ಚಿತ್ರ ತಂಡದಿಂದ ಭರ್ಜರಿ ಆಫರ್: ಭರತ ಬಾಹುಬಲಿ ನೋಡಿ...ಒಂದು ಕೋಟಿ ಬಹುಮಾನ ಗೆಲ್ಲಿ..!

ಮಾಸ್ಟರ್ ಪೀಸ್​ ಚಿತ್ರ ನಿರ್ದೇಶಕ ಮಂಜು ಮಾಂಡವ್ಯ  ಹೀರೋವಾಗಿ ಎಂಟ್ರಿ ಕೊಡುತ್ತಿರುವ ವಿಷಯ ಗೊತ್ತೇ ಇದೆ.

'ಭರತ ಬಾಹುಬಲಿ' ಎಂಬ ಚಿತ್ರವನ್ನು ನಿರ್ದೇಶಿಸಿ ನಾಯಕ ನಟನಾಗಿ ನಟಿಸಿ ಮಂಜು ಮಾಂಡವ್ಯ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದಾರೆ.

ಮಾಸ್ಟರ್ ಪೀಸ್ ಚಿತ್ರದ ಬ್ರೂಸ್ಲಿ ಚಿಕ್ಕಣ್ಣ ಇಲ್ಲೂ ಕೂಡ ಇರಲಿದ್ದು, ಜನವರಿಗೆ 17 ರಿಂದ ಪ್ರೇಕ್ಷಕರಿಗೆ ಭರತ ಬಾಹುಬಲಿಯನ್ನು ನೋಡಬಹುದು ಎಂದಿದ್ದಾರೆ.

ಆದರೆ ಅದಕ್ಕೂ ಮುನ್ನ ಚಿತ್ರ ನಿರ್ಮಾಪಕರಾದ ಟಿ. ಶಿವಪ್ರಕಾಶ್ ಚಿತ್ರಪ್ರೇಮಿಗಳಿಗೆ ಭರ್ಜರಿ ಆಫರ್​ನ್ನು ನೀಡಿದ್ದಾರೆ. ಹೌದು, ಈ ಸಿನಿಮಾ ನೋಡುವವರಿಗೆ ಒಂದು ಕೋಟಿ ರೂಪಾಯಿ ಮೊತ್ತದ ಬಹುಮಾನಗಳನ್ನು ನೀಡುವುದಾಗಿ ಘೋಷಿಸಿಸಿದ್ದಾರೆ.

ಈ ಬಹುಮಾನದಲ್ಲಿ 5 ಲಕ್ಷ ಬೆಲೆ ಬಾಳುವ 10 ಕಾರುಗಳು ಹಾಗೂ 5 ಲಕ್ಷ ಬೆಲೆಬಾಳುವ 10 ಚಿನ್ನದ ಆಭರಣಗಳು ಸೇರಿವೆ.

ಈ ಚಿತ್ರವನ್ನು ನೋಡಿದ 20 ಜನ ಅದೃಷ್ಟವಂತ ಪ್ರೇಕ್ಷಕರಿಗೆ ಈ ಬಹುಮಾನ ಸಿಗಲಿದೆ. ಒಂದಾರ್ಥದಲ್ಲಿ ಸಿನಿಮಾ ಲಾಟರಿ ಆಫರ್ ಎನ್ನಬಹುದು.

ಭರತ ಬಾಹುಬಲಿ ಬಹುಮಾನ ಗೆಲ್ಲಲು ಪ್ರೇಕ್ಷಕರು ಮಾಡಬೇಕಿರುವುದು ಇಷ್ಟೇ. ಯಾವುದೇ ಚಿತ್ರಮಂದಿರದಲ್ಲಾದರೂ ಈ ಸಿನಿಮಾ ಟಿಕೆಟ್ ಕೊಡುವಾಗ ಕೂಪನ್ ಸಿಗಲಿದೆ.

ಆ ಕೂಪನ್ ಅನ್ನು ಲಕ್ಕಿ ಡಿಪ್​ಗೆ ಹಾಕಬೇಕು. ಈ ರೀತಿಯ ಲಕ್ಕಿ ಡಿಪ್​ ಮೂಲಕ ಅದೃಷ್ಟವಂತರನ್ನು ಆಯ್ಕೆ ಮಾಡಲಾಗುತ್ತದೆ. ಇಂತಹ 20 ಮಂದಿ ಅದೃಷ್ಟವಂತರಿಗೆ ಕಾರು ಹಾಗೂ ಚಿನ್ನದ ಆಭರಣಗಳು ಸಿಗಲಿವೆ.