Anikha Sindhya: ವಿಲನ್ ರೋಲ್ ಮಾಡಿದ್ದಕ್ಕೆ ಎಷ್ಟೋ ಮದುವೆ ಸಂಬಂಧ ರಿಜೆಕ್ಟ್! ಲಕ್ಷ್ಮೀ ಬಾರಮ್ಮ ನಟಿ ಹೇಳಿದ್ದಿಷ್ಟು

ಲಕ್ಷ್ಮೀ ಬಾರಮ್ಮ ಸೀರಿಯಲ್​​ನಲ್ಲ ವಿಲನ್ ಪಾತ್ರ ಮಾಡಿದ್ದ ಕುಮುದಾ ನಿಮಗೆ ನೆನಪಿದ್ದಾರೆಯೇ? ಈ ನಟಿ ಹಲವಾರು ಸೀರಿಯಲ್​ಗಳಲ್ಲಿ ನೆಗೆಟಿವ್ ಶೇಡ್ ಇರುವಂತಹ ಪಾತ್ರಗಳನ್ನು ಮಾಡಿ ಕನ್ನಡ ಕಿರುತೆರೆ ಪ್ರೇಕ್ಷಕರ ಮನಸಿನಲ್ಲಿ ಉಳಿದಿದ್ದಾರೆ.

ಆದರೆ ಕಲಾವಿದರಾಗಿ ತೆರೆ ಮೇಲೆ ಚೆನ್ನಾಗಿ ನಟಿಸಿ ಅದುವೇ ರಿಯಲ್ ಲೈಫ್​ಗೆ ಮುಳ್ಳಾದರೆ ಏನು ಮಾಡುವುದು? ಲಕ್ಷ್ಮೀ ಬಾರಮ್ಮ ಧಾರಾವಾಹಿಯಲ್ಲಿ ನಟಿಸಿದ ಅನಿಖಾ ಸಿಂಧ್ಯ ಅವರಿಗೂ ಇಂಥದ್ದೇ ಒಂದು ಅನುಭವ ಆಗಿದೆ. ಅದನ್ನು ನಟಿ ಶೇರ್ ಮಾಡಿದ್ದಾರೆ.

ಹೀರೋಯಿನ್ ಆಗಬೇಕೆಂದು ಅನಿಖಾ ಅವರು ಕಿರುತೆರೆಗೆ ಬಂದಿದ್ದರು. ಆದರೆ ಆಗಿದ್ದೇ ಬೇರೆ. ಅನಿಖಾ ಅವರು ಮಿಂಚಿದ್ದು ವಿಲನ್ ರೋಲ್​ಗಳಲ್ಲಿ. ಅವರ ನೆಗೆಟಿವ್ ಪಾತ್ರಗಳು ಕಿರುತೆರೆಯಲ್ಲಿ ಜನಪ್ರಿಯವಾಯಿತು.

ನಾನು ಹೀರೋಯಿನ್ ಆಗಬೇಕು ಅಂತ ಈ ಚಿತ್ರರಂಗಕ್ಕೆ ಬಂದೆ. ಆದರೆ ಆರಂಭದಲ್ಲಿಯೇ ಕಾದಂಬರಿ ಧಾರಾವಾಹಿಯಲ್ಲಿಯೇ ನೆಗೆಟಿವ್ ಶೇಡ್‌ ಮಾಡಿದೆ. ಪದೇ ಪದೇ ನೆಗೆಟಿವ್ ಪಾತ್ರ ಬಂದರೂ ಕೂಡ ನನ್ನ ಯಾರೂ ಸ್ಟಾಪ್ ಮಾಡುವವರೂ ಇರಲಿಲ್ಲ. ನನಗೆ ಯಾರೂ ಸಲಹೆ ನೀಡುವವರೂ ಇರಲಿಲ್ಲ. ನಾನು ಯಾವ ಗಾಡ್ ಫಾದರ್ ಇಲ್ಲದೆ ಚಿತ್ರರಂಗಕ್ಕೆ ಕಾಲಿಟ್ಟೆ. ನೆಗೆಟಿವ್ ಶೇಡ್‌ ಮಾಡೋದು ನನ್ನ ಬದುಕನ್ನು ಹೇಗೆ ರೂಪಿಸುತ್ತದೆ ಎಂಬುದೇ ಗೊತ್ತಿರಲಿಲ್ಲ ಎಂದಿದ್ದಾರೆ ನಟಿ.

ನೆಗೆಟಿವ್ ಶೇಡ್‌ ಅವಕಾಶ ಬರುತ್ತಿತ್ತು. ಆನ್​ಸ್ಕ್ರೀನ್ ಮೇಲೆ ನನ್ನ ನೆಗೆಟಿವ್ ಶೇಡ್‌ನಲ್ಲಿ ನೋಡಿದವರು ರಿಯಲ್ ಲೈಫ್‌ನಲ್ಲಿ ಕೂಡ ನಾನು ಹೀಗೆ ಅಂತ ಅಂದುಕೊಂಡರು. ಧಾರಾವಾಹಿಗಳಲ್ಲಿ ನಾನು ಮಾಡಿರುವ ಪಾತ್ರ ನೋಡಿ ಅನೇಕ ಹಿರಿಯರು ಶಾಪ ಹಾಕಿದ್ದಾರೆ ಎಂದು ಅನಿಕಾ ಸಿಂಧ್ಯ ರಿವೀಲ್ ಮಾಡಿದ್ದಾರೆ.

ಧಾರಾವಾಹಿಯಲ್ಲಿ ವಿಲನ್ ಪಾತ್ರ ಮಾಡ್ತೀನಿ, ಕುಟುಂಬಕ್ಕೆ ಹೊಂದಿಕೊಳ್ಳೋದಿಲ್ಲ ಅಂತ ಎಷ್ಟೋ ಮನೆಯವರು ನನ್ನ ಮದುವೆ ಸಂಬಂಧವನ್ನು ತಿರಸ್ಕರಿಸಿದ್ದಾರೆ. ಮದುವೆ ಬೇಡ ಎನ್ನೋದಿಕ್ಕೆ ಅವರೆಲ್ಲರೂ ನನ್ನ ಪಾತ್ರಗಳೇ ಕಾರಣ ಅಂತ ಹೇಳಿದ್ದಾರೆ. ನೆಗೆಟಿವ್ ಶೇಡ್ ಮಾಡಿ ನಾನು ಎಷ್ಟೋ ಮದುವೆ ಪ್ರಪೋಸಲ್‌ಗಳನ್ನು ಕಳೆದುಕೊಂಡಿದ್ದೇನೆ ಎಂದಿದ್ದಾರೆ.

ನಾನು ಈ ರೀತಿಯ ನೆಗೆಟಿವಿಟಿಗಳನ್ನು ತಿರಸ್ಕರಿಸುತ್ತಿದ್ದೆ. ವಿಲನ್ ಪಾತ್ರ ಆದರೂ ತುಂಬ ಆಲೋಚಿಸಿ ಆಯ್ಕೆ ಮಾಡಿಕೊಳ್ಳುತ್ತಿದ್ದೆ. ಇನ್ನೂ ಕೆಲವೊಮ್ಮೆ ತೆರೆ ಮೇಲೆ ವಿಲನ್ ಆಗಿ ಕಾಣಿಸಿಕೊಳ್ಳೋದು ಬೇಡ ಅಂತ ಕೂಡ ಅಂದುಕೊಂಡಿದ್ದೆ. ನನಗೆ ಈ ಪಾತ್ರಗಳನ್ನು ಮಾಡಿದ್ದಕ್ಕೆ ಪಶ್ಚಾತ್ತಾಪ ಇಲ್ಲ, ಆದರೆ ಇವೆಲ್ಲ ನನಗೆ ಈಗಲೂ ಚುಚ್ಚುತ್ತಿವೆ ಎಂದು ಅನಿಕಾ ಸಿಂಧ್ಯ ಹೇಳಿದ್ದಾರೆ ಎಂದು ವಿಜಯಕರ್ನಾಟಕ.ಕಾಂ ವರದಿ ಮಾಡಿದೆ.