Subi Suresh: ಖ್ಯಾತ ನಟಿ ಹಾಗೂ ನಿರೂಪಕಿ ಸುಬಿ ಸುರೇಶ್ ನಿಧನ; ಕಲಾವಿದೆ ಸಾವಿಗೆ ಕಣ್ಣೀರಿಟ್ಟ ಚಿತ್ರರಂಗ

ನಿರೂಪಕಿ ಸುಬಿ ಸುರೇಶ್ ಯಕೃತ್ತಿನ ಕಾಯಿಲೆ ಒಳಗಾಗಿದ್ರು. ಕೊಚ್ಚಿಯ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಆದ್ರೆ ಚಿಕಿತ್ಸೆ ಫಲಕಾರಿಯಾಗದೆ ಸುಬಿ ನಿಧನರಾಗಿದ್ದಾರೆ. ಸುಬಿ ಸಾವಿಗೆ ಅನೇಕ ಕಲಾವಿದರು ಸಂತಾಪ ಸೂಚಿಸಿದ್ದಾರೆ.

ಸುಬಿ ಅವರ ಪಾರ್ಥಿವ ಶರೀರವನ್ನು ಗುರುವಾರ ಬೆಳಗ್ಗೆ 10 ರಿಂದ ಮಧ್ಯಾಹ್ನ 2 ಗಂಟೆಯವರೆಗೆ ವರಪುಳ ಪುತನಪಲ್ಲಿ ಸಭಾಂಗಣದಲ್ಲಿ ಸಾರ್ವಜನಿಕ ದರ್ಶನಕ್ಕೆ ಇಡಲಾಗಿತ್ತು. ಮಧ್ಯಾಹ್ನ 3 ಗಂಟೆಗೆ ಚೇರನಲ್ಲೂರಿನ ಚಿತಾಗಾರದಲ್ಲಿ ಅಂತ್ಯಕ್ರಿಯೆ ನಡೆಸಲಾಗಿದೆ.

ಸುಬಿ ಸುರೇಶ್ ಹಾಸ್ಯ ಕಾರ್ಯಕ್ರಮದಿಂದ ಭಾರೀ ಜನಪ್ರಿಯತೆ ಪಡೆದಿದ್ದಾರೆ. ರಾಜಸೇನ ನಿರ್ದೇಶಿಸಿದ್ದ ಕನಕ ಸಿಂಹಾಸನಂ ಚಿತ್ರದಲ್ಲಿ ಸುಬಿ ನಟಿಸಿದ್ದರು, ನಂತರ ಹಲವು ಚಿತ್ರಗಳಲ್ಲಿ ನಟಿಸಿ ಅಪಾರ ಅಭಿಮಾನಿ ಬಳಗವನ್ನು ಹೊಂದಿದ್ದರು.

ಎರ್ನಾಕುಲಂ ಜಿಲ್ಲೆಯ ತ್ರಿಪುನಿತುರಾದಲ್ಲಿ ಸುಬಿ ಸುರೇಶ್ ಜನಿಸಿದ್ರು. ಶಾಲೆ ಮತ್ತು ಕಾಲೇಜು ಶಿಕ್ಷಣವು ತ್ರಿಪುನಿತುರಾ ಸರ್ಕಾರಿ ಶಾಲೆ ಮತ್ತು ಎರ್ನಾಕುಲಂ ಸೇಂಟ್ ದಿ ರೆಸಾಸ್ನಲ್ಲಿ ಪೂರ್ಣಗೊಳಿಸಿದ್ರು. ಶಾಲಾ ದಿನಗಳಲ್ಲಿ ಸುಬಿ ಸುರೇಶ್ ಉತ್ತಮ ನೃತ್ಯಗಾರ್ತಿ ಕೂಡ ಆಗಿದ್ದರು. ಸುಬಿ ಬ್ರೇಕ್ ಡ್ಯಾನ್ಸ್ ಕೂಡ ಕಲಿತಿದ್ದರು. ಅನೇಕ ಸ್ಟೇಜ್ ಶೋಗಳನ್ನು ಸಹ ನೀಡಿದ್ದಾರೆ. ನಂತರ ಕಿರುತೆರೆಗೆ ಕಾಲಿಟ್ಟ ಸುಬಿ ಅನೇಕ ಹಾಸ್ಯ ಕಾರ್ಯಕ್ರಮಗಳನ್ನು ನಡೆಸಿಕೊಟ್ಟಿದ್ದಾರೆ.

ಸುಬಿ ಸುರೇಶ್ ಸಿನಿಮಾಲಾ ಎಂಬ ಹಾಸ್ಯ ಸೀರಿಯಲ್ನಿಂದ ಪ್ರೇಕ್ಷಕರ ನೆಚ್ಚಿನ ನಟಿಯಾಗಿದ್ದರು. ಟಿವಿ ಚಾನೆಲ್​ಗಳು ಮತ್ತು ಸ್ಟೇಜ್ ಶೋಗಳಲ್ಲಿ ಸುಬಿ ಅನೇಕ ಸ್ಕಿಟ್​ಗಳಲ್ಲಿ ವಿವಿಧ ಹಾಸ್ಯ ಪಾತ್ರಗಳನ್ನು ಮಾಡಿದ್ದಾರೆ.

ವಿದೇಶಗಳಲ್ಲಿಯೂ ಅನೇಕ ಸ್ಟೇಜ್ ಶೋಗಳಲ್ಲಿ ಕಾಮಿಡಿ ಕಿರುಚಿತ್ರಗಳನ್ನು ಪ್ರದರ್ಶಿಸಲಾಗಿದೆ. ಚಿಕ್ಕ ಮಕ್ಕಳನ್ನು ಒಳಗೊಂಡ ಕಾರ್ಯಕ್ರಮವಾದ ಸೂರ್ಯ ಟಿವಿಯ ಕುಟ್ಟಿಪಟ್ಟಲಮ್​ನ ನಿರೂಪಕರಾಗಿಯೂ ಸುಬಿ ನಟಿಸಿದ್ದರು.

2006ರಲ್ಲಿ ರಾಜಸೇನನ್ ನಿರ್ದೇಶನದ ಕನಕ ಸಿಂಹಾಸನಂ ಚಿತ್ರದ ಮೂಲಕ ಸುಬಿ ಸುರೇಶ್ ಚಿತ್ರರಂಗ ಪ್ರವೇಶಿಸಿದರು. ಪಂಚವರ್ಣತಟ್ಟ, ನಾಟಕ, 101 ವೆಡ್ಡಿಂಗ್, ಗೃಹನಾಥನ್, ಕಿಲಾಡಿ ರಾಮನ್, ಲಕ್ಕಿ ಜೋಕರ್ಸ್, ಎಲ್ಸಮ್ಮ ನಾನಾ ಬಾಯ್, ತಸ್ಕರ ಲಾಹಲ, ಹ್ಯಾಪಿ ಹಸ್ಬೆಂಡ್ಸ್, ಡಿಟೆಕ್ಟಿವ್, ಗೊಂಬೆಗಳು ಹೀಗೆ ಇಪ್ಪತ್ತು ಚಿತ್ರಗಳಲ್ಲಿ ನಟಿಸಿದ್ದಾರೆ.

ಚಲನಚಿತ್ರ ಮತ್ತು ಕಿರುತೆರೆ ನಟಿ ಹಾಗೂ ನಿರೂಪಕಿ ಸುಬಿ ಸುರೇಶ್ ಅವರ ಅಕಾಲಿಕ ಮರಣಕ್ಕೆ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಸಂತಾಪ ಸೂಚಿಸಿದ್ದಾರೆ. ಕೊಚ್ಚಿನ್ ಕಲಾ ಭವನದ ಮೂಲಕ ಕಲಾ ಕ್ಷೇತ್ರಕ್ಕೆ ಕಾಲಿಟ್ಟ ಸುಬಿ, ರಿಯಾಲಿಟಿ ಶೋ, ಕಾಮಿಡಿ ಕಾರ್ಯಕ್ರಮಗಳ ಮೂಲಕ ಮಲಯಾಳಿ ಪ್ರೇಕ್ಷಕರ ಹೃದಯ ಗೆದ್ದರು. ಸುಬಿ ಅವರ ನಿಧನದಿಂದ ಒಬ್ಬ ಭರವಸೆಯ ಕಲಾವಿದೆಯನ್ನು ಕಳೆದುಕೊಂಡಂತಾಗಿದೆ ಎಂದು ಮುಖ್ಯಮಂತ್ರಿಗಳು ಹೇಳಿದ್ದಾರೆ.