Freddie Mercury: ಈ ಖ್ಯಾತ ಗಾಯಕನ ಚಡ್ಡಿಗೆ 18 ಲಕ್ಷ ರೂಪಾಯಿ! ಹರಾಜಿನಲ್ಲಿ ಖರೀದಿಸೋಕೆ ಮುಗಿಬಿದ್ದ ಜನ!

ಪ್ರಸಿದ್ಧ ವ್ಯಕ್ತಿಗಳ ವಸ್ತುಗಳನ್ನು ಹರಾಜಿಗಿಡುವುದು ಹಿಂದಿನಿಂದಲೂ ನಡೆದುಕೊಂಡು ಬಂದಿದೆ. ಪ್ರಸಿದ್ಧ ಕ್ರೀಡಾಪಟುಗಳು, ಹೀರೋಗಳು ಸೇರಿದಂತೆ ಹಲವು ಕ್ಷೇತ್ರದ ಗಣ್ಯರು ಉಪಯೋಗಿಸುತ್ತಿದ್ದ ವಸ್ತುಗಳನ್ನು ಹರಾಜಿಗೆ ಇಡಲಾಗುತ್ತದೆ.

70-80ರ ದಶಕದ ಖ್ಯಾತ ಬ್ರಿಟೀಷ್ ಗಾಯಕ ಹಾಗೂ ಗೀತೆ ರಚನೆಕಾರ​ ಫ್ರೆಡ್ಡಿ ಮರ್ಕ್ಯುರಿ ಅವರ ಕೆಲವು ವಸ್ತುಗಳನ್ನು ಹರಾಜಿಗೆ ಇಡಲಾಗಿದೆ. ಮರ್ಕ್ಯುರಿ ರಾಕ್ ಬ್ಯಾಂಡ್ ಕ್ವೀನ್‌ನ ಪ್ರಮುಖ ಗಾಯಕರಾಗಿ ವಿಶ್ವಾದ್ಯಂತ ಜನಪ್ರಿಯತೆಯನ್ನು ಗಳಿಸಿದ್ದರು. ಅವರು ಈ ಜಗತ್ತಿನಲ್ಲಿ ಇಲ್ಲವಾದರೂ ಅವರ ಜನಪ್ರಿಯತೆ ಇಂದಿಗೂ ಕಡಿಮೆಯಾಗಿಲ್ಲ.

1980ರ ಬರ್ಮಿಂಗ್​ ಹ್ಯಾಮ್ ಸಂಗೀತ ಕಚೇರಿಯಲ್ಲಿ ಮರ್ಕ್ಯುರಿ ಧರಿಸಿದ್ದ ಕಪ್ಪು ಲೆದರ್​ ಹಾಟ್‌ಪ್ಯಾಂಟ್‌ ಅನ್ನು ಯುನೈಟೆಡ್ ಕಿಂಗ್‌ಡಮ್ (UK)ನಲ್ಲಿ  ಹರಾಜಿಗೆ ಇಡಲಾಗಿತ್ತು. ಇದು ಸುಮಾರು   18,000 ಪೌಂಡ್​ (ಸುಮಾರು 18.37 ಲಕ್ಷ) ಗೆ ಮಾರಾಟವಾಗಿ ಅಚ್ಚರಿ ಉಂಟು ಮಾಡಿದೆ.

ಆ ಕಾರ್ಯಕ್ರಮದಲ್ಲಿ ಪ್ರೇಕ್ಷಕರನ್ನು ಅಚ್ಚರಿಗೊಳಿಸಲು, ಮರ್ಕ್ಯುರಿ ಹಾಟ್‌ಪ್ಯಾಂಟ್‌ ಧರಿಸಿದ್ದರು. ಅಷ್ಟೇ ಅಲ್ಲ ಅನೇಕ ಪ್ರದರ್ಶನಗಳಲ್ಲಿ ಮರ್ಕ್ಯುರಿ ಇದೇ ರೀತಿಯ ಲೆದರ್​ ಶಾರ್ಟ್​ಗಳನ್ನು ಧರಿಸುತ್ತಿದ್ದರು.

ಈ ಹಾಟ್‌ಪ್ಯಾಂಟ್‌ಅನ್ನು ಮರ್ಕ್ಯುರಿ ಗೆಳತಿ ಮೇರಿ ಆಸ್ಟಿನ್ ಎಂಬುವವರು ಹರಾಜಿಗಿಟ್ಟಿದ್ದರು. ಈ ನಿಗಧಿಕತ ಮೊತ್ತಕ್ಕಿಂತ ಹಲವು ಪಟ್ಟು ಹೆಚ್ಚಿನ ಮೊತ್ತಕ್ಕೆ ಮಾರಾಟವಾಗಿವೆ. ಪ್ರಮುಖ ಹರಾಜು ಸಂಸ್ಥೆ ನ್ಯೂಟನ್-ಲೆ-ವಿಲ್ಲೋಸ್ ಈ ಹಾಟ್‌ಪ್ಯಾಂಟ್‌ಗಳನ್ನು £ 8,000 (ಸುಮಾರು ರೂ 8 ಲಕ್ಷ) ಎಂದು ಅಂದಾಜಿಸಿತ್ತು. ಆದರೆ ಅಂದಾಜು ಮಾಡಿದ ಮೊತ್ತಕ್ಕಿಂತ ಹೆಚ್ಚು ಮಾರಾಟವಾಗಿದ್ದು, ಇದು ನಂಬಲಸಾಧ್ಯ ಎಂದು ಸಂಸ್ಥೆ ತಿಳಿಸಿದೆ.

ಮರ್ಕ್ಯುರಿ ತನ್ನ ಸಾವಿನ ಮೊದಲು ತನ್ನ ಆಪ್ತ ಸ್ನೇಹಿತೆ ಮೇರಿ ಆಸ್ಟನ್​ಗೆ ಹಲವು ವಸ್ತುಗಳನ್ನು ಹಸ್ತಾಂತರಿಸಿದ್ದರು. ವರದಿಯ ಪ್ರಕಾರ ಆ ವಸ್ತುಗಳ್ನು ಮೂರು ದಶಕಗಳಿಂದ ಲಂಡನ್‌ನಲ್ಲಿರುವ ಮರ್ಕ್ಯುರಿ ಮನೆಯಲ್ಲಿ ಸಂಗ್ರಹಿಸಲಾಗಿತ್ತು. ಒಟ್ಟು 1500 ವಸ್ತುಗಳನ್ನು ಹರಾಜು ಮಾಡಲಾಗಿದೆ. ಈ ಸಂಗ್ರಹಗಳಲ್ಲಿ ಅವರು ಕೆಂಪು ವೆಲ್ವೆಟ್, ವೇದಿಕೆಯ ಮೇಲೆ ಧರಿಸಿರುವ ಟೋಪಿ, ಕಿರೀಟ ಮತ್ತು ಅವರ ಫೋನ್​ಗಳು  ಹಾಗೂ ಅವರ ಹಸ್ತಾಕ್ಷರವುಳ್ಳ ಪ್ರತಿಗಳನ್ನು ಮಾರಾಟ ಮಾಡಲಾಗಿದೆ.

ಕಳೆದ ವರ್ಷ ಕ್ವೀನ್ ಫ್ರಂಟ್‌ಮ್ಯಾನ್ ಫ್ರೆಡ್ಡಿ ಮರ್ಕ್ಯುರಿ ಒಡೆತನದಲ್ಲಿದ್ದ 1974ರ ರೋಲ್ಸ್ ರಾಯ್ಸ್ ಕಾರನ್ನು ಹರಾಜಿಗೆ ಇಡಲಾಗಿತ್ತು. ಅದು ಅಂದಾಜಿನ 14 ಪಟ್ಟು ಹೆಚ್ಚು ಮಾರಾಟವಾಗಿತ್ತು. ಆ ಕಾರು 20,000 to £30,000 ಪೌಂಡ್​ (20 ಲಕ್ಷದಿಂದ 30 ಲಕ್ಷ) ವರೆಗೆ ಮಾರಾಟವಾಗಬಹುದು ಎಂದು ಭಾವಿಸಲಾಗಿತ್ತು. ಆದರೆ ಎಲ್ಲರ ನಿರೀಕ್ಷೆ ಮೀರಿ 286,250 ಪೌಂಡ್​ಗೆ (2,91,65,316) ಮಾರಾಟವಾಗಿತ್ತು.