Ashish Vidyarthi: ನಾವೇನು ದುಃಖದಲ್ಲೇ ಸಾಯ್ಬೇಕಾ? ಟ್ರೋಲ್ ಮಾಡಿದವರ ಮೇಲೆ ಸಿಟ್ಟಾದ ನಟ ಆಶಿಶ್

ಬಹುಭಾಷಾ ನಟ ಆಶಿಶ್ ವಿದ್ಯಾರ್ಥಿ ಅವರು 57ನೇ ವಯಸ್ಸಿಗೆ ಎರಡನೇ ಮದುವೆಯಾಗಿದ್ದಾರೆ. ಈ ಕುರಿತು ನಟನನ್ನು ನೆಟ್ಟಿಗರು ಟ್ರೋಲ್ ಮಾಡುತ್ತಿದ್ದಾರೆ. ಈ ಟ್ರೋಲ್ ಬಗ್ಗೆ ನಟ ಪ್ರತಿಕ್ರಿಯಿಸಿದ್ದಾರೆ. ತಮ್ಮನ್ನು ಬುದ್ಧ ಸೇರಿದಂತೆ ಹಲವು ಹೆಸರುಗಳಿಂದ ಕರೆಯುತ್ತಿರುವುದಾಗಿ ತಿಳಿಸಿದ್ದಾರೆ.

ಟ್ರೋಲ್​ಗೆ ಉತ್ತರಿಸಿದ ನಟ ನಮಗೆಲ್ಲರಿಗೂ ಒಂದು ದಿನ ವಯಸ್ಸಾಗುತ್ತದೆ. ಆಗ ನಾವು ನಮಗೆ ವಯಸ್ಸಾದ ಕಾರಣ ಈ ಕೆಲಸ ಮಾಡಬಾರದು ಎಂದು ಹೇಳಲು ಪ್ರಾರಂಭಿಸುತ್ತೇವೆ. ಹಾಗೆಂದ ಮಾತ್ರಕ್ಕೆ ನಾವು ಬೇಸರದಲ್ಲಿ ಸಾಯಬೇಕೆಂದು ಅರ್ಥವೇ ಎಂದು ಪ್ರಶ್ನಿಸಿದ್ದಾರೆ.

ಯಾರಿಗಾದರೂ ಸಂಗಾತಿ ಬೇಕೆನಿಸಿದರೆ, ಅವರೇಕೆ ಸಂಗಾತಿಯನ್ನು ಹೊಂದಬಾರದು? ನಾನು ಇಂಥಹ ಪ್ರತಿಕ್ರಿಯೆಗಳನ್ನು ಜನರಿಂದ ನಿರೀಕ್ಷಿಸಿರಲಿಲ್ಲ. ನನಗೆ ನಿಜಕ್ಕೂ ಶಾಕ್ ಆಯಿತು ಎಂದು ಹೇಳಿದ್ದಾರೆ.

ತಾನು ಜೀವನುದ್ದಕ್ಕೂ ಮೌಲ್ಯಗಳನ್ನು ಸೇರಿಸುತ್ತಲೇ ಬಂದಿದ್ದೇನೆ. ಮದುವೆಯಾಗಿ ಮಕ್ಕಳನ್ನು ಹೊಂದಿ ಕುಟುಂಬ ಹೊಂದಲು ಬಯಸುವ ವ್ಯಕ್ತಿಯನ್ನು ಕಾನೂನಾತ್ಮಕವಾಗಿ ಮದುವೆಯಾಗುವುದು ವೈಯಕ್ತಿಕ ಆಯ್ಕೆ ಎಂದಿದ್ದಾರೆ.

ನಂತರ ಪ್ರತಿಕ್ರಿಯಿಸಿದ ನಟ, ಕಮೆಂಟ್ ಮಾಡುತ್ತಿರುವವರು ಯಾರೂ ಬಂದು ನನ್ನ ಜೀವನವನ್ನು ನೋಡಿಕೊಳ್ಳುವುದಿಲ್ಲ. ಎಲ್ಲರಿಗೂ ತಮ್ಮ ವಯಸ್ಸಿನ ಹಂಗಿಲ್ಲದೆ ತಮ್ಮ ಖುಷಿಗಾಗಿ ಏನಾದರೂ ಮಾಡುವ ಕೆಪಾಸಿಟಿ ಇದೆ ಎಂದಿದ್ದಾರೆ.

ಆಶಿಶ್ ಅವರು ಉದ್ಯಮಿ ರೂಪಾಲಿ ಅವರನ್ನು ಮದುವೆಯಾಗಿದ್ದಾರೆ. ಅವರು ಗುವಾಹಟಿಯವರು. ರೂಪಾಲಿ ಕೊಲ್ಕತ್ತಾದಲ್ಲಿ ಫ್ಯಾಷನ್ ಸ್ಟೋರ್ ಹೊಂದಿದ್ದಾರೆ. ಆಶಿಶ್ ಅವರ ಮೊದಲ ಪತ್ನಿ ರಾಜೋಶಿ ಬರುವಾ ಅಥವಾ ಪಿಲೂ ವಿದ್ಯಾರ್ಥಿ ಕೂಡಾ ಅಸ್ಸಾಂನವರು.

ಆಶಿಶ್ ವಿದ್ಯಾರ್ಥಿ ಅವರು ಹಲವಾರು ಸಿನಿಮಾ ಇಂಡಸ್ಟ್ರಿಗಳಲ್ಲಿ ನಟಿಸಿ ಸೈ ಎನಿಸಿಕೊಂಡವರು. ಹಿರಿಯ ನಟ ದೆಹಲಿಯಲ್ಲಿ ಹುಟ್ಟಿದ್ದಾರೆ. 1962 ಜೂನ್ 19ರಂದು ಹುಟ್ಟಿದ ನಟ ಹಿಂದಿ, ತೆಲುಗು, ತಮಿಳು, ಕನ್ನಡ, ಮಲಯಾಳಂ, ಇಂಗ್ಲಿಷ್, ಒಡಿಯಾ, ಮರಾಠಿ, ಬೆಂಗಾಲಿ ಸಿನಿಮಾಗಳಲ್ಲಿ ನಟಿಸಿದ್ದಾಎರ, ಅವರ ಸಿನಿಮಾ ಕೆರಿಯರ್ 1989ರಲ್ಲಿ ಶುರುವಾಯಿತು.

ನಟ ಈ ತನಕ ಸುಮಾರು 11 ಭಾಷೆಗಳಲ್ಲಿ 200ಕ್ಕೂ ಹೆಚ್ಚು ಸಿನಿಮಾ ಮಾಡಿದ್ದಾರೆ. ನಟ ತಮ್ಮ ಮೊದಲ ಸಿನಿಮಾ ಸರ್ದಾರ್​ನಲ್ಲಿ ವಿಪಿ ಮೆನೋನ್ ಪಾತ್ರ ಮಾಡಿದ್ದರು. ಈ ಸಿನಿಮಾ ಸರ್ದಾರ್ ವಲ್ಲಭ ಭಾಯಿ ಪಟೇಲ್ ಅವರ ಜೀವನಾಧಾರಿತ ಸಿನಿಮಾ.