ಬುಲೆಟ್ ಪ್ರಕಾಶ್ ಅವರ ಕೊನೆಯ ಚಿತ್ರ ಯಾವುದು? ಯಾವೆಲ್ಲಾ ಚಿತ್ರಗಳಲ್ಲಿ ಹಾಸ್ಯನಟ ಕಾಣಿಸಿಕೊಳ್ಳಲಿದ್ದಾರೆ?

ಕ್ರೇಜಿಸ್ಟಾರ್ ರವಿಚಂದ್ರನ್ ಅವರ ‘ಶಾಂತಿ-ಕ್ರಾಂತಿ’ ಚಿತ್ರದ ಮೂಲಕ ಬಣ್ಣದ ಲೋಕದ ಜರ್ನಿ ಆರಂಭಿಸಿದ್ದ ಬುಲೆಟ್ ಪ್ರಕಾಶ್ ಅವರು ಇಂದು ನಮ್ಮನ್ನಗಲಿದ್ದಾರೆ.

ದೈತ್ಯ ದೇಹ, ವಿಶಿಷ್ಟ ಹಾವಾಭಾವ ಮೂಲಕ ಪ್ರೇಕ್ಷಕರನ್ನು ನಗೆಗಡಲಲ್ಲಿ ತೇಲಿಸಿದ್ದ ಪ್ರಕಾಶ್ 375 ಕ್ಕೂ ಅಧಿಕ ಚಿತ್ರಗಳಲ್ಲಿ ಹಾಸ್ಯನಟನಾಗಿ ಬಣ್ಣ ಹಚ್ಚಿದ್ದಾರೆ. ಅಲ್ಲದೆ ಐತಲಕಡಿ ಎಂಬ ಚಿತ್ರದಲ್ಲಿ ನಾಯಕರಾಗಿ ಕಾಣಿಸಿಕೊಂಡಿದ್ದರು.

ಅದರಲ್ಲೂ ರವಿಚಂದ್ರನ್ ಅವರ ಚಿತ್ರತಂಡದಲ್ಲಿ ಖಾಯಂ ನಟನಾಗಿದ್ದ ಗುರುತಿಸಿಕೊಂಡಿದ್ದ ಬುಲೆಟ್ ಪ್ರಕಾಶ್ ಅವರು ಕ್ರೇಜಿಸ್ಟಾರ್ ಜೊತೆಯಲ್ಲಿ ಒಂಭತ್ತು ಚಿತ್ರಗಳಲ್ಲಿ ನಟಿಸಿದ್ದಾರೆ.

ಹಾಗೆಯೇ ಚಾಲೆಂಜಿಂಗ್ ಸ್ಟಾರ್ ಅವರ ಆಪ್ತರಾಗಿದ್ದ ಬುಲೆಟ್ ಪ್ರಕಾಶ್ ಅವರು ನಿನಗೋಸ್ಕರ, ಧ್ರುವ, ಭಗವಾನ್, ಶೌರ್ಯ, ಕಲಾಸಿಪಾಳ್ಯ, ದತ್ತ ಹಾಗೂ ಐರಾವತದಲ್ಲಿ ಬಣ್ಣ ಹಚ್ಚಿದ್ದರು.

ಆದರೆ ಕೆಲ ಕಾಲದಿಂದ ಕಾಡುತ್ತಿದ್ದ ಅನಾರೋಗ್ಯದಿಂದ ಬುಲೆಟ್ ಪ್ರಕಾಶ್ ಅವರು ಸಿನಿರಂಗದಿಂದ ತುಸು ದೂರ ಉಳಿದಿದ್ದರು. ಆ ಬಳಿಕ ಮತ್ತೆ ಕಂಬ್ಯಾಕ್ ಮಾಡಿದ್ದ ನಟ ನೀರ್​ದೋಸೆ ಚಿತ್ರದಲ್ಲಿ ಹಾಸ್ಯದ ಹೊನಲು ಹರಿಸಿದ್ದರು.

ಇದಾದ ಬಳಿಕ ಸೆಕೆಂಡ್ ಇನಿಂಗ್ಸ್ ಆರಂಭಿಸಿದ್ದ ಬುಲೆಟ್ ಪೊಗರು ಚಿತ್ರದ ಮುಖ್ಯ ಪಾತ್ರದಲ್ಲಿ ಬಣ್ಣ ಹಚ್ಚಿದ್ದರು. ಈ ಸಿನಿಮಾ ಲಾಕ್​ಡೌನ್ ಮುಗಿದ್ದಂತೆ ತೆರೆಗೆ ಬರಲು ಸಜ್ಜಾಗಿ ನಿಂತಿದೆ.

ಇದರೊಂದಿಗೆ ನಿರ್​ದೋಸೆ ನಿರ್ದೇಶಕ ವಿಜಯ್‌ ಪ್ರಸಾದ್‌ ನಿರ್ದೇಶಿಸುತ್ತಿರುವ 'ಪರಿಮಳಾ ಲಾಡ್ಜ್‌' ಸಿನಿಮಾದಲ್ಲೂ ಒಂದೊಳ್ಳೆ ಪಾತ್ರ ಮಾಡುತ್ತಿದ್ದರು. ಅಲ್ಲದೆ ಈ ಚಿತ್ರಕ್ಕಾಗಿ 45 ದಿನಗಳ ಕಾಲ್​ಶೀಟ್ ಕೂಡ ನೀಡಿದ್ದಾರೆ. ಆದರೆ ವಿಧಿಯಾಟ.

ಇನ್ನು ಕೊನೆಯ ಬಾರಿ ಬುಲೆಟ್ ಕ್ಯಾಮೆರಾ ಮುಂದೆ ಕಾಣಿಸಿಕೊಂಡಿರುವುದು ಯೋಗರಾಜ್ ಭಟ್ ಅವರ ಗಾಳಿಪಟ2 ಚಿತ್ರದಲ್ಲಿ. ಗೋಲ್ಡನ್ ಸ್ಟಾರ್ ಗಣೇಶ್ ಅವರೊಂದಿಗೆ ಈ ಚಿತ್ರದಲ್ಲಿ ಪ್ರಕಾಶ್ ಅವರು ಹಾಸ್ಯ ಚಟಾಕಿ ಹಾರಿಸಲಿದ್ದಾರೆ.

ಇದಲ್ಲದೆ, ಓಂ ಪ್ರಕಾಶ್ ರಾವ್ ನಿರ್ದೇಶಿಸಲಿರುವ ಬೆಳಗಾಂ, ಗಲ್ಲ ಎಂಬ ಹೊಸಬರ ಚಿತ್ರದಲ್ಲಿ, ಸಾಧು ಕೋಕಿಲ ಅವರ ಸ್ವಾಮೀಜಿ, ರಿಷಿ ನಿರ್ದೇಶಿಸಲಿರುವ ಇಟ್ರಲ್ಲಪ್ಪೋ ಬತ್ತಿ, ಜಯಸಿಂಹ ರೆಡ್ಡಿ ಆ್ಯಕ್ಷನ್ ಕಟ್ ಹೇಳಲಿರುವ ಲವ್ ಕಾಲೇಜ್ ಚಿತ್ರಗಳಲ್ಲಿ ಬುಲೆಟ್ ಪ್ರಕಾಶ್ ಅಭಿನಯಿಸಬೇಕಿತ್ತು.