ರಕ್ಷಿತ್ ಶೆಟ್ಟಿ-ರಶ್ಮಿಕಾ ಮಂದಣ್ಣ ಮುಖಾಮುಖಿ: ಯಾರು ಗೆಲ್ಲಲಿದ್ದಾರೆಂಬ ಚರ್ಚೆ ಶುರು..!

ಕನ್ನಡದಲ್ಲಿ ಬ್ಯಾಕ್ ಟು ಬ್ಯಾಕ್ ಚಿತ್ರಗಳು ಬಿಡುಗಡೆಗೆ ತಯಾರಿ ಆರಂಭಿಸಿದೆ. ಈಗಾಗಲೇ ಒಂದಷ್ಟು ಸಿನಿಮಾಗಳನ್ನು ನವೆಂಬರ್​ನಲ್ಲಿ ತೆರೆಗೆ ತರಲು ನಿರ್ಮಾಪಕರು ಪ್ಲ್ಯಾನ್ ಮಾಡಿಕೊಂಡಿದ್ದಾರೆ.

ಮತ್ತೊಂದಿಷ್ಟು ನಿರ್ಮಾಪಕರು ವರ್ಷಾಂತ್ಯಕ್ಕೆ ಮನರಂಜನೆಯ ರಸದೌತಣ ನೀಡಲು ತುದಿಗಾಲಲ್ಲಿ ನಿಂತಿದ್ದಾರೆ.

ಆ ಲೀಸ್ಟ್​ನಲ್ಲಿ ಕೇಳಿ ಬರುತ್ತಿರುವ ಎರಡು ಚಿತ್ರಗಳು ಅವನೇ ಶ್ರೀಮನ್ನಾರಾಯಣ ಮತ್ತು ಪೊಗರು.

ನಂದಕಿಶೋರ್ ನಿರ್ದೇಶನದ ಪೊಗರು ಚಿತ್ರಕ್ಕೆ ಧ್ರುವ ಸರ್ಜಾ ನಾಯಕನಾದರೆ, ಯುವ ನಿರ್ದೇಶಕ ಸಚಿನ್ ರವಿ ಆ್ಯಕ್ಷನ್ ಕಟ್ ಹೇಳಿರುವ ಅವನೇ ಶ್ರೀಮನ್ನಾರಾಯಣದಲ್ಲಿ ರಕ್ಷಿತ್ ಶೆಟ್ಟಿ ಕಾಣಿಸಿಕೊಂಡಿದ್ದಾರೆ. ಆದರೆ..

ಒಂದೆಡೆ ರಕ್ಷಿತ್ ಶೆಟ್ಟಿ 3 ವರ್ಷದ ಬಳಿಕ ಬಾಕ್ಸಾಫೀಸ್​ಗೆ ಮರಳಿದರೆ, ಪೊಗರು ಚಿತ್ರದ ಮೂಲಕ ಸ್ಯಾಂಡಲ್​ವುಡ್​ ಸಾನ್ವಿ ಕನ್ನಡಕ್ಕೆ ಮರಳುತ್ತಿರುವುದು ಮತ್ತೊಂದು ವಿಶೇಷ.

ಕಿರಿಕ್ ಪಾರ್ಟಿ ಚಿತ್ರದ ಮೂಲಕ ಮೋಡಿ ಮಾಡಿದ್ದ ಕರ್ಣ-ಸಾನ್ವಿ ಜೋಡಿ ಇದೀಗ ಎರಡು ಚಿತ್ರಗಳ ಮೂಲಕ ಮುಖಾಮುಖಿಯಾಗುತ್ತಿದ್ದಾರೆ. ಅದಕ್ಕಿಂತಲೂ ಈ ಇಬ್ಬರು ಸ್ಟಾರುಗಳ ವೈಯುಕ್ತಿಕ ವಿಷಯದಿಂದ ಅವನೇ ಶ್ರೀಮನ್ನಾರಾಯಣ ಮತ್ತು ಪೊಗರು ಸಿನಿಮಾ ಇದೀಗ ಎಲ್ಲರ ಗಮನ ಸೆಳೆಯುತ್ತಿದೆ.

ಏಕೆಂದರೆ ಅವನೇ ಶ್ರೀಮನ್ನಾರಾಯಣ ಮತ್ತು ಪೊಗರು ಒಂದೇ ದಿನ ತೆರೆಗೆ ಅಪ್ಪಳಿಸುವ ಸಾಧ್ಯತೆಯಿದೆ. ಒಂದು ಮೂಲದ ಪ್ರಕಾರ ಎರಡು ಚಿತ್ರಗಳು ಡಿಸೆಂಬರ್ 27ರಂದು ಬಿಡುಗಡೆಯಾಗಲಿದೆ.

ಈ ಹಿಂದೆ ಅವನೇ ಶ್ರೀಮನ್ನಾರಾಯಣ ಚಿತ್ರವು ನವೆಂಬರ್ ಅಂತ್ಯಕ್ಕೆ ಬರಲಿದೆ ಎನ್ನಲಾಗಿತ್ತು. ಇದೀಗ ಚಿತ್ರತಂಡ ಕಿರಿಕ್ ಪಾರ್ಟಿ ಸಿನಿಮಾ ಬಿಡುಗಡೆಯಾದ ದಿನ(ಡಿ.27)ವನ್ನೇ ಫೈನಲ್ ಮಾಡಿದ್ದಾರೆ.

ಇನ್ನು ಪೊಗರು ಸಿನಿಮಾವನ್ನು ಕೂಡ ಈ ವರ್ಷಾಂತ್ಯದಲ್ಲಿ ತೆರೆಗೆ ತರುವುದಾಗಿ ನಿರ್ದೇಶಕ ನಂದ ಕಿಶೋರ್ ಹೇಳಿದ್ದರು. ಅದರಂತೆ ಇದೀಗ ಧ್ರುವ ಸರ್ಜಾರ ಹೊಸ ಅವತಾರವನ್ನು ಡಿ.27 ರಂದು ಜನರ ಮುಂದಿಡಲಿದ್ದಾರೆ ಎಂಬ ಮಾತುಗಳು ಕೇಳಿ ಬಂದಿವೆ.

ಈ ಎರಡು ಸಿನಿಮಾಗಳು ಒಂದೇ ದಿನ ರಿಲೀಸ್ ಆಗುತ್ತಿರುವ ಸುದ್ದಿ ಹೊರಬೀಳುತ್ತಿದ್ದಂತೆ ಗಾಂಧಿನಗರದಲ್ಲಿ ಹೊಸ ಟಾಕುಗಳು ಶುರುವಾಗಿದೆ.

ಹೌದು, ರಕ್ಷಿತ್-ರಶ್ಮಿಕಾ ಬಾಕ್ಸಾಫೀಸ್ ಕ್ಲ್ಯಾಶ್. ಈ ಇಬ್ಬರಿಗೂ ಸ್ಯಾಂಡಲ್​ವುಡ್​ನಲ್ಲಿ ತಮ್ಮದೆಯಾದ ಅಭಿಮಾನಿ ಬಳಗವಿದೆ. ಹೀಗಾಗಿ ಎರಡು ಸಿನಿಮಾಗಳಿಗೂ ಭರ್ಜರಿ ಓಪನಿಂಗ್ ದೊರೆಯುವುದರಲ್ಲಿ ಡೌಟೇ ಇಲ್ಲ.

ಅದರಲ್ಲೂ ಬಾಕ್ಸಾಫೀಸ್​ನಲ್ಲಿ ಕಿರಿಕ್ ಕರ್ಣ-ಸಾನ್ವಿಯ ಮುಖಾಮುಖಿ ಎರಡು ಚಿತ್ರಗಳ ಮೇಲೆ ನಿರೀಕ್ಷೆ ಹುಟ್ಟುಹಾಕಿದೆ. ಅಂದಹಾಗೆ ಈ ಎರಡು ಸಿನಿಮಾಗಳು ಪ್ಯಾನ್​ ಇಂಡಿಯಾ ಮೂವಿಗಳು ಎಂಬುದು ಕೂಡ ಇಲ್ಲಿ ಮುಖ್ಯವಾಗಿದೆ.

ಈಗಾಗಲೇ ರಶ್ಮಿಕಾ ಮಂದಣ್ಣಗೆ ಕಾಲಿವುಡ್-ಟಾಲಿವುಡ್​ನಲ್ಲಿ ಅಭಿಮಾನಿಗಳ ದಂಡೇ ಇದ್ದು, ಹೀಗಾಗಿ ಪೊಗರು ಚಿತ್ರಕ್ಕೆ ಅನ್ಯಭಾಷೆಯಲ್ಲೂ ಭರ್ಜರಿ ರೆಸ್ಪಾನ್ಸ್ ಸಿಗುವ ಸಾಧ್ಯತೆಯಿದೆ. ಹಾಗಾಗಿ ಯಾರು ಗೆಲ್ಲಲ್ಲಿದ್ದಾರೆ, ಯಾವ ಚಿತ್ರ ಹೆಚ್ಚು ಗಳಿಕೆ ಮಾಡಲಿದೆ ಎಂಬ ಚರ್ಚೆ ಶುರುವಾಗಿದೆ.

ಒಟ್ಟಿನಲ್ಲಿ ಇದೇ ಮೊದಲ ಬಾರಿ ಗಾಂಧಿನಗರದಲ್ಲಿ ನಾಯಕ-ನಾಯಕಿಯ ಬಾಕ್ಸಾಫೀಸ್ ಕ್ಲ್ಯಾಶ್​​   ಸಿನಿಪ್ರಿಯರ ಗಮನ ಸೆಳೆದಿದೆ. ಇಲ್ಲಿ ಯಾರು ಗೆಲ್ಲಲ್ಲಿದ್ದಾರೆ? ಯಾವ ಚಿತ್ರ ಹೆಚ್ಚು ಕಲೆಕ್ಷನ್ ಮಾಡಲಿದೆ ಎಂಬುದನ್ನು ಕಾದು ನೋಡೋಣ.

ರಶ್ಮಿಕಾ ಮಂದಣ್ಣ (PC: Rashmika Mandanna)