Father's Day 2022: ನಿನ್ನಂತ ಅಪ್ಪ ಇಲ್ಲ ಅಂತ ಸಾರಿದ ಕನ್ನಡದ 10 ಸಿನಿಮಾಗಳು! ಈ ಚಿತ್ರಗಳನ್ನು ನೀವು ನೋಡಲೇ ಬೇಕು

ದೇವತಾ ಮನುಷ್ಯ: ಡಾ. ರಾಜ್‌ಕುಮಾರ್ ಅಭಿನಯದ ಈ ಸಿನಿಮಾ 1988ರಲ್ಲಿ ತೆರೆಗೆ ಬಂತು. ಡಾ. ರಾಜ್ರೊಂದಿಗೆ ನಿನ್ನಂತ ಅಪ್ಪಾ ಇಲ್ಲ ಅಂತ ಹಾಡಿ, ಕುಣಿದ ನಟಿ ಸುಧಾರಾಣಿ ಕನ್ನಡದ ಮನೆಮಗಳಾದರು. ಅಪ್ಪ-ಮಗಳ ಬಾಂಧವ್ಯ ಸಾರುವ ಈ ಸಿನಿಮಾದ ಹಾಡುಗಳು ಇಂದಿಗೂ ಜನಪ್ರಿಯ.

ನೀ ಬರೆದ ಕಾದಂಬರಿ: 1985ರಲ್ಲಿ ತೆರೆಕಂಡ ಈ ಸಿನಿಮಾ ಕನ್ನಡದ ಜನಪ್ರಿಯ ಚಿತ್ರಗಳಲ್ಲಿ ಒಂದು. ಸಾಹಸಸಿಂಹ ವಿಷ್ಣುವರ್ಧನ್ ಹಾಗೂ ಭವ್ಯಾ ಜೋಡಿಯ ಪ್ರೀತಿಯ ಕಥೆಯ ಸಿನಿಮಾವಾದರೂ ಅಪ್ಪ-ಮಗನ ಬಾಂಧವ್ಯವೂ ಚಿತ್ರದಲ್ಲಿದೆ. ಇದು ಹಿಂದಿಯ ಹಿಟ್ 'ಪ್ಯಾರ್ ಜುಕ್ತಾ ನಹಿ' ಯ ರೀಮೇಕ್. ನೀ ಮೀಟಿದಾ ನೆನಪೆಲ್ಲವೂ ಸೇರಿದಂತೆ ಎಲ್ಲಾ ಹಾಡುಗಳು ಇಂದಿಗೂ ಜನಪ್ರಿಯವೇ.

ಲಾಲಿ: 1997ರಲ್ಲಿ ತೆರೆಕಂಡ ಲಾಲಿ ಸಿನಿಮಾ ದಿನೇಶ್ ಬಾಬು ಅವರ ಬತ್ತಳಿಕೆಯಿಂದ ಬಂದ ಅತ್ಯುತ್ತಮ ಸಿನಿಮಾ. ತಂದೆ ಪಾತ್ರದಲ್ಲಿ ವಿಷ್ಣುವರ್ಧನ್ ಹಾಗೂ ಮಗಳ ಪಾತ್ರದಲ್ಲಿ ನಟಿ ಮೋಹಿನಿ ಅಭಿನಯ ಇಂದಿಗೂ ಅಪ್ಯಾಯಮಾನ. ಮಗಳಿಗಾಗಿ ಬದುಕಿದ್ದ ತಂದೆ, ಆಕೆ ತನ್ನನ್ನು ನಿರ್ಲಕ್ಷ್ಯಿಸುತ್ತಿದ್ದಾಳೆ ಅಂತ ತಿಳಿದು ಒದ್ದಾಡುವ ದೃಶ್ಯ ಕಣ್ಣಲ್ಲಿ ನೀರು ತರಿಸುತ್ತದೆ.

ಸೂರ್ಯವಂಶ: ಎಸ್ ನಾರಾಯಣ್ ನಿರ್ದೇಶನದಲ್ಲಿ ಮೂಡಿಬಂದ ಸೂರ್ಯವಂಶ ಚಿತ್ರದಲ್ಲಿ ಸಾಹಸಸಿಂಹ ವಿಷ್ಣುವರ್ಧನ್ ದ್ವಿಪಾತ್ರದಲ್ಲಿ ನಟಿಸಿದ್ದರು. ಇದು 1997 ರಲ್ಲಿ ತಮಿಳಿನಲ್ಲಿ ತೆರೆಕಂಡಿದ್ದ ಸೂರ್ಯವಂಶಂ ಚಿತ್ರದ ರಿಮೇಕ್. ಅಭೂತಪೂರ್ವ ಪ್ರದರ್ಶನ ಕಂಡ ಈ ಚಿತ್ರ ಬಾಕ್ಸಾಫೀಸಿನಲ್ಲಿ ಸುಮಾರು 20 ಕೋಟಿ ಗಳಿಕೆ ಕಂಡಿತು. ತಂದೆ-ಮಗನ ಬಾಂಧವ್ಯದ ಕಥೆಯಿರುವ ಈ ಸಿನಿಮಾದಲ್ಲಿ ವಿಷ್ಣು ವರ್ಧನ್ ದ್ವಿಪಾತ್ರದಲ್ಲಿ ಅಭಿನಯಿಸಿದ್ದರು.

ತಂದೆಗೆ ತಕ್ಕ ಮಗ: 2006ರಲ್ಲಿ ತೆರೆಗೆ ಬಂದ ಈ ಸಿನಿಮಾ ರೆಬೆಲ್ ಸ್ಟಾರ್ ಹಾಗೂ ರಿಯಲ್ ಸ್ಟಾರ್ ಕಾಂಬಿನೇಷನ್. ಇಲ್ಲಿ ತಂದೆಯಾಗಿ ಅಂಬರೀಷ್ ಹಾಗೂ ಮಗನಾಗಿ ಉಪೇಂದ್ರ ಅಭಿನಯಿಸಿದ್ದರು.

ಗೋಧಿ ಬಣ್ಣ ಸಾಧಾರಣ ಮೈಕಟ್ಟು: 2010ರಲ್ಲಿ ತೆರೆಕಂಡ ಈ ಸಿನಿಮಾಕ್ಕೆ ಆ್ಯಕ್ಷನ್ ಕಟ್ ಹೇಳಿದ್ದು ಹೇಮಂತ್ ರಾವ್. ಇದು ತಂದೆ ಮಗನ ಬಾಂಧವ್ಯದ ಕುರಿತಾದ ಸಿನಿಮಾ. ಇದರಲ್ಲಿ ತಂದೆಯಾಗಿ ಅನಂತ್ ನಾಗ್ ಹಾಗೂ ಮಗನಾಗಿ ರಕ್ಷಿತ್ ಶೆಟ್ಟಿ ಅತ್ಯುತ್ತಮ ಅಭಿನಯ ನೀಡಿದ್ದಾರೆ.

ನಾನು ನನ್ನ ಕನಸು: 2010ರಲ್ಲಿ ತೆರೆಗೆ ಬಂದ ನಾನು ನನ್ನ ಕನಸು ಬಹುಭಾಷಾ ನಟ ಪ್ರಕಾಶ್ ರೈ ಅವರ ಕನಸು. ತಂದೆ ಮಗಳ ಬಾಂಧವ್ಯ ಸಾರುವ ಈ ಸಿನಿಮಾ ಲಾಲಿ ಸಿನಿಮಾದ್ದೇ ಇನ್ನೊಂದು ರೂಪ ಎಂದರೂ ತಪ್ಪಿಲ್ಲ. ಇಲ್ಲಿ ತಂದೆಯಾಗಿ ಪ್ರಕಾಶ್ ರೈ ಹಾಗೂ ಮಗಳಾಗಿ ಅಮೂಲ್ಯ ನಟಿಸಿದ್ದಾರೆ.

ಚೌಕ: ಕಥೆ ಬೇರೆಯದ್ದೇ ಆದರೂ ಇದರಲ್ಲಿ ಹೈಲೈಟ್ ಆಗಿದ್ದು ಕಾಶಿನಾಥ್ ಹಾಗೂ ಮಾನ್ವಿತಾ ಅವರ ತಂದೆ-ಮಗಳ ದೃಶ್ಯ. ಅಪ್ಪಾ ಐ ಲವ್ ಯೂ ಪಾ ಹಾಡಂತೂ ತಂದೆಯರ ಪಾಲಿನ ರಾಷ್ಟ್ರಗೀತೆಯೇ ಆಯ್ತು.

ಪುಷ್ಪಕ ವಿಮಾನ: ಇದು ನನ್ನ ಕಥೆ' ಎನ್ನುತ್ತ ನೆನಪಿನ ಪುಟಗಳನ್ನು ತೆರೆಯುವ ಮಗನ ಕಣ್ಣಲ್ಲಿ ಅಪ್ಪನ ದರ್ಶನವಾಗುತ್ತದೆ. ಇಲ್ಲಿ ‘ನನ್ನ ಅಪ್ಪ, ಆತನೇ ನನ್ನ ಪ್ರಪಂಚ. ಅವನ ಮುಗ್ಧತೆ ಅವನನ್ನು ಕೊಂದಿದೆ' ಅಂತ ಬಿಕ್ಕಿ ಬಿಕ್ಕಿ ಅಳುತ್ತಾಳೆ ಮಗಳು. 2018ರಲ್ಲಿ ತೆರೆಗೆ ಬಂದ ಈ ಸಿನಿಮಾದಲ್ಲಿ ರಮೇಶ್ ಅರವಿಂದ್ ಹಾಗೂ ಬಾಲ ನಟಿ ಯುವಿನಾ ಅಭಿನಯವೇ ಹೈಲೈಟ್.

ಕಾಲೇಜ್ ಕುಮಾರ: ತಂದೆ ಮಕ್ಕಳನ್ನು ಓದಿಸೋದು ಕಾಮನ್. ಆದರೆ ಮಗನೇ ತಂದೆಯನ್ನು ಓದಿಸೋದು ಅಂದರೆ? ಹೌದು, ಇದು ಅಂತದ್ದೇ ಕಥೆ. ಇಲ್ಲಿ ರವಿ ಪ್ರಕಾಶ್ ತಂದೆಯಾದರೆ, ಮಗನಾಗಿ ಅಭಿನಯಿಸಿದ್ದು ವಿಕ್ಕಿ ವರುಣ್.