ಬೋನಿ ಕಪೂರ್​- ಶ್ರೀದೇವಿ ನಡುವಿನ ಪ್ರೇಮ ಸಂಬಂಧದ ಬಗ್ಗೆ ಮೌನ ಮುರಿದ ಅರ್ಜುನ್ ಕಪೂರ್​..!

ಶ್ರೀದೇವಿ ಹಾಗೂ ಬೋನಿ ಕಪೂರ್​ ರಹಸ್ಯವಾಗಿ ವಿವಾಹವಾದ ವಿಷಯ ಗೊತ್ತೇ ಇದೆ. ಶ್ರೀದೇವಿ ಅವರನ್ನು ಮದುವೆಯಾಗುವ ಮೊದಲೇ ಬೋನಿ ಕಪೂರ್​ ಅವರಿಗೆ ಮದುವೆಯಾಗಿ ಅರ್ಜುನ್​ ಹಾಗೂ ಅನ್ಶುಲಾ ಕಪೂರ್ ಎಂಬ ಮಕ್ಕಳಿದ್ದರು.

ಕೆಲವೊಂದು ವೈಯಕ್ತಿಕ ಕಾರಣಗಳಿಂದ ಶ್ರೀದೇವಿ ಹಾಗೂ ಬೋನಿ ಕಪೂರ್ ಅವರ ಮೊದಲ ಪತ್ನಿ ಮೋನಾ ಶೌರಿ ಹಾಗೂ ಮಕ್ಕಳ ಜೊತೆ ಸಂಬಂಧ ಅಷ್ಟು ಚೆನ್ನಾಗಿರಲಿಲ್ಲ.

ಆದರೆ ಶ್ರೀದೇವಿ ಸಾವನ್ನಪ್ಪಿದ ಸಮಯದಲ್ಲಿ ಅರ್ಜುನ್​ ಕಪೂರ್​ ತನ್ನ ಸಹೋದರಿಯರು ಹಾಗೂ ತಂದೆ ಜೊತೆ ನಿಂತಿದ್ದರು. ಇದಾದ ನಂತರ ಈ ಎರಡೂ ಕುಟುಂಬಗಳ ನಡುವಿದ್ದ ದೂರ ಸಂಪೂರ್ಣವಾಗಿ ಕಡಿಮೆಯಾಯಿತು.

ಅರ್ಜುನ್​ ಹಾಗೂ ಅನ್ಶುಲಾ ಕಪೂರ್​ ಈಗ ಜಾಹ್ನವಿ ಹಾಗೂ ಖುಷಿ ಜೊತೆ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಾರೆ.

ಇನ್ನು ಅರ್ಜುನ್ ಕಪೂರ್​ ಇತ್ತೀಚೆಗೆ ನೀಡಿರುವ ಸಂದರ್ಶನವೊಂದರಲ್ಲಿ ಶ್ರೀದೇವಿ ಹಾಗೂ ಬೋನಿ ಕಪೂರ್​ ಅವರ ಪ್ರೇಮ ಸಂಬಂಧದ ಕುರಿತು ಮಾತನಾಡಿದ್ದಾರೆ.

ಪ್ರೀತಿ ಅನ್ನೋದು ಸಂಕೀರ್ಣ ಹಾಗೂ ಜಟಿಲ. ಶ್ರೀದೇವಿ ಅವರೊಂದಿಗಿನ ಅಪ್ಪನ ಪ್ರೀತಿಯ ಸಂಬಂಧವನ್ನು ನಾನು ಗೌರವಿಸುತ್ತೇನೆ ಎಂದಿದ್ದಾರೆ.

ಒಬ್ಬರನ್ನು ಪ್ರೀತಿಸುತ್ತಿರುವಾಗಲೇ ಮತ್ತೊಬ್ಬರ ಜೊತೆ ಪ್ರೀತಿಯಲ್ಲಿ ಬೀಳುವುದನ್ನು ಅರ್ಥ ಮಾಡಿಕೊಳ್ಳಬೇಕಷ್ಟೆ ಎಂದಿರುವ ಅರ್ಜುನ್ ಕಪೂರ್​ ನನ್ನ ತಂದೆ ಮಾಡಿದ್ದು ಸರಿ ಎಂದು ಹೇಳುವುದಿಲ್ಲ. 

ಅಪ್ಪ ತೆಗೆದುಕೊಂಡ ನಿರ್ಧಾರದಿಂದ ಮಕ್ಕಳಾಗಿದ್ದ ನಮ್ಮ ಮನಸ್ಸಿನ ಮೇಲಾ ಪರಿಣಾಮ ಎಲ್ಲವೂ ನೋಡಿದಾಗ ಹೀಗೆಲ್ಲ ಆಗುತ್ತದೆ ಎಂದು ಹೇಳಲಾಗುವುದಿಲ್ಲ. ಆದರೆ ತನ್ನದೇ ಆದ ಸಮಸ್ಯೆಗಳ ಸುಳಿಯಲ್ಲಿ ಸಿಲುಕಿರುವ ವಯಸ್ಸಾದ ವ್ಯಕ್ತಿಯ ಸ್ಥಿತಿಯಲ್ಲಿ ನಿಂತು ನೋಡಿದಾಗ  ಅವರನ್ನು ಅರ್ಥ ಮಾಡಿಕೊಳ್ಳಬೇಕಾಗುತ್ತದೆ ಎಂದಿದ್ದಾರೆ ಅರ್ಜುನ್​. 

ಎಂತಹ ಪರಿಸ್ಥಿತಿ ಬಂಧರೂ ತಂದೆಯ ಜೊತೆ ಇರುವಂತೆ ಅಮ್ಮ ಹೇಳಿದ್ದರು. ಅಮ್ಮ ಹೇಳಿಕೊಟ್ಟಂತೆ ಒಳ್ಳೆಯ ಮಗನಾಗಿ ನನ್ನ ಕರ್ತವ್ಯ ನಿರ್ವಹಿಸುತ್ತಿದ್ದೇನೆ ಎಂದಿದ್ದಾರೆ.

ಅರ್ಜುನ್​ ಕಪೂರ್​ ಅವರ ತಾಯಿ ಮೋನಾ ಶೌರಿ ಕ್ಯಾನ್ಸರ್​ನಿಂದ ಬಳಲುತ್ತಿದ್ದು, ಅಂಗಾಗಗಳ ವೈಫಲ್ಯದಿಂದ 2012ರಲ್ಲಿ ಮಾ. 25ರಂದು ಕೊನೆಯುಸಿರೆಳೆದರು.

ಸದ್ಯ ಅರ್ಜುನ್ ಕಪೂರ್ ಜತೆ ಮಲೈಕಾ ಅರೋರಾ ಹೆಸರು ತಳುಕು ಹಾಕಿಕೊಂಡಿದ್ದು, ಈಜೋಡಿ ಸಾರ್ವಜನಿಕವಾಗಿ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ.