು ಕಟ್ಟಿತ್ತು. ಉಸಿರಾಡುವುದು ತುಂಬಾ ಕಷ್ಟವಾಗಿ ನರಕದ ದರ್ಶನವಾಗಿದೆ ಎಂದು ನಾನಿ ಹೇಳಿದ್ದಾರೆ. ಆ ದೃಶ್ಯದ ಚಿತ್ರೀಕರಣದ ನಂತರವೂ ಆ ಘಟನೆ ನೆನಪಾದಾಗಲೆಲ್ಲಾ ನನಗೆ ನಿದ್ದೆ ಬರುತ್ತಿರಲಿಲ್ಲ ಎಂದು ನಾನಿ ಹೇಳಿದ್ದಾರೆ.

ಈ ಅಘಾತದಿಂದ ಹೊರಬರಲು ಹಲವು ದಿನಗಳು ಬೇಕಾಯಿತು. ಜೊತೆಗೆ ದಸರಾ ಸಿನಿಮಾಗೆ ಸಂಬಂಧಿಸಿದ ಹಲವು ಸ್ವಾರಸ್ಯಕರ ಸಂಗತಿಗಳನ್ನು ಹಂಚಿಕೊಂಡಿದ್ದಾರೆ. ದಸರಾ ಚಿತ್ರದ ಮೂಲಕ ಸೂಪರ್ ಸಕ್ಸಸ್ ನಿರೀಕ್ಷೆಯಲ್ಲಿರುವ ನಾನಿ ಈ ಚಿತ್ರಕ್ಕಾಗಿ ತುಂಬಾ ವರ್ಕೌಟ್ ಮಾಡ್ತಿದ್ದಾರೆ.

ದಸರಾ ಸಿನಿಮಾದಲ್ಲಿ ನಾನಿ ಎದುರು ನಾಯಕಿಯಾಗಿ ಕೀರ್ತಿ ಸುರೇಶ್ ನಟಿಸುತ್ತಿದ್ದಾರೆ. ಈಗಾಗಲೇ ಬಿಡುಗಡೆಯಾಗಿರುವ ದಸರಾ ಫಸ್ಟ್ ಲುಕ್, ಗ್ಲಿಂಪ್ಸ್, ಟೀಸರ್ ಮತ್ತು ಟ್ರೇಲರ್ ಚಿತ್ರದ ಮೇಲೆ ಭಾರೀ ಹೈಪ್ ಕ್ರಿಯೇಟ್ ಮಾಡಿದೆ. ಈ ಚಿತ್ರದಲ್ಲಿ ನಾನಿ ಮಾಸ್ ಆ್ಯಕ್ಷನ್ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವುದು ಪ್ರೇಕ್ಷಕರಲ್ಲಿ ಕುತೂಹಲ ಹೆಚ್ಚಿಸಿದೆ.

ತೆಲಂಗಾಣದ ಗೋದಾವರಿ ಸಮೀಪದ ಸಿಂಗರೇಣಿ ಪ್ರದೇಶದ ಹಳ್ಳಿಯ ಸೆಟ್ ಹಾಕಿ ಶೂಟಿಂಗ್ ಮಾಡಲಾಗಿದೆ. ತೆಲುಗು, ಹಿಂದಿ, ತಮಿಳು, ಮಲಯಾಳಂ ಮತ್ತು ಕನ್ನಡ ಭಾಷೆಗಳಲ್ಲಿ ಏಕಕಾಲಕ್ಕೆ ದಸರಾ ಚಿತ್ರ ಬಿಡುಗಡೆಯಾಗಲಿದೆ. ನಾನಿ ಅಭಿಮಾನಿಗಳು ಈ ಸಿನಿಮಾದ ಬಿಡುಗಡೆಗಾಗಿ ಕಾತರದಿಂದ ಕಾಯುತ್ತಿದ್ದಾರೆ.