Sakath: ರಿಲೀಸ್​ ದಿನಾಂಕ ಪ್ರಕಟಿಸಿದ ಗೋಲ್ಡನ್​ ಸ್ಟಾರ್​ ಗಣೇಶ್​..!

ಗಣೇಶ್ ಅಭಿನಯದ ಸಾಲು ಸಾಲು ಸಿನಿಮಾಗಳು ತೆರೆಗಪ್ಪಳಿಸಲು ಸಿದ್ಧವಾಗುತ್ತಿವೆ. ಅವುಗಳಲ್ಲಿ ಬಿಡುಗಡೆಯ ಹೊಸ್ತಿಲಲ್ಲಿರುವ ಸಿನಿಮಾ ಅಂದರೆ ಸಖತ್​. ಹೌದು, ಈಗಾಗಲೇ ಚಿತ್ರೀಕರಣ ಪೂರ್ಣಗೊಳಿಸಿ, ಪೋಸ್ಟ್​ ಪ್ರೊಡಕ್ಷನ್​ ಕೆಲಗಳಲ್ಲಿ ಬ್ಯುಸಿಯಾಗಿದೆ ಸಖತ್ ಚಿತ್ರತಂಡ.

ನಿರ್ದೇಶಕ ಸಿಂಪಲ್ ಸುನಿ ಸಖತ್ ಸಿನಿಮಾಗೆ ಆ್ಯಕ್ಷನ್ ಕಟ್ ಹೇಳಿದ್ದಾರೆ. 2019ರಲ್ಲಿ ಬಜಾರ್ ಸಿನಿಮಾ ತೆರೆ ಕಂಡ ನಂತರ ಸುನಿ ಮಾಡುತ್ತಿರುವ ಚಿತ್ರ ಇದಾಗಿದೆ. ಈಗಾಗಲೇ ರಿಲೀಸ್ ಆಗಿರುವ ಪೋಸ್ಟರ್​ ಹಾಗೂ ಹಾಡುಗಳಿಂದಲೇ ಸಿನಿಮಾದ ಬಗೆಗಿನ ನಿರೀಕ್ಷೆ ದುಪ್ಪಟ್ಟಾಗಿದೆ.

ಈ ಸಿನಿಮಾದಲ್ಲಿ ಗಣೇಶ್​ ಅವರು ಈ ಹಿಂದೆಂದೂ ಕಾಣಿಸಂತಹ ಪಾತ್ರದಲ್ಲಿ ನಟಿಸಿದ್ದಾರೆ. ಹೌದು, ಕಣ್ಣು ಕಾಣದ ವ್ಯಕ್ತಿಯಾಗಿ ಗಣೇಶ್ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾದಲ್ಲಿ ಗಣೇಶ್​ ನಟನೆಯ ಪಾತ್ರದ ಹೆಸರು ಬಾಲು.

ಗಣೇಶ್​ ಅವರ ಮಗ ವಿಹಾನ್​ ಗಣೇಶ್​ ಸಹ ಈ ಸಖತ್ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಹಿಂದೆಯೂ ವಿಹಾನ್​ ಬೆಳ್ಳಿ ತೆರೆಯಲ್ಲಿ ನಟಿಸಿದ್ದಾರೆ. ಬಾಲ ನಟನಾಗಿ ವಿಹಾನ್​ ನಟಿಸುತ್ತಿರುವ 2ನೇ ಚಿತ್ರ ಇದಾಗಿದೆ. ​

ಗಣೇಶ್​ ಅವರ ಬಾಲ್ಯದ ಪಾತ್ರದಲ್ಲಿ ವಿಹಾನ್​ ಕಾಣಿಸಿಕೊಳ್ಳಲಿದ್ದು, ಜೂನಿಯರ್ ಬಾಲು ಆಗಿ ರಂಜಿಸಲಿದ್ದಾರೆ. ಇನ್ನು ತಮ್ಮ ಪಾತ್ರದ ಡಬ್ಬಿಂಗ್​ ಸಹ ಮುಗಿಸಿದ್ದಾರೆ ವಿಹಾನ್​. ಮಗ ಡಬ್ಬಿಂಗ್ ಮಾಡುತ್ತಿರುವ ಚಿತ್ರಗಳನ್ನು ಗಣೇಶ್​ ತಮ್ಮ ಇನ್​ಸ್ಟಾಗ್ರಾಂನಲ್ಲಿ ಶೇರ್​ ಮಾಡಿದ್ದಾರೆ.

ಜೊತೆಗೆ ಸಿನಿಮಾದ ರಿಲೀಸ್ ಕುರಿತಾದ ಮಾಹಿತಿ ಸಹ ಹಂಚಿಕೊಂಡಿದ್ದಾರೆ. ಹೌದು, ಸಖತ್​ ಸಿನಿಮಾ ಮಕ್ಕಳ ದಿನಾಚರಣೆಯಂದು ತೆರೆಗೆ ಬರಲಿದೆ. ಗಣೇಶ್​ ಅವರಿಗೆ ನಾಯಕಿಯಾಗಿ ನಿಶ್ವಿಕಾ ನಾಯ್ಡು ಜೊತೆಯಾಗಿದ್ದಾರೆ. ಈ ಸಿನಿಮಾದಲ್ಲಿ ನಿಶ್ವಿಕಾ ಶಿಕ್ಷಕಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರಂತೆ.

ಕೆವಿಎನ್​​ ಮತ್ತು ಸುಪ್ರೀತ್​​ ಪ್ರೊಡಕ್ಷನ್​​ಬ್ಯಾನರ್​ನಡಿಯಲ್ಲಿ ಈ ಚಿತ್ರ ಮೂಡಿ ಬರುತ್ತಿರುವ ‘ಸಖತ್’​​ ಸಿನಿಮಾದ ಪೋಸ್ಟರ್​ಗಳಿಗೆ ಸಾಕಷ್ಟು ಮೆಚ್ಚುಗೆ ವ್ಯಕ್ತವಾಗಿದೆ. ಇನ್ನು ಗಣೇಶ್​ ಹುಟ್ಟುಹಬ್ಬದ ವೇಳೆ ರಿಲೀಸ್ ಮಾಡಲಾಗಿದ್ದ ರ‍್ಯಾಪ್​ ಮೋಷನ್​ ಪೋಸ್ಟರ್​​ ಸಹ ಸಿನಿಪ್ರಿಯರ ಮನ ಸೆಳೆದಿತ್ತು.

ನವೆಂಬರ್ 12ಕ್ಕೆ ತೆರೆ ಕಾಣಲಿರುವ ಸಖತ್ ಚಿತ್ರದ ಹಾಡು ಇತ್ತೀಚೆಗಷ್ಟೆ ರಿಲೀಸ್​ ಆಗಿದೆ. ಇನ್ನು ಸಿನಿಮಾದ ಟೀಸರ್​ ಇನ್ನೇನು ಬಿಡುಗಡೆಯಾಗಬೇಕಿದೆ.