Vikram: ಬಾಲಿವುಡ್ ಡೈರೆಕ್ಟರ್​ಗೆ ಖಡಕ್ ತಿರುಗೇಟು ಕೊಟ್ಟ ಚಿಯಾನ್ ವಿಕ್ರಂ! ಏನಿದು ಟ್ವೀಟ್ ವಾರ್?

ಕಾಲಿವುಡ್ ನಟ ಚಿಯಾನ್ ವಿಕ್ರಂ ಅವರು ಪೊನ್ನಿಯಿನ್ ಸೆಲ್ವನ್ ಮೂಲಕ ಸಿಕ್ಕಾಪಟ್ಟೆ ಸುದ್ದಿ ಮಾಡುತ್ತಲೇ ಇದ್ದಾರೆ. ಆದರೆ ಇತ್ತೀಚೆಗೆ ಚಿಯಾನ್ ಹೆಸರು ತೆಗೆದಿರುವುದು ಬಾಲಿವುಡ್​ನ ಖ್ಯಾತ ನಿರ್ದೇಶಕ ಹಾಗೂ ನಟ ಅನುರಾಗ್ ಕಷ್ಯಪ್. ತಮಿಳು ನಟ ಚಿಯಾನ್ ವಿಕ್ರಂ ನಾನ ಸಂಪರ್ಕಿಸಿದಾಗ ಪ್ರತಿಕ್ರಿಯಿಸಲಿಲ್ಲ ಎಂದು ಹೇಳಿ ಚರ್ಚೆ ಶುರು ಮಾಡಿದ್ದಾರೆ.

ಕೆನೆಡಿ ಸಿನಿಮಾ ನಾನು ವಿಕ್ರಂಗಾಗಿಯೇ ಬರೆದಿದ್ದೆ. ಆದರೆ ಅದಕ್ಕಾಗಿ ಅವರನ್ನು ಸಂಪರ್ಕಿಸಿದಾಗ ಅವರು ಪ್ರತಿಕ್ರಿಯಿಸಲಿಲ್ಲ ಎಂದಿದ್ದಾರೆ. ಈ ಸುದ್ದಿ ಎಲ್ಲಾ ಕಡೆಗಳಲ್ಲಿ ವೈರಲ್ ಆಗುತ್ತಿದ್ದಂತೆ ಚಿಯಾನ್ ವಿಕ್ರಂ ಕೂಡಾ ಇದರ ಬಗ್ಗೆ ಪ್ರತಿಕ್ರಿಯಿಸಿದ್ದಾರೆ.

ವಿಕ್ರಂ ಪ್ರತಿಕ್ರಿಯಿಸಿ ಒಂದು ವರ್ಷದ ಹಿಂದೆ ನಾನು ಅನುರಾಗ್ ಅವರಿಗೆ ಕರೆ ಮಾಡಿದ್ದೆ. ಆಗಲೇ ನನಗೆ ಯಾವುದೇ ಮೇಲ್ ಅಥವಾ ಮೆಸೇಜ್ ಬಂದಿಲ್ಲ ಎಂದು ಹೇಳಿದ್ದೆ ಎಂದು ನಟ ಈ ಬಗ್ಗೆ ಸ್ಪಷ್ಟನೆ ಕೊಟ್ಟಿದ್ದಾರೆ. ಆದರೂ ಈ ವಿಚಾರ ಈಗ ಸೋಷಿಯಲ್ ಮೀಡಿಯಾದಲ್ಲಿ ಹೆಚ್ಚು ಚರ್ಚೆಯಾಗುತ್ತಿದೆ.

ಡಿಯರ್ ಅನುರಾಗ್ ಕಷ್ಯಪ್. ನಮ್ಮ ಸ್ನೇಹಿತರು ಹಾಗೂ ಹಿತೈಷಿಗಳ ಸಲುವಾಗಿ ನಾನು ನಮ್ಮ ಕಳೆದ ಒಂದು ವರ್ಷ ಹಿಂದಿನ ಫೋನ್ ಕಾಲ್ ಬಗ್ಗೆ ನೆನಪಿಸುತ್ತಿದ್ದೇನೆ. ನೀವು ನನ್ನನ್ನು ಸಿನಿಮಾಗಾಗಿ ಸಂಪರ್ಕಿಸಿದಿರಿ ಎಂದು ಸ್ನೇಹಿತರೊಬ್ಬರ ಮೂಲಕ ತಿಳಿದಿತ್ತು ಎಂದಿದ್ದಾರೆ.

ತಕ್ಷಣ ನಾನು ನಿಮಗೆ ಕಾಲ್ ಮಾಡಿದ್ದೆ. ನನಗೆ ಯಾವುದೇ ಮೇಲ್ ಅಥವಾ ಕಾಲ್ ಬಂದಿಲ್ಲ ಎಂದು ನಿಮಗೆ ತಿಳಿಸಿದ್ದೆ. ನೀವು ಬಳಸಿರುವ ಮೇಲ್ ಐಡಿ ಹಾಗೂ ಫೋನ್ ನಂಬರ್ ಎರಡೂ ಕೂಡಾ ಈಗ ಆ್ಯಕ್ಟಿವ್ ಆಗಿಲ್ಲ ಎಂದು ತಿಳಿಸಿದ್ದಾರೆ.

ನಾನು ಆ ಕಾಲ್​ನಲ್ಲಿಯೇ ಕೆನೆಡಿ ಸಿನಿಮಾ ಬಗ್ಗೆ ನಾನು ಸಿಕ್ಕಾಪಟ್ಟೆ ಎಕ್ಸೈಟ್ ಆಗಿರುವುದಾಗಿ ಹೇಳಿದ್ದೆ. ವಿಶೇಷವಾಗಿ ಅದು ನನ್ನ ಹೆಸರಿನಲ್ಲಿತ್ತು ಎಂದಿದ್ದಾರೆ ನಟ. ಆದರೆ ಈ ವಿಚಾರವಾಗಿ ಸೋಷಿಯಲ್ ಮೀಡಿಯಾದಲ್ಲಿ ಇಬ್ಬರ ಮಾತುಕತೆ ಜೋರಾಗಿದೆ. ಇವರ ಟ್ವೀಟ್ ವಾರ್ ವೈರಲ್ ಆಗಿದೆ.

ವಿಕ್ರಂ ಈ ಘಟನೆ ಬಗ್ಗೆ ಸ್ಪಷ್ಟನೆ ಕೊಟ್ಟಾಗ ಅನುರಾಗ್ ಕಷ್ಯಪ್ ಕೂಡಾ ಪ್ರತಿಕ್ರಿಯಿಸಿದ್ದಾರೆ. ಇದು ನಿಜ ಬಾಸ್ ಸರ್. ನಟನಿಗೆ ಬೇರೆ ನಟನಿಂದ ನಾನು ಅವರನ್ನು ಸಂಪರ್ಕಿಸಿದ್ದೇನೆ ಎಂದು ತಿಳಿದಾಗ ಅವರು ನನಗೆ ಕಾಲ್ ಮಾಡಿದ್ದರು. ಆಗ ನನಗೆ ಅವರಲ್ಲಿ ಬೇರೆ ವಾಟ್ಸಪ್ ನಂಬರ್ ಇದೆ ಎನ್ನುವುದು ಗೊತ್ತಾಯಿತು ಎಂದಿದ್ದಾರೆ.

ಅವರು ನನಗೆ ಅವರ ಸರಿಯಾದ ಮಾಹಿತಿ ಕೊಟ್ಟರು. ಸ್ಕ್ರಿಪ್ಟ್ ಓದುವುದರ ಬಗ್ಗೆಯೂ ಆಸಕ್ತಿ ವ್ಯಕ್ತಪಡಿಸಿದರು. ಆದರೆ ಶೂಟಿಂಗ್ ಮಾಡಬೇಕೆನ್ನುವಾಗ ನಾವೆಲ್ಲರೂ ಲಾಕ್ ಆದೆವು. ಅವರು ಕೆನೆಡಿ ಎಂಬ ಹೆಸರು ಬಳಸಲು ಅನಮತಿ ನೀಡಿದರು. ಈ ಘಟನೆಯ ಬಿಹೈಂಡ್ ಸ್ಟೋರಿ ಅಷ್ಟೇ ನಾನು ಸಂದರ್ಶನದಲ್ಲಿ ಹೇಳಿದರು. ಇದಕ್ಕೆ ಯಾವುದೇ ಓವರ್ ರಿಯಾಕ್ಷನ್ ಕೊಡುವ ಅಗತ್ಯವಿಲ್ಲ. ನನಗನಿಸಿದಂತೆ ನಾವಿಬ್ಬರೂ ಒಟ್ಟಿಗೆ ಕೆಲಸ ಮಾಡದೆ ನಿವೃತ್ತರಾಗುವುದಿಲ್ಲ ಎಂದಿದ್ದಾರೆ.

ರಾಹುಲ್ ಭಟ್ ನಟಿಸಿದ ಕೆನೆಡಿ ಪಾತ್ರ ಚಿಯಾನ್​ಗಾಗಿ ಬರೆಯಲಾಗಿತ್ತು ಎಂದು ಅನುರಾಗ್ ಕಷ್ಯಪ್ ರಿವೀಲ್ ಮಾಡಿದ್ದಾರೆ. ನಾನು ಸಂಪೂರ್ಣವಾಗಿ ಲಭ್ಯವಿರುವ ವ್ಯಕ್ತಿಯನ್ನಷ್ಟೇ ನನ್ನ ಸಿನಿಮಾಗೆ ಆಯ್ಕೆ ಮಾಡುತ್ತೇನೆ. ನಾನು ಕೆನೆಡಿಯನ್ನು ರಾಹುಲ್​ಗಾಗಿ ಬರೆದಿರಲಿಲ್ಲ. ಚಿಯಾನ್ ವಿಕ್ರಂಗಾಗಿ ಬರೆದಿದ್ದೆ. ಆದರೆ ಅವರನ್ನು ಸಂಪರ್ಕಿಸಿದಾಗ ಅವರು ಪ್ರತಿಕ್ರಿಯಿಸಲಿಲ್ಲ ಎಂದಿದ್ದಾರೆ.

ಅನುರಾಗ್ ಕಷ್ಯಪ್ ಅವರ ಮುಂದಿನ ಸಿನಿಮಾ ಕೆನೆಡಿಯಲ್ಲಿ ರಾಹುಲ್ ಭಟ್ ಹಾಗೂ ಸನ್ನಿ ಲಿಯೋನ್ ನಟಿಸುತ್ತಿದ್ದಾರೆ. ವಿಕ್ರಂ ಅವರು ಕೊನೆಯದಾಗಿ ಪೊನ್ನಿಯಿನ್ ಸೆಲ್ವನ್ 2 ಸಿನಿಮಾದಲ್ಲಿ ನಟಿಸಿದ್ದರು.