Ram Charan -Shankar ಕಾಂಬಿನೇಶನ್​ನಲ್ಲಿ ಪ್ಯಾನ್​ ಇಂಡಿಯಾ ಸಿನಿಮಾ: ಪೋಸ್ಟರ್​ಗಾಗಿ ಕೋಟಿ ಖರ್ಚು..!

ರಾಜಮೌಳಿ ನಿರ್ದೇಶನ ಆರ್​ಆರ್​ಆರ್​ ಸಿನಿಮಾದ ಚಿತ್ರೀಕರಣ ಮುಗಿಯುತ್ತಿದ್ದರಂತೆಯೇ ರಾಮ್​ ಚರಣ್ ತೇಜ ಅವರು ಹೊಸ ಸಿನಿಮಾಗೆ ಸಜ್ಜಾಗಿದ್ದಾರೆ. ಈ ಸಲ ಬಿಗ್ ಬಜೆಟ್​ ಸಿನಿಮಾಗಳ ನಿರ್ದೇಶಕ ಎಂದೇ ಖ್ಯಾತರಾಗಿರುವ ಶಂಕರ್​ ಅವರ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ.

ಆರ್​ 15 ಈ ಸಿನಿಮಾ ಪ್ಯಾನ್​ ಇಂಡಿಯಾ ಚಿತ್ರವಾಗಿದ್ದು, ಇದರ ಮುಹೂರ್ತ ನಿನ್ನೆ ನೆರವೇರಿತು. ಈ ಚಿತ್ರದ ಕಾರ್ಯಕ್ರಮದಲ್ಲಿ ನಿರ್ದೇಶಕ ರಾಜಮೌಳಿ, ಚಿರಂಜೀವಿ ಹಾಗೂ ಬಾಲಿವುಡ್​ ನಟ ರಣವೀರ್ ಸಿಂಗ್​ ಸಹ ಭಾಗಿಯಾಗಿದ್ದರು.

ಬಿಗ್ ಬಜೆಟ್​ ಸಿನಿಮಾ ಎನ್ನಲಾಗುತ್ತಿರುವ ಈ ಚಿತ್ರಕ್ಕೆ ಚಿರಂಜೀವಿ ಅವರು ಕ್ಲ್ಯಾಪ್​ ಮಾಡಿ ಚಾಲನೆ ಕೊಟ್ಟಿದ್ದಾರೆ. ಇನ್ನು ರಾಮ್​ ಚರಣ್ ಹಾಗೂ ಕಿಯಾರಾ ಅವರು ಸೂಟ್​ನಲ್ಲಿ ಕಾಣಿಸಿಕೊಂಡಿದ್ದು ಒಟ್ಟಿಗೆ ಬರುವ ದೃಶ್ಯವನ್ನು ನಿನ್ನೆ ಚಿತ್ರೀಕರಿಸಲಾಗಿದೆ.

ಶಂಕರ್ ಅವರ 50 ಸಿನಿಮಾ ಇದಾದರೆ, ರಾಮ್​ ಚರಣ್​ ಅವರ 15ನೇ ಚಿತ್ರವಾಗಿದೆ. ಸದ್ಯಕ್ಕೆ ಇದಕ್ಕೆ ಆರ್​ ಸಿ 15 ಎಂದು ಹೆಸರಿಡಲಾಗಿದೆ.ಈಗ ರಿಲೀಸ್ ಆಗಿರುವ ಕಾನ್ಸೆಪ್ಟ್​ ಪೋಸ್ಟರ್​ಗೆ 1.73 ಕೋಟಿ ಖರ್ಚು ಮಾಡಲಾಗಿದೆಯಂತೆ.

ಇನ್ನು ಈ ಪ್ಯಾನ್​ ಇಂಡಿಯಾ ಸಿನಿಮಾದ ಮುಹೂರ್ತಕ್ಕೆ ಬಾಲಿವುಡ್​ ನಟ ರಣವೀರ್​ ಸಿಂಗ್ ಬಂದಿದ್ದು ಸಾಕಷ್ಟು ಕುತೂಹಲ ಕೆರಳಿಸಿದೆ. ಹೌದು, ಇದು ಪ್ಯಾನ್​ ಇಂಡಿಯಾ ಸಿನಿಮಾ ಆಗಿದ್ದು, ರಣವೀರ್ ಸಿಂಗ್​ ಇದರಲ್ಲಿ ಕಾಣಿಸಿಕೊಳ್ಳುವ ಸಾಧ್ಯತೆ ಇರಬಹುದು ಎಂಬ ಮಾತುಗಳು ಕೇಳಿ ಬರುತ್ತಿವೆ.

ಇನ್ನು ರಣವೀರ್​ ಸಿಂಗ್ ಅವರು ಎಂದಿನಂತೆ ತಮ್ಮ ಹೊಸ ಫಂಕಿ ಸ್ಟೈಲ್​ನಲ್ಲಿ ಕಾಣಿಸಿಕೊಂಡಿದ್ದರು. ಥೇಟ್​ ಸ್ಯಾಂಡಲ್​ವುಡ್​ನ ಉಪ್ಪಿಯ ಲುಕ್​ನಲ್ಲಿದ್ದರು. ರಣವೀರ್ ಸಿಂಗ್​ ಅವರ ಈ ಚಿತ್ರಗಳು ಸದ್ಯ ವೈರಲ್​ ಆಗುತ್ತಿವೆ.

ನಿರ್ದೇಶಕ ಶಂಕರ್​ (Director Shankar) ಅವರ ಸಿನಿಮಾ ಎಂದ ಕೂಡಲೇ ಬಜೆಟ್ ಎಷ್ಟು ಎಂದು ಕೇಳುವಂತಾಗಿದೆ... ಹೌದು, ಇವರು ಒಂದು ಸಿನಿಮಾಗೆ ಖರ್ಚು ಮಾಡುವ ಹಣದಲ್ಲಿ ಸುಮಾರು ಹತ್ತು ಚಿತ್ರಗಳ ನಿರ್ಮಾಣ ಮಾಡಬಹುದು. ಅದಕ್ಕೆ ಬಿಗ್ ಬಜೆಟ್​ (Big Budget Movies) ಸಿನಿಮಾಗಳಿಗೆ ಶಂಕರ್​ ಅವರು ಹೆಸರುವಾಸಿಯಾಗಿದ್ದಾರೆ.

5 ವರ್ಷಗಳ ಹಿಂದೆ 2.0 ಸಿನಿಮಾಗಾಗಿ 400 ಕೋಟಿ ಖರ್ಚು ಮಾಡಿದ್ದರು ಶಂಕರ್​. ಈಗ ಮತ್ತೊಂದು ಬಿಗ್ ಬಜೆಟ್​ ಸಿನಿಮಾ ಮಾಡುತ್ತಿದ್ದಾರೆ.

ದಿಲ್​ ರಾಜು ಅವರ ಬ್ಯಾನರ್ ಅಡಿ ಈ ಸಿನಿಮಾ ನಿರ್ಮಾಣವಾಗುತ್ತಿದೆ. ದಿಲ್ ರಾಜು ನಿರ್ಮಿಸುತ್ತಿರುವ 50ನೇ ಸಿನಿಮಾ ಇದಾಗಿದೆ. ಅಲ್ಲು ಅರ್ಜುನ್ ಅಭಿನಯದ ಡಿಜೆ ಸಿನಿಮಾ ದಿಲ್​ ರಾಜು ನಿರ್ಮಿಸಿದ್ದ 25ನೇ ಚಿತ್ರವಾಗಿತ್ತು.