Alia Bhatt: ಲಿವಿಂಗ್ ರೂಮ್ ತನಕ ಬಂತು ಕ್ಯಾಮೆರಾ ಕಣ್ಣು! ಆಲಿಯಾ ಗರಂ

ಬಾಲಿವುಡ್ ನಟಿ ಆಲಿಯಾ ಭಟ್ ಅವರು ಸಾಮಾನ್ಯವಾಗಿ ಕೋಪಿಸಿಕೊಳ್ಳುವುದಿಲ್ಲ. ಪ್ರತಿಬಾರಿ ಮಾಧ್ಯಮದ ಮುಂದೆ ಬಂದಾಗ, ಕ್ಯಾಮೆರಾ ಅವರನ್ನು ಮುತ್ತಿಕೊಂಡಾಗ ತಾಳ್ಮೆಯಿಂದಲೇ ವರ್ತಿಸುತ್ತಾರೆ. ಚಂದದ ಸ್ಮೈಲ್ ಕೂಡಾ ಕೊಡ್ತಾರೆ.

ಆದರೆ ಈ ಬಾರಿ ನಟಿ ಸಿಕ್ಕಾಪಟ್ಟೆ ಕೋಪ ಮಾಡಿಕೊಂಡಿದ್ದಾರೆ. ಅವರ ಕೋಪಕ್ಕೆ ಕಾರಣವೂ ಇದೆ. ಖಾಸಗಿತನಕ್ಕೆ ಧಕ್ಕೆ ತಂದಿದ್ದಕ್ಕಾಗಿ ಆಲಿಯಾ ಅವರು ನಿಜಕ್ಕೂ ತಾಳ್ಮೆ ಕಳೆದುಕೊಂಡಿದ್ದಾರೆ.

ಕೆಲವು ಫೋಟೋಗ್ರಫರ್​ಗಳು ನಟಿ ಅವರ ಮನೆಯೊಳಗಿರುವಾಗ ಫೋಟೋ ಕ್ಲಿಕ್ ಮಾಡಿದ್ದು ಅವರ ಕೋಪಕ್ಕೆ ಕಾರಣ. ನಟಿ ಇದನ್ನು ಸೋಷಿಯಲ್ ಮೀಡಿಯಾದಲ್ಲಿ ಶೇರ್ ಮಾಡಿ ಮುಂಬೈ ಪೊಲೀಸರಿಗೆ ಟ್ಯಾಗ್ ಮಾಡಿದ್ದಾರೆ.

ಘಟನೆ ಬಗ್ಗೆ ವಿವರಿಸಿದ ನಟಿ, ನನ್ನನ್ನು ತಮಾಷೆ ಮಾಡ್ತಿದ್ದೀರಾ? ನಾನು ಮನೆಯೊಳಗೆ ಇದ್ದೆ. ಎಂದಿನಂತೆಯೇ ಮಧ್ಯಾಹ್ನದ ವೇಳೆ. ಲಿವಿಂಗ್ ರೂಮ್​ನಲ್ಲಿ ಕುಳಿತಿದ್ದೆ. ಯಾರೋ ನನ್ನನ್ನು ನೋಡುವ ಭಾಸವಾಯಿತು. ನೋಡುವಾಗ ಎದುರಿನ ಕಟ್ಟದಲ್ಲಿ ಇಬ್ಬರು ನಿಂತು ನನ್ನತ್ತ ಕ್ಯಾಮೆರಾ ಫೋಕಸ್ ಮಾಡಿದ್ದರು. ಇದು ಸರಿಯಾ? ಇದು ಖಾಸಗಿತನದ ಮೇಲಿನ ಅತಿಕ್ರಮಣ. ನೀವು ದಾಟಬಾರದ ಒಂದು ಗೆರೆ ಇದೆ. ಆದರೆ ಈಗ ನೀವು ಆ ಎಲ್ಲ ಲೈನ್ ಕ್ರಾಸ್ ಮಾಡಿದ್ದೀರಿ ಎಂದಿದ್ದಾರೆ.

ನಟಿ ಆಲಿಯಾ ಅವರು ಸಾಮಾನ್ಯವಾಗಿ ಹೊರಗೆ ಅತ್ಯಂತ ಖುಷಿಯಲ್ಲಿರುತ್ತಾರೆ. ತಾಳ್ಮೆಯಿಂದ ಮಾಧ್ಯಮದವರಿಗೆ, ಫೋಟೋಗ್ರಫರ್​ಗಳಿಗೆ ಪೋಸ್ ಕೊಡುತ್ತಾರೆ. ಆದರೆ ಈಗ ನಡೆದಿರುವ ಘಟನೆಯಿಂದ ಸಿಟ್ಟಾಗಿದ್ದಾರೆ.

ಸೆಲೆಬ್ರಿಟಿಗಳ ಖಾಸಗಿತನಕ್ಕೆ ಧಕ್ಕೆಯಾಗುತ್ತಿರುವುದು ಇದೇ ಮೊದಲಲ್ಲ. ಕಳೆದ ವರ್ಷ ಅಭಿಮಾನಿಯೊಬ್ಬರು ತಮ್ಮ ಹೋಟೆಲ್ ಕೋಣೆಯ ವೀಡಿಯೊವನ್ನು ಹಂಚಿಕೊಂಡಾಗ ವಿರಾಟ್ ಕೊಹ್ಲಿ ಸಿಟ್ಟಾಗಿದ್ದರು.

ಅಭಿಮಾನಿಗಳು ತಮ್ಮ ನೆಚ್ಚಿನ ಆಟಗಾರರನ್ನು ನೋಡಿದಾಗ ತುಂಬಾ ಉತ್ಸುಕರಾಗುತ್ತಾರೆ. ನಾನು ಅರ್ಥಮಾಡಿಕೊಂಡಿದ್ದೇನೆ. ಆದರೆ ಈ ವೀಡಿಯೋ ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ಇದು ನನ್ನ ಗೌಪ್ಯತೆಯ ವಿಚಾರ. ನನ್ನ ಸ್ವಂತ ಹೋಟೆಲ್ ರೂಮ್​ನಲ್ಲಿ ನನಗೆ ಪ್ರೈವಸಿ ಸಿಗದಿದ್ದರೆ ಮತ್ತೆಲ್ಲಿ ನಮಗೆ ಖಾಸಗಿತನ ಇದೆ ಎಂದು ಪ್ರಶ್ನಿಸಿದ್ದರು.

ದಯವಿಟ್ಟು ಜನರ ಖಾಸಗಿತನವನ್ನು ಗೌರವಿಸಿ. ನಮ್ಮನ್ನೂ ಮನರಂಜನೆಯ ವಸ್ತು ಎಂದು ಪರಿಗಣಿಸಬೇಡಿ ಎಂದು ಕೊಹ್ಲಿ ಸೋಷಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದರು.