Celebrity Kids: ಸೆಲೆಬ್ರಿಟಿಗಳೇಕೆ ಮಕ್ಕಳ ಮುಖ ತೋರಿಸಲ್ಲ? ಕಾರಣ ಗೊತ್ತಾ?

ಸೆಲೆಬ್ರಿಟಿಗಳು ತಮ್ಮ ಮಗುವಿನ ಫೋಟೋ, ವಿಡಿಯೋವನ್ನು ಮಾಡಬೇಡಿ ಎಂದು ಬಹಳಷ್ಟು ಸಲ ಕೇಳುತ್ತಾರೆ. ಎಷ್ಟು ಫೋಟೋ ಶೇರ್ ಮಾಡಿದರೂ ತಮ್ಮ ಮಗುವಿನ ಮುಖವನ್ನು ಎಮೋಜಿ ಹಾಕಿ ಮುಚ್ಚಿಬಿಡುತ್ತಾರೆ. ಬಹಳಷ್ಟು ಸೆಲೆಬ್ರಿಟಿಗಳು ಈಗಾಗಲೇ ಇದನ್ನು ಮಾಡಿದ್ದಾರೆ.

ವಿರಾಟ್ ಕೊಹ್ಲಿ ಮತ್ತು ಅನುಷ್ಕಾ ಶರ್ಮಾ ಅವರ ಮಗಳು ವಮಿಕಾ ಅವರ ಫೋಟೋ ಆನ್‌ಲೈನ್‌ನಲ್ಲಿ ವೈರಲ್ ಆಗಿತ್ತು. ಆದರೆ ಇಬ್ಬರು ಕೂಡಾ ಅಭಿಮಾನಿಗಳಲ್ಲಿ ಮಗಳ ಫೋಟೋಗಳನ್ನು ಸೋಷಿಯಲ್ ಮೀಡಿಯಾದಿಂದ ಡಿಲೀಟ್ ಮಾಡುವಂತೆ ಒತ್ತಾಯಿಸಿದರು. ಸೆಲೆಬ್ರಿಟಿ ಮಕ್ಕಳ ಮುಖವನ್ನು ನೋಡಲು ಅಭಿಮಾನಿಗಳು ಉತ್ಸುಕರಾಗುವುದು ಸಹಜ. ಆದರೆ ಸೆಲೆಬ್ರಿಟಿ ಪೋಷಕರು ತಮ್ಮ ಮಕ್ಕಳ ಮುಖವನ್ನು ಯಾಕೆ ಮರೆಮಾಡಲು ಪ್ರಯತ್ನಿಸುತ್ತಾರೆ ಎಂಬುದು ಎಲ್ಲರ ಪ್ರಶ್ನೆ.

ಸೆಲೆಬ್ರಿಟಿಗಳು ತಮ್ಮ ಮಕ್ಕಳ ಖಾಸಗಿತನವನ್ನು ಪರಿಗಣಿಸುವುದೇ ಇದಕ್ಕೆ ಕಾರಣ. ಸೆಲೆಬ್ರಿಟಿಗಳು ಸಾಮಾನ್ಯವಾಗಿ ತಮ್ಮ ಜೀವನದ ಪ್ರತಿಯೊಂದು ಅಂಶವನ್ನು ಸಾಮಾಜಿಕ ಮಾಧ್ಯಮದಲ್ಲಿ ತಮ್ಮ ಅಭಿಮಾನಿಗಳು ಮತ್ತು ಫಾಲೋವರ್ಸ್​ ಜೊತೆ ಹಂಚಿಕೊಳ್ಳುತ್ತಾರೆ. ಆದರೆ ತಮ್ಮ ಮಕ್ಕಳ ಗೌಪ್ಯತೆ ರಕ್ಷಿಸುವುದು ತಮ್ಮ ಜವಾಬ್ದಾರಿಯಾಗಿ ಪರಿಗಣಿಸಿ ಪೋಷಕರು ಮಕ್ಕಳ ಮುಖ ಹೈಡ್ ಮಾಡುತ್ತಾರೆ.

ಬೇಬಿ ವಮಿಕಾ ಫೋಟೋ ಆನ್‌ಲೈನ್‌ನಲ್ಲಿ ಲೀಕ್ ಆಗುವ ಮೊದಲು ತಮ್ಮ ಮಗುವಿನ ಫೋಟೋವನ್ನು ಪ್ರಕಟಿಸದೆ ಇದ್ದಿದ್ದಕ್ಕಾಗಿ ಅನುಷ್ಕಾ ಪತ್ರಿಕೆಗಳಿಗೆ ಧನ್ಯವಾದ ಹೇಳಿದ್ದರು. ನಮ್ಮ ಮಗುವಿಗೆ ಗೌಪ್ಯತೆ ಇರಬೇಕೆಂದು ನಾವು ಬಯಸುತ್ತೇವೆ. ಸೋಷಿಯಲ್ ಮೀಡಿಯಾದಿಂದ ಮುಕ್ತವಾಗಿ ವೈಯಕ್ತಿಕ ಜೀವನ ಮಾಡಲು ಆಕೆಗೆ ಅವಕಾಶ ಸಿಗಬೇಕೆಂದು ನಾವು ಬಯಸುತ್ತೇವೆ. ಈ ನಿಟ್ಟಿನಲ್ಲಿ ಎಲ್ಲರೂ ಸಂಯಮದಿಂದ ವರ್ತಿಸಬೇಕೆಂದು ನಾವು ವಿನಂತಿಸುತ್ತೇವೆ ಎಂದು ನಟಿ ಕೇಳಿಕೊಂಡಿದ್ದರು.

ಇತ್ತೀಚೆಗೆ ಆಲಿಯಾ ಮತ್ತು ರಣಬೀರ್ ಪತ್ರಿಕಾಗೋಷ್ಠಿಯಲ್ಲಿ ತಮ್ಮ ಮಗು ರಾಹಾಗೆ ನೋ ಫೋಟೋ ಪಾಲಿಸಿ ಫಾಲೋ ಮಾಡಿ ಎಂದು ವಿನಂತಿಸಿದ್ದಾರೆ. ದಯವಿಟ್ಟು ನಮ್ಮ ಮಗುವಿನ ಫೋಟೋಗಳನ್ನು ಕ್ಲಿಕ್ ಮಾಡಬೇಡಿ ಎಂದು ಕೇಳಿಕೊಂಡಿದ್ದಾರೆ.

ಆಕಸ್ಮಿಕವಾಗಿ ಮಗುವಿನ ಫೋಟೋ ಕ್ಲಿಕ್ಕಿಸಿ ಪ್ರಕಟಗೊಂಡರೆ ಮಗುವಿನ ಮುಖವನ್ನು ಮರೆಮಾಚಲು ಹಾರ್ಟ್ ಎಮೋಜಿಯಂತಹ ಎಮೋಜಿಗಳನ್ನು ಬಳಸಬೇಕು ಎಂದು ಅವರು ಹೇಳಿದ್ದಾರೆ. ನನ್ನ ಮಗಳು ದೊಡ್ಡವಳಾಗುವವರೆಗೆ ಇದನ್ನು ಫಾಲೋ ಮಾಡಿ. ಹಾಗಾಗಿ ನನ್ನ ಮಗುವಿನ ಮುಖವನ್ನು ಬಹಿರಂಗಪಡಿಸಬೇಡಿ ಎಂದು ಕೇಳಿಕೊಂಡಿದ್ದಾರೆ.

ನಟಿ ಸೋನಂ ಕಪೂರ್ ಕಳೆದ ಆಗಸ್ಟ್‌ನಲ್ಲಿ ಮಗನಿಗೆ ಜನ್ಮ ನೀಡಿದ್ದರು. ಸೋನಂ ಇನ್ನೂ ತನ್ನ ಮಗ ವಾಯುವಿನ ಮುಖವನ್ನು ತೋರಿಸಿಲ್ಲ. ಸೋಶಿಯಲ್ ಮೀಡಿಯಾದಲ್ಲಿ ಮಗನ ಮುಖವಿರುವ ಫೋಟೋವನ್ನು ಯಾವಾಗ ಹಂಚಿಕೊಳ್ಳುತ್ತೀರಿ ಎಂಬ ಪ್ರಶ್ನೆಗೆ ನಟಿ ಸೋನಂ ಕಪೂರ್ ಪ್ರತಿಕ್ರಿಯಿಸಿದ್ದಾರೆ. ಇದಲ್ಲದೆ, ಅವರು ಸ್ವತಃ ನಿರ್ಧರಿಸುವವರೆಗೂ ಮಗುವಿನ ಮುಖವನ್ನು ಪ್ರಕಟಿಸುದಿಲ್ಲ ಎಂದು ಹೇಳಿದರು.

ಇತರ ಸೆಲೆಬ್ರಿಟಿಗಳಂತೆ ಪ್ರಿಯಾಂಕ ಚೋಪ್ರಾ ಹಾಗೂ ನಿಕ್ ತಮ್ಮ ಮಗುವಿನ ಮುಖವನ್ನು ಬಹಿರಂಗಪಡಿಸಿಲ್ಲ. ಅವರು ತಮ್ಮ ಮಗುವಿನೊಂದಿಗೆ ಫೋಟೋವನ್ನು ಹಂಚಿಕೊಂಡರೂ ಮಗುವಿನ ಮುಖವನ್ನು ಹಾರ್ಟ್ ಎಮೋಜಿಯಿಂದ ಮರೆಮಾಡುತ್ತಾರೆ. ಇದಕ್ಕೆ ಇನ್ಸ್ಟಾ ಬಳಕೆದಾರರು ನಿಮ್ಮ ಮಗುವಿನ ಮುಖ ತೋರಿಸದಿದ್ದರೆ ಮತ್ತೆ ಫೋಟೋವನ್ನು ಏಕೆ ಹಂಚಿಕೊಳ್ಳುತ್ತೀರಿ ಎಂದು ಪ್ರಶ್ನಿಸಿದ್ದಾರೆ.

ಸೆಲೆಬ್ರಿಟಿಗಳಾದ ನೇಹಾ ದುಫಿಯಾ ಮತ್ತು ಅಂಗದ್ ತಮ್ಮ ಇಬ್ಬರು ಮಕ್ಕಳ ಮುಖವನ್ನು ಸಾಮಾಜಿಕ ಮಾಧ್ಯಮದಲ್ಲಿ ಬಹಿರಂಗಪಡಿಸದಂತೆ ಎಚ್ಚರಿಕೆ ವಹಿಸಿದ್ದಾರೆ. ಜುಲೈ 2022 ರಲ್ಲಿ, ನೇಹಾ ಮಿಸ್ ಇಂಡಿಯಾ ಕಿರೀಟದ 20 ವರ್ಷಗಳ ಸಂಭ್ರಮಾಚರಣೆಯಲ್ಲಿ ತನ್ನ ಮಕ್ಕಳು ಮತ್ತು ಪತಿಯೊಂದಿಗೆ ವೇದಿಕೆಯಲ್ಲಿದ್ದರು. ಆದರೆ ಮಕ್ಕಳ ಮುಖ ತೋರಿಸಲಿಲ್ಲ.