Actress Vijayalakshmi: ಕಪ್ಪು ಬಣ್ಣದಿಂದ ರಿಜೆಕ್ಟ್ ಆಗಿದ್ದೆ, ತಾಯಿ ತಬ್ಬಿಕೊಂಡು ಅತ್ತ ವಿಜಯಲಕ್ಷ್ಮಿ!

ಕಲರ್ಸ್ ಕನ್ನಡದಲ್ಲಿ ರಾತ್ರಿ 8.30ಕ್ಕೆ ಪ್ರಸಾರವಾಗುತ್ತಿರುವ ಲಕ್ಷಣ ಧಾರಾವಾಹಿ ದಿನಕ್ಕೊಂದು ತಿರುವುಗಳನ್ನು ಪಡೆಯುತ್ತಾ ಜನರನ್ನು ಹಿಡಿದಿಡುವಲ್ಲಿ ಯಶಸ್ವಿಯಾಗಿದೆ. ತನ್ನದೇ ಆದ ವಿಭಿನ್ನ ಶೈಲಿಯಲ್ಲಿ ಜನಪ್ರಿಯತೆ ಗಳಿಸಿದೆ.

ಲಕ್ಷಣ ಧಾರಾವಾಹಿ ನಾಯಕಿ ನಕ್ಷತ್ರಾ ನೋಡಲು ಕಪ್ಪಾಗಿದ್ದರೂ ತಿಳಿ ಬಿಳಿ ಮನಸ್ಸಿನ ಹುಡುಗಿ. ಅಪ್ಪ ಚಂದ್ರಶೇಖರ್ ಮಾಡಿದ ಅವಾಂತರದಿಂದ ನಕ್ಷತ್ರಾ, ಭೂಪತಿಯನ್ನು ಮದುವೆ ಆಗಿದ್ದಾಳೆ.

ನಕ್ಷತ್ರಾ ಆಗಿ ನಟಿಸುತ್ತಿರುವ ವಿಜಯಲಕ್ಷ್ಮಿ ನಿಜ ಜೀವನದಲ್ಲೂ ನೋಡಲು ಕಪ್ಪಾಗಿದ್ದಾರೆ. ಆ ಕಪ್ಪು ಬಣ್ಣದಿಂದ ತಮಗಾದ ಅವಮಾನ, ತಮ್ಮ ತಾಯಿ ಅನುಭವಿಸಿದ ನೋವನ್ನು ಹಂಚಿಕೊಂಡಿದ್ದಾರೆ.

ನಮ್ಮಮ್ಮ ಸೂಪರ್ ಸ್ಟಾರ್ ಸೀಸನ್ 2 ಗೆ ಸಂಕ್ರಾಂತಿ ಸಂಭ್ರಮಕ್ಕೆ ಲಕ್ಷಣ ಧಾರಾವಾಹಿ ತಂಡ ಬಂದಿದೆ. ಅಲ್ಲಿ ವಿಜಯ ಲಕ್ಷ್ಮಿ ತಮ್ಮ ಮನದ ಮಾತನ್ನು ಜನರ ಮುಂದೆ ಹಂಚಿಕೊಂಡಿದ್ದಾರೆ.

ಇದೊಂದು ಬಣ್ಣದ ಜಗತ್ತು. ನಾವು ಹೇಗೆ ಕಾಣಿಸಿಕೊಳ್ತೇವೆ ಅದರ ಮೇಲೆ ನಮ್ಮನ್ನು ಆಯ್ಕೆ ಮಾಡ್ತಾರೆ. ಒಂದು ಕಪ್ಪು ಹುಡುಗಿ ಆಡಿಷನ್ ಗೆ ಹೋಗಿ ರಿಜೆಕ್ಟ್ ಆಗಿರೋ ನೋವನ್ನು ನಾನು ಅನುಭವಿಸಿದ್ದೇನೆ ಎಂದು ವಿಜಯಲಕ್ಷ್ಮಿ ಹೇಳಿದ್ದಾರೆ.

ನನ್ನ ತಾಯಿ ಮಧ್ಯ ರಾತ್ರಿ ಎದ್ದು ಅಳೋರು. ಅಮ್ಮ ನಿನ್ನ ಮೇಲೆ ಆ ತಪ್ಪನ್ನು ದಯವಿಟ್ಟು ಹಾಕಿಕೊಳ್ಳಬೇಡ. ಅದೇನೋ ಕೆಟ್ಟ ಗಳಿಗೆ ಆ ರೀತಿ ನಡೆಯಿತು ಎಂದು ವಿಜಯಲಕ್ಷ್ಮಿ ಕಣ್ಣೀರು ಹಾಕಿದ್ದಾರೆ.

ವಿಜಯಲಕ್ಷ್ಮಿ ಅವರ ತಾಯಿಯನ್ನು ಕಲರ್ಸ್ ಕನ್ನಡದವರು ಸಪ್ರ್ರೈಸ್ ಆಗಿ ಕರೆಸಿದ್ದರು. ಅವರ ಅಮ್ಮನನ್ನು ವೇದಿಕೆಯಲ್ಲಿ ನೋಡಿ ವಿಜಯಲಕ್ಷ್ಮಿ ಕಣ್ಣೀರು ಹಾಕಿದರು.

ನಂತರ ಅಮ್ಮಾ, ಅಮ್ಮಾ ಐ ಲವ್ ಯೂ ಹಾಡು ಹೇಳಿ, ತನಗೆ ತನ್ನ ಅಮ್ಮನೇ ಸೂಪರ್ ಸ್ಟಾರ್ ಎಂದು ಹೇಳಿದ್ರು. ವಿಜಯಲಕ್ಷ್ಮಿ ಮನದ ಮಾತು ಎಲ್ಲರ ಕಣ್ಣಂಚಲ್ಲಿ ನೀರು ತರಿಸಿತು.