Happy Birthday Dilip Kumar: ಮೊಹಮ್ಮದ್​ ಯೂಸುಫ್​ ಖಾನ್ ಟ್ರಾಜಿಡಿ ಕಿಂಗ್​​ ದಿಲೀಪ್​ ಕುಮಾರ್ ಆದ ಕಥೆ..!

ಬಾಲಿವುಡ್​ನಲ್ಲಿ​ ಟ್ರಾಜಿಡಿ ಕಿಂಗ್​  ಎಂದೇ ಕರೆಸಿಕೊಳ್ಳುವ ನಟ ದಿಲೀಪ್​ ಕುಮಾರ್ ಇಂದು ಹುಟ್ಟುಹಬ್ಬದ ಸಂಭ್ರಮದಲ್ಲಿದ್ದಾರೆ. 98ನೇ ವಸಂತಕ್ಕೆ ಕಾಲಿಟ್ಟಿದ್ದಾರೆ.

ದಿಲೀಪ್​ ಕುಮಾರ್​ ಅವರ ನಿಜವಾದ ಹೆಸರು ಮೊಹಮ್ಮದ್​ ಯೂಸುಫ್ ಖಾನ್​. ಸಿನಿಮಾಗೆ ಬಂದ ನಂತರ ಅವರಿಗೆ ದಿಲೀಪ್ ಕುಮಾರ್ ಎಂದು ಬದಲಾಯಿಸಲಾಯಿತು.

1922 ಡಿ. 11ರಂದು ಪೇಶಾವರದಲ್ಲಿ ಇವರ ಜನನವಾಯಿತು. 1944ರಲ್ಲಿ ಜ್ವಾರ್​ ಬಾಟಾ ಸಿನಿಮಾದ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟರು.  ಅಂದಾಜ್​, ಬಾಬುಲ್​ ದೀದಾರ್​, ಆನ್​, ದೇವ್​ದಾಸ್​, ನಯಾ ದೌರ್​ ಹೀಗೆ ಹಲವಾರು ಸಿನಿಮಾಗಳಲ್ಲಿ ಅಭಿನಯಿಸುವ ಮೂಲಕ ರಂಜಿಸಿದ್ದಾರೆ.

ದಿಲೀಪ್​ ಕುಮಾರ್​ ಅವರ ಪ್ರೇಮ ಪ್ರಸಂಗಗಳು ಆಗಿನ ಕಾಲದಲ್ಲಿ ಸಖತ್​ ಸುದ್ದಿಯಲ್ಲಿತ್ತು. ದಿಲೀಪ್​ ಕುಮಾರ್​ ಅವರ ಹೆಸರು ಕಾಮಿನಿ ಕೌಶಲ್​, ಮಧುಬಾಲಾ. ವಹೀದಾ ರೆಹಮಾನ್  ಅವರೊಂದಿಗೆ ತಳುಕು ಹಾಕಿಕೊಂಡಿತ್ತು.

1966ರಲ್ಲಿ ಸೈರಾ ಬಾನು ಅವರೊಂದಿಗೆ ವಿವಾಹವಾದರು. ಇವರದ್ದು ಪ್ರೇಮ ವಿವಾಹವಾಗಿದ್ದು, ಸೈರಾ ಬಾನು 22 ವರ್ಷ ಚಿಕ್ಕವರು.

ಸೈರಾ 12 ವರ್ಷದವರಾಗಿದ್ದಾಗಲೇ ದಿಲೀಪ್​ ಕುಮಾರ್ ಅವರಿಗೆ ತಮ್ಮ ಮನಸ್ಸು ಕೊಟ್ಟುಬಿಟ್ಟಿದ್ದರಂತೆ. ಹೀಗೆಂದು ಅವರೇ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದಾರೆ.

ಮದರ್​ ಇಂಡಿಯಾ ಸಿನಿಮಾದಲ್ಲಿ ನಟಿಸಲು ನಿರಾಕರಿಸಿದ್ದರು. ಕಾರಣ, ನರ್ಗೀಸ್​ ಅವರೊಂದಿಗೆ ನಾಯಕನಾಗಿ ಅಭಿನಯಿಸಿದ್ದ ಅವರು, ಆ ಸಿನಿಮಾದಲ್ಲಿ ಮಗನಾಗಿ ಕಾಣಿಸಿಕೊಳ್ಳಬೇಕಿತ್ತು. ಇದು ಅವರಿಗೆ ಹಿಡಿಸಲಿಲ್ಲವಂತೆ. ಅದಕ್ಕೆ ಸಿನಿಮಾವನ್ನೇ ನಿರಾಕರಿಸಿದ್ದರು. ಹೀಗೆಂದು ದಿಲೀಪ್​ ಸಂದರ್ಶನ ಒಂದರಲ್ಲಿ ಹೇಳಿಕೊಂಡಿದ್ದಾರೆ. 

ತಮ್ಮ ವೃತ್ತಿ ಜೀವನದ ಆರಂಭದಲ್ಲಿ ದಿಲೀಪ್​ ಕುಮಾರ್ ಅವರು ಹೆಚ್ಚಾಗಿ ಟ್ರಾಜಿಡಿ ಪಾತ್ರಗಳಲ್ಲಿ ಅಭಿನಯಿಸಿದರು. ಇದರಿಂದಲೇ ಅವರಿಗೆ ಟ್ರಾಜಿಡಿ ಕಿಂಗ್ ಎಂಬ ಹೆಸರು ಬಂತು. 

ದಿಲೀಪ್​ ಕುಮಾರ್ ಅವರಿಗೆ ಪದ್ಮಭೂಷಣ ಹಾಗೂ ದಾದಾ ಸಾಹೇಬ್​ ಫಾಲ್ಕೆ ಪ್ರಶಸ್ತಿ ಸಹ ಸಿಕ್ಕಿದೆ. 

ಕೊರೋನಾ ಕಾರಣದಿಂದಾಗಿ ಈ ವರ್ಷ ದಿಲೀಪ್​ ಕುಮಾರ್ ಅವರ ಇಬ್ಬರು ಸಹೋದರರು ಸಾವನ್ನಪ್ಪಿದ್ದಾರೆ. ಇದರಿಂದಾಗಿ ಈ ವರ್ಷ ದಿಲೀಪ್ ಕುಮಾರ್ ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿಲ್ಲವಂತೆ.